Maradona ស្នើសុំឲ្យ Messi គិតឡើងវិញពីការចូលនិវត្តន៍ពីក្រុមជម្រើសជាតិអាហ្សង់ទីន
(ញូជើស៊ី)៖ អតីតកីឡាករនិម្មិតរូបរបស់អាហ្សង់ទីន Diego Maradona បានស្នើសុំឲ្យកីឡាករខ្សែប្រយុទ្ធ Lionel Messi ធ្វើការពិចារណាឡើងវិញ ពីការសម្រេចចិត្តចូលនិវត្តន៍របស់គេក្នុងក្រុមជម្រើសជាតិអាហ្សង់ទីន ក្នុងដែលខណៈ ដែលគេ ទើបតែមានវ័យ២៩ឆ្នាំប៉ុណ្ណោះ។
សារព័ត៌មាន BBC បានផ្សាយឲ្យដឹងថា ការស្នើសុំឲ្យកីឡាករខ្សែប្រយុទ្ធជួរមុខ Lionel Messi ដែលកំពុងប្រកប អាជីពនៅក្នុងក្លឹបអាជីព FC Barcelona របស់អេស្ប៉ាញ គឹត្រូវបានធ្វើឡើង នៅក្រោយពេលដែល Messi បានប្រកាស ចូលនិវត្តន៍ភ្លាមៗ បន្ទាប់ពីទាត់បាល់ប៉េណាល់ទី១គ្រាប់មិនចូល ដោយការចាញ់ឈីលី ៤-២ បាល់ប៉េណាល់ទី កាត់សេចក្តីនៃព្រឹត្តិការណ៍ Copa America Centenario 2016 នៅអាមេរិកសប្តាហ៍មុន។
ប្រព័ន្ធផ្សព្វផ្សាយនានានៅលើសកលលោក សុទ្ធតែបានចុះផ្សាយពីការចូលនិវត្តន៍ដ៏តក់ក្រហល់របស់ Messi ទាំងមាន វ័យ២៩ឆ្នាំបែបនេះ ជាមួយនឹងការលេងបានល្អនៅឡើយ ក្នុងនាមជាកីឡាករដែលធ្លាប់ជួយឲ្យក្រុមជម្រើសជាតិ អាហ្សង់ទីន ឈានដល់វគ្គផ្តាច់ព្រ័ត្រ ៤ដងក្នុងពានរង្វាន់ផ្សេងៗ ក្នុងរយៈពេល៩ឆ្នាំចុងក្រោយនេះ បើទោះបីជា ពុំទាន់ជួយឲ្យក្រុមពពកសមួយនេះឈ្នះពានធំណាមួយក៏ដោយ។
មិត្តរួមជាតិ និងធ្លាប់ដឹកនាំអាហ្សង់ទីនលេងក្នុង World Cup 2010 លោក Diego Maradona បានថ្លែងប្រាប់កាសែត ក្នុងស្រុក La Nacion ថា «ការសម្រេចចិត្តចូលនិវត្តន៍ពីក្រុមជម្រើសជាតិរបស់ Messi គឹមិនចង់ឃើញភាពមហន្តរាយ ដែលយើងទទួលបាននាពេលនេះទេនៅថ្ងៃមុខ។ Messi ត្រូវតែបន្តលេងឲ្យក្រុមជម្រើសជាតិអាហ្សង់ទីនទៀត ក្នុងការ ជួយឲ្យក្រុមខ្លាំងមួយនេះឈ្នះពាន World Cup 2018 នៅរុស្ស៊ីឲ្យទាល់តែបាន»។
តែយ៉ាងណាក៏ដោយ រហូតមកទល់នឹងពេលនេះ ពុំទាន់មានចម្លើយណាមួយចេញពីកីឡាករជើងខ្លាំងលំដាប់លេខ១ ពិភពលោក Lionel Messi នៅឡើយទេ បន្ទាប់ពីមិនអាចជួយឲ្យអាហ្សង់ទីន ឈ្នះពានប្រចាំទ្វីបអាមេរិក Copa America Centenairo 2016 បាន ខណៈដែលអតីតកីឡាករ Maradona ដែលធ្លាប់ជួយឲ្យអាហ្សង់ទីន Maradona ឈ្នះពាន World Cup 1986 ធ្លាប់បានថ្លែងថា «បើមិនឈ្នះពាន Copa America មិនបាច់មកផ្ទះវិញទេ» នៅក្រោយពេល Messi បានជួយឲ្យអាហ្សង់ទីនឡើងទៅវគ្គផ្តាច់ព្រ័ត្រ ដោយជួបឈីលីនោះ ក្រោយទម្លាក់ម្ចាស់ផ្ទះអាមេរិក ៤-០ នៅវគ្គពាក់កណ្តាលផ្តាច់ព្រ័ត្រនោះ។
ជាមួយគ្នានោះដែរ ប្រធានាធិបតីអាហ្សង់ទីន អាចទៅជួបផ្ទាល់ជាមួយ Messi និងប្រជាពលរដ្ឋអាហ្សង់ទីន ទាំងអស់ក៏សុំស្នើឲ្យកីឡាករជើងខ្លាំងរូបនេះ ចូលជួយក្នុងក្រុមជម្រើសជាតិឡើងវិញផងដែរ ព្រោះរូបគេជាកីឡាករល្អដាច់គេក្នុងក្រុម និងអាចជាបច្ច័យអាក្រក់ផងដែរ ពីការសម្រេចចិត្តចូលនិវត្តន៍ដ៏លឿនបែបនេះ ចំពោះមិត្តរួមក្រុមឯទៀត៕
លោក Diego Maradona (ស្តាំ) កាលពីដឹកនាំអាហ្សង់ទីនក្នុង World Cup 2010
ផ្តល់សិទ្ធដោយ៖ ខ្មែរថកឃីង
កីឡាអន្តរជាតិ ដែលមើលច្រើន
