ថៃ ឈរកំពូលតារាងមេដាយនៅ Asian Beach Games ខណៈកម្ពុជាទើបរកបាន ២គ្រឿង
(ភ្នំពេញ)៖ ការប្រកួតកីឡាឆ្នេរខ្សាច់ជើងឯកអាស៊ី ឬ Asian Beach Games លើកទី៥ ដែលធ្វើឡើងនៅទីក្រុងដាណាំង ប្រទេសវៀតណាម បានឆ្លងផុត ៣ថ្ងៃមកហើយ ដោយក្រុមអត្តពលិកមកពីថៃ ដណ្ដើមបានមេដាយមាសច្រើនជាងគេ និងឈរកំពូលតារាងមេដាយជាបណ្ដោះអាសន្ន តែក្រុមអត្តពលិកកម្ពុជា គឺទើបដណ្ដើមបានមេដាយសំរឹទ្ធ ២គ្រឿងប៉ុណ្ណោះ ដែលរកបានដោយក្រុមកីឡាប៉េតង់។
សម្រាប់ក្រុមអត្ដពលិកថៃ ដែលកំពុងឈរកំពូលតារាងមេដាយពេលនេះ គឺរកបានមេដាយសរុប ៣៤គ្រឿង ក្នុងនោះមានមេដាយមាស១៥ ប្រាក់៨ និងសំរឹទ្ធ១១ ហើយតាមពីក្រោយដោយក្រុមអត្តពលិកម្ចាស់ផ្ទះវៀតណាម ដែលរកបានមេដាយសរុប ៣៩គ្រឿង តែមានមេដាយមាស៩ ប្រាក់១២ និងសំរឹទ្ធ១៨។ ចំណែកចិន ឈរលេខ៣ មានមេដាយសរុប១៨គ្រឿង គឺមេដាយមាស៥ ប្រាក់៥ និងសំរឹទ្ធ៨។
ដោយឡែកកម្ពុជាវិញ ទើបរកបានមេដាយសំរឹទ្ធ ២គ្រឿង ដែលដណ្ដើមបានដោយក្រុមកីឡាករ-កីឡាការិនីផ្នែកកីឡាប៉េតង់កាលពីម្សិលមិញ។ មេដាយសំរឹទ្ធបើកឆាករបស់កម្ពុជានេះ គឺរកបានលើវិញ្ញាសាវាយគូបុរស ក្រោយប្រកួតចាញ់ក្រុមកីឡាករថៃ និងម៉ាឡេស៊ី ដោយលទ្ធផល ៧-១៣ ក្នុងវគ្គពាក់កណ្ដាលផ្ដាច់ព្រ័ត្រ និងវិញ្ញាសាវាយគូនារី ក្រោយចាញ់ក្រុមថៃ ២-១២ ក្នុងវគ្គពាក់កណ្ដាលផ្ដាច់ព្រ័ត្រដូចគ្នា។
គួរបញ្ជាក់ថា ព្រឹត្តិការណ៍កីឡាឆ្នេរខ្សាច់អាស៊ី ប្រចាំឆ្នាំ២០១៦ នៅទីក្រុងដាណាំង ប្រទេសវៀតណាមនេះ គឺចាប់ផ្ដើមប្រកួតតាំងពីថ្ងៃទី២៤ ខែកញ្ញាមកម្ល៉េះ ហើយគ្រោងនឹងបញ្ចប់នៅថ្ងៃទី០៣ ខែតុលាខាងមុខ ដោយកម្ពុជា បានបញ្ជូនកីឡា៥ ប្រភេទទៅចូលរួម ក្នុងនោះមានប្រភេទកីឡាវ៉ូវីណាម ចំបាប់ បាល់ទះឆ្នេរខ្សាច់ ប៉េតង់លើខ្សាច់ និងកីឡាល្បុក្កតោ៕
ផ្តល់សិទ្ធដោយ ៖ ខ្មែរថកឃីង
- កម្ពុជា ដណ្ដើមបានមេដាយ ២១គ្រឿង និងជាប់លេខ៦ នៃ Asian Beach Games នៅវៀតណាម (04/10/2016 14:51:00)
- កម្ពុជាដណ្ដើមបានមេដាយ ២១វិញ្ញាសា និងជាប់លេខ៦ នៃ Asian Beach Games នៅវៀតណាម (04/10/2016 09:10:00)
- ជយោ! កម្ពុជារកបានមេដាយមាស ៣គ្រឿងបន្ថែមទៀតពី Asian Beach Games នៅវៀតណាម (01/10/2016 11:57:00)
កីឡា ដែលមើលច្រើន
