(ភ្នំពេញ)៖ មហាជនពិតជា មានអារម្មណ៍ស្រងេះស្រងោច ជាក់ជាមិនខាន បន្ទាប់ពីបានអានសារបង្ហាញ ពីអារម្មណ៍ក្តុកក្តុល នឹកឃើញពីគុណបំណាច់ របស់អ្នកមានគុណទាំងពីរ របស់លោក យ៉ែម សំអូន ដែលបានសរសេរ បង្ហោះរៀបរាប់ ពីប្រវត្តិយ៉ាងកំសត់របស់ខ្លួន រហូតធ្លាក់ខ្លួនជាកូនបំព្រា និងរស់នៅដោយភាពឯកាតែម្នាក់ឯង ខណៈប្រពន្ធ និងកូនក៏ឃ្លាតឆ្ងាយ ពីដើមទ្រូងដែរនោះ។
តារាសម្តែង និងជាប្រធានក្រុមដើរម៉ូដ លោក យ៉ែម សំអូន បានសរសេរភ្ជាប់ ជាមួយរូបថតប្រមាណ៥ឬ៦សន្លឹក គ្រាដែលខ្លួនធ្វើដំណើរ ទៅមើលចេតិយរបស់ឪពុកម្តាយលោក កាលពីពេលថ្មីៗនេះថា «ថ្ងៃនេះនៅក្នុងអារម្មណ៍របស់ខ្ញុំ ពិតជាឯកាពិបាកនឹងបរិយាយ នៅភាពក្ដុកក្ដួលហួសនឹងថ្លែង ពេលមកដល់កន្លែង ចេតិយ៍តម្កល់ធាតុ របស់លោកឪពុក អ្នកម្ដាយខ្ញុំ។ ពេលនេះខ្ញុំពិតជា យល់កាន់តែច្បាស់ នៅការបាត់បង់ និងការរស់នៅក្នុងនាម ជាកូនកំព្រា!»។
លោក យ៉ែម សំអូន បាននិយាយទៀតថា «មានរឿងរ៉ាវជាច្រើន ដែលកូនចង់ពិភាក្សា ចង់ស្ដាប់ការប្រៀនប្រដៅ និងចង់ឱបលោកអ្នកមានគុណ និងចង់ប្រាប់ពីភាពជោគជ័យ ព្រោះកាលមុនគ្រួសាយើងក្រពេក កូនចង់ឲ្យលោកបានហូប របស់ឆ្ងាញ់ៗ ប៉ុន្តែកូនគ្មានឱកាសទៀតនោះទេ អារម្មណ៍របស់កូនពេលនេះ ចង់ប្រាប់ថា កូននឹកលោកទាំងពីខ្លាំងណាស់។ ដូច្នេះមិត្តភក្តិ អ្នកនៅមានឱកាសតបស្នង លោកទាំងពីរ កុំមានការខ្មាស់អៀន គួរតែធ្វើឲ្យហើយ កុំស្ដាយក្រោយដូចខ្ញុំ!»។
បន្ទាប់ពីបានអានសារ ដ៏កំសត់របស់តារាសម្តែង លោក យ៉ែម សំអូន ដែលកន្លងមក ធ្លាប់ជួបជំពប់រឿងអាស្រូវ ប្រើហឹង្សាលើប្រពន្ធ រហូតអ្នកនាង យ៉ាន លីនដា រត់ចោល ទៅរស់នៅជាមួយឪពុកម្តាយ ឯនាយសមុទ្រ ប្រទេសអូស្រ្តាលីនេះហើយ បានធ្វើឲ្យទស្សនិកជន អ្នកគាំទ្រជាច្រើនបង្ហាញពីអារម្មណ៍ អាណិត និងផ្ញើសារលើកទឹកចិត្តជាច្រើន ចំពោះតារាប្រុសរូបនេះ ដើម្បីឲ្យមានការតស៊ូបន្ថែមទៀត ព្រោះជីវិតមនុស្សម្នាក់តែងតែជួបប្រទះ នូវវិបត្តិក្នុងចិត្តអ្វីមួយ គ្រាន់តែវិបត្តិនោះ មានលក្ខណៈខុសៗគ្នាប៉ុណ្ណោះ៕
ផ្តល់សិទ្ធដោយ ៖ ខ្មែរថកឃីង