អតីតកីឡាករប្រដាល់ អេ ភូថង ទទួលបានកាដូ ផ្ទះមួយល្វែងពីលោកស្រី ហ៊ុន ម៉ាណា
(ភ្នំពេញ)៖ អតីតកីឡាករប្រដាល់ល្បីដែលមានរហស្សនាមថា «កែងឆេះ» លោក អេ ភូថង ទទួលបានកាដូជាផ្ទះមួយល្វែងពីលោកស្រី ហ៊ុន ម៉ាណា អគ្គនាយកទូរទស្សន៍បាយ័ននាពេលថ្មីៗនេះ ក្រោយពេលចូលប្រឡូកក្នុងវិស័យឈឺសាច់ជាង២០ឆ្នាំមកនេះ ពុំទាន់មានផ្ទះរស់នៅសមរម្យនឹងគេ ។
នៅចាំបានថា អ្នកស្រី សុម៉ាលី ភរិយាលោក អេ ភូថង ធ្លាប់បានប្រាប់គេហទំព័រ Khmertalking កាលពីដើមឆ្នាំ២០១៦ នេះទាក់ទងនឹងការរើចេញពីស្តាតចាស់ ដែលជាទីកន្លែងក្រុមគ្រួសារស្នាក់អាស្រ័យ បូករួមទាំងជីវភាពខ្វះខាតពេកនោះ ពុំបានធ្វើឲ្យពួកគាត់មានលទ្ធភាពទិញផ្ទះបានឡើយ និងបន្តស្នាក់នៅផ្ទះជួលជាបន្តទៀត ។
តែយ៉ាងណាក៏ដោយ ដំណឹងនេះក៏បានជ្រួតជ្រាបលេចឮទៅដល់លោកស្រី ហ៊ុន ម៉ាណា ដែលជាអគ្គនាយកប៉ុស្តិ៍ ទូរទស្សន៍បាយ័ន លោកស្រី ក៏សម្រេចផ្តល់ផ្ទះមួយល្វែងនៅម្តុំរង្វង់មូលចោមចៅ ស្ថិតនៅក្នុងបុរីសន្តិភាព២ តាមរយៈ ឧកញ៉ា ប៉ែន កាក់ ប្រគល់ជូនក្រុមគ្រួសារលោក អេ ភូថង នាថ្ងៃទី២៣ ខែឧសភា ឆ្នាំ២០១៦ ។
ថ្វីត្បិតតែបច្ចុប្បន្នលោក អេ ភូថង បានចូលនិវត្តន៍ពីអាជីពជាកីឡាករប្រដាល់ក៏ពិតមែន ប៉ុន្តែរូបលោកនៅតែធ្វើជាអាជ្ញាកណ្តាល និងចៅក្រមដាក់ពិន្ទុដដែល ដើម្បីបានប្រាក់ផ្គត់ផ្គង់ជីវភាពគ្រួសារ និងបង្វឹកកូនសិស្សមួយចំនួនផងដែរ ៕
ផ្តល់សិទ្ធដោយ ៖ ខ្មែរថកឃីង
កីឡាជាតិ ដែលមើលច្រើន
