(ភ្នំពេញ)៖ ថ្វីត្បិតតែ លោក យ៉ែម សំអូន បានចេញមុខបកស្រាយថា លោកគ្មានជម្លោះទាស់ទែងណាមួយ ជាមួយលោក អេឡិច ចាន់ត្រា ប៉ុន្តែប្រភពពីអ្នកសិល្បៈស្និទ្ធស្នាល នឹងលោក អេឡិច ចាន់ត្រា បាននិយាយខុសពីលោក យ៉ែម សំអូន ទាំងស្រុង ដោយបានអះអាងថា អ្នកទាំងពីរកំពុងតែព្យាយាមបិទបាំងជម្លោះ មើលមុខគ្នាមិនត្រង់នេះ។
អ្នកសិល្បៈដែលសិ្នទ្ធនឹង លោក អេឡិច ចាន់ត្រា បានទម្លាយប្រាប់ Khmertalking ថា លោក អេឡិច ចាន់ត្រា និងលោក យ៉ែម សំអូន មិនត្រូវរ៉ូវគ្នានោះទេ ហើយជាគូបដិបក្ខដ៏ធំទៀតផង ខណៈតារាចម្រៀងក្នុងក្រុមលោក យ៉ែម សំអូន ត្រូវបានលោក អេឡិច ចាន់ត្រា អូសទាញមកច្រៀងទាំងអស់ លើកលែងតែ អ្នកនាង ចន ច័ន្ទលក្ខិណា មួយ ដែលមិនបានចូលក្នុងក្រុម អេឡិច ចាន់ត្រា ហើយនៅខាង យ៉ែម សំអូន។
តារាសម្ដែងទាំងពីរ ប្រជែងយកទីផ្សារគ្នាទៅវិញទៅមក យ៉ាងក្ដៅគគុកតែម្ដង ប៉ុន្តែបើក្រឡេកមើលពីស្ថានភាពជាក់ស្ដែង លោក អេឡិច ចាន់ត្រា ហាក់មានប្រៀបជាងលោក យ៉ែម សំអូនច្រើន ដោយសារតែលោកចេញការងារ សឹងតែរាល់ថ្ងៃ។ ចំណែកឯ យ៉ែម សំអូន ស្ទើរតែស្ងាត់រឿងការងារតែម្ដង។ ប្រភពដដែលបាននិយាយថា ប្រសិន បើ យ៉ែម សំអូន មិនមានរឿងអាស្រូវជាមួយភរិយាជាទេ ម៉្លេះលោក អេឡិច គ្មានសំណាងបានឡើងកូដ រឿងការងារនេះទេ ព្រោះភរិយាលោកសំអូន ច្រៀងបទអង់គ្លេសបានល្អ ជាចំណុចខ្លាំងរបស់លោក ហើយលោកមិនចាំបាច់ចំណាយលុយ ជួលអ្នកចម្រៀងក្រៅមក ហើយលោកដឹងតែកើបលុយតែម្ដង។
ប៉ុន្តែភាពប្រកួតប្រជែង មិនត្រូវបានបញ្ចប់ទេ លោក យ៉ែម សំអូន បានព្យាយាមទំលាក់តំលៃក្រុមខ្លួនឲ្យថោកជាង អេឡិច ដើម្បីបានការងារធ្វើទៀតផង តែលោកហាក់មិនបានជោគជ័យច្រើនឡើយ ព្រោះពេលទំលាក់តំលៃខ្លាំងពេក លោកមិនអាចហៅអ្នកចម្រៀងល្អៗបានឡើយ។ ជាក់ស្ដែងពួកគេមិនចង់ច្រៀងឲ្យ យ៉ែម សំអូន ទៀតទេ ហើយក្រុម យ៉ែម សំអូន ឥឡូវ សល់តែតារាសម្ដែងប៉ុណ្ណោះ។
ថ្វីត្បិតតែរឿងមិនទាន់ដាច់ស្រេច តែអ្នកធ្លាប់ធ្វើការក្នុងក្រុមទាំងពីរ សុទ្ធតែដឹងពីជម្លោះស៊ីសាច់ហូតឈាមរវសងពួកគេទាំងពីរ។ តារាចម្រៀងខ្លះ សុខចិត្តច្រៀងឲ្យតែ អេឡិច តារាខ្លះសុខចិត្តនៅច្រៀងឲ្យតែ យ៉ែម សំអូន ព្រោះតែការធ្លាប់រាប់អានគ្នា និងមិនចង់ឲ្យមើលមុខគ្នា មិនត្រង់។
តារាសម្ដែងទាំងពីរ Khmertalking មិនអាចសុំការបំភ្លឺបានទេ ពីជំលោះដ៏ក្ដៅគគុកមួយនេះ ខណៈពួកគេព្យាយាមបិទបាំង មហាជនថា ពួកគេគ្មានជម្លោះនឹងគ្នាទេ៕
ផ្តល់សិទ្ធដោយ ៖ ខ្មែរថកឃីង