CamNews

(ភ្នំពេញ)៖ ពិធីបុណ្យខួបគំរប់៧ថ្ងៃ និង១០០ថ្ងៃរបស់សពអតីតតារាច្រៀង និងសម្តែង​ខ្មែរពីររូប គឺ​អ្នកស្រី ហួត សារ៉ាវឌី និងលោក រាជ បូរី កាលពីល្ងាចថ្ងៃទី២១​ ខែមេសាឆ្នាំ២០១៦​ម្សិលមិញ​ គេសង្កេតឃើញមានវត្តមាន ចូលរួមពីសំណាក់សិល្បករ-សិល្បការិនីជាច្រើន ទោះបីជាពិធីបុណ្យរបស់តារាប្រុស-ស្រីទាំងពីរខាងលើ ធ្វើឡើងស្រប​ពេលតែ​មួយ​និ​ង មានទីតាំងផ្សេងក៏ពិតមែននោះ។

សម្រាប់ពិធីបុណ្យ​​ខួបគំរប់៧ និង១០០ថ្ងៃរបស់តារាសម្តែង និងចម្រៀងអ្នកនាង ហួត សារ៉ាវឌី កាលពីថ្ងៃព្រហស្បតិ៍ទី២១ ខែមេសា ឆ្នាំ២០១៦ម្សិលមិញ គឺបានប្រព្រឹត្តធ្វើ​ឡើង​នៅទីតាំង បរិវេ​ណ​វត្ត​ចាក់អង្រែលើ​។ នៅក្នុងពិធីបុណ្យសពអ្នកស្រី ហួត សារ៉ាវឌី នេះដែរ​ក៏មានវត្តមានភ្ញៀវ​​ ចូលរួមពីសំណាក់បងប្អូន ញាតិមិត្តនិង​សិល្បករខ្មែរ មួយចំនួនផងដែរ។

ជាមួយគ្នានេះ កូនស្រីរបស់សពតារាសម្ដែង ហួត សារ៉ាវឌី កញ្ញា អ៊ែល សារាចាន់ បានសរសេរនៅក្នុងបណ្ដាញសង្គម Facebook ផ្ទាល់របស់ខ្លួន ដោយបានធ្វើការថ្លែងអំណរគុណ យ៉ាងជ្រាលជ្រៅ ដល់សិល្បករ-សិល្បការិនី ទាំងអស់ដែលបានចំណាយពេលវេលា ដ៏មានតម្លៃ ដើម្បីមកចូលរួមរំលែកទុក្ខ ដ៏ក្រៀមក្រំ ចំពោះក្រុមគ្រួសារសពនៅពេលនេះ។ យ៉ាងណាមិញ កូនស្រីរបស់សព អ្នកស្រី ហួត សារ៉ាវឌី ក៏បានទទូចដល់សមត្ថកិច្ច ខេត្តព្រៃវែង ជួយស៊ើបអង្កេតករណី ស្លាប់ម្ដាយរបស់ខ្លួននេះឡើងវិញ ព្រោះការស្លាប់នេះស្ថិតនៅក្នុងការសង្ស័យ និងបង្កប់ភាពមិនប្រក្រតីច្រើន នៅក្នុងនោះ ដែលក្រុមគ្រួសារសពនៅតែមិនទាន់អស់ចិត្ត។

អ្នកស្រី ​ហួត សា​រ៉ាវ​ឌី បានទទួលមរណភាព កាលពីថ្ងៃទី១៤ខែមេសា​ ឆ្នាំ២០១៦​ដោ​យហេតុការណ៍គ្រោះ​ថ្នាក់ ចរាចរណ៍អំឡុងពេលធ្វើដំណើរ ទៅលេងស្រុកកំណើ​តនៅឯខេត្តព្រៃវែង បណ្តាលឲ្យស្លាប់ភ្លាមៗនៅកន្លែង។ ចំណែកអ្នករួមដំណើរ ដែលបើកបរម៉ូតូម្នាក់ទៀត ត្រូវបានស្លាប់ក្រោយពេលបញ្ជូលដល់មន្ទីពេទ្យ។​

ដោយឡែក សម្រាប់ពិធីបុណ្យ​ខួបគំរប់៧ថ្ងៃ សពអតីតារាចម្រៀង-សម្តែង ប្រុសប្រចាំផលិ​តកម្ម​​ក្លាស៊ីក លោក រាជ បូរី កាលពីល្ងាចម្សិលមិញ ធ្វើឡើងក្នុងវត្តចាកអង្រែក្រោម ក៏មិនខុសគ្នាប៉ុន្មាន​នឹង​ពិធី​បុ​ណ្យ របស់អ្នកស្រី ​ហួត សា​រ៉ាវ​ឌី ដែរ ព្រោះគេកត់សម្គាល់ឃើញថា មានវត្តមានតារាប្រុស-ស្រី​របស់ខ្មែរជាច្រើនរូប បាននាំគ្នាទៅចូលរួម។

គួររំឭកថា លោក ​រាជ បុរី បានទទួលមរណភាព កាលពី​ថ្ងៃ​ទី​១៦ ខែមេ​សា ឆ្នាំ២០១៦​ដោយ​សារហេតុការណ៍គ្រោះថ្នាក់​ ក្រឡាប់​រថយន្ត​នៅ​ប៉ោយ​ប៉ែ​ត បន្ទា​ប់ពីរូបលោក និងតារាប្រុស-ស្រីប្រមាណ៣នាក់ផ្សេងទៀត ធ្វើដំណើរត្រឡប់​មកពីកន្សាន្ត ក្នុងឱកាសបុណ្យចូលឆ្នាំថ្មី នៅ​ប្រ​ទេ​សថៃ៕