ជើងខ្លាំងវាយកូនហ្គោល Rory McIlroy ប្រកាសដកខ្លួនពី Rio 2016 ដោយខ្លាចឆ្លងវីរ៉ុស Zika
(ញូវយ៉ក)៖ កីឡាករវាយកូនហ្គោល Rory McIlroy បានប្រកាសមិនចូលរួមការប្រកួតកីឡាអូឡាំពិក រដូវក្តៅ ឆ្នាំ២០១៦ នៅប្រទេសប្រេស៊ីលឡើយ ដោយសារតែព្រួយបារម្ភពីការរីករាលដាលនៃវីរ៉ុស Zika នៅប្រទេសស្ថិតក្នុង តំបន់អាមេរិកឡាទីនមួយនេះ។
ជើងខ្លាំងវាយហ្គោល លំដាប់លេខ៤ របស់ពិភពលោកមួយនេះបានចេញសេចក្តីថ្លែងការណ៍នៅថ្ងៃពុធ ទី២២ មិថុនានេះថា «បន្ទាប់ពីការគិតយ៉ាងល្អិតល្អន់ ខ្ញុំបានសម្រេចចិត្តថា ដកខ្លួនចេញពី Olympic Games នៅក្នុងទីក្រុង Rio de Janiero ជាផ្លូវការហើយ ដើម្បីធានាបានពីសុខភាពសម្រាប់កូនៗ និងប្រពន្ធខ្ញុំ ខណៈដែលខ្ញុំមិនចាំបាច់គិតគូរ ពីមេដាយច្រើនពេកនោះទេ»។
តែយ៉ាងណាក៏ដោយ មិនត្រឹមមានតែ កីឡាករជនជាតិអៀរឡង់ខាងជើង ប្រកាសដកខ្លួនពី Rio 2016 នេះឡើយ ក្នុងនោះក៏មានជើងខ្លាំង Adam Scott, Louis Oosthuizen, Charl Schwartzel, Marc Leishman និង Vijay Singh ក៏បានសម្រេចមិនចូលរួមប្រកួតក្នុងព្រឹត្តិការណ៍ដែលមានរយៈពេល៤ឆ្នាំម្តង លើកទី៣១នេះដូចគ្នា នេះបើយោងតាម Sky Sports។
សូមបញ្ជាក់ផងដែរថា យុទ្ធនាការ Olympic Games 2016 និងចាប់ផ្តើមប្រកួតជាផ្លូវការនៅថ្ងៃទី០៥ សីហា និងបញ្ចប់ ទៅវិញនៅថ្ងៃទី២១ ខែសីហាខាងមុខក្នុងនោះដែរ IOC បានបង្ហាញអត្តពលិក ១០៥០០នាក់នឹងចូលរួមក្នុងឱកាសនោះ ខណៈដែលក្រសួងសុខាភិបាលប្រេស៊ីល រួមជាមួយ IOC ក៏បានកំពុងតែធ្វើការជាមួយនឹងអង្គការសុខភាពពិភព លោកយ៉ាងយកចិត្តទុកដាក់ផងដែរ ដើម្បីធានាសុវត្ថិភាពជូនចំពោះអត្តពលិក ថ្នាក់ដឹកនាំ និងអ្នកគាំទ្រ ក្នុងអំឡុងពេល ប្រកួតកីឡាអូឡាំពិកនេះ៕
ផ្តល់សិទ្ធដោយ ៖ ខ្មែរថកឃីង
កីឡាអន្តរជាតិ ដែលមើលច្រើន
