កៅអីកំពូលតារាងនៃ C-League បន្ដភាពតានតឹង ក្រោយបឹងកេតលត់ប៉ូលិស ៧-១
(ភ្នំពេញ)៖ ឈានមកដល់សប្ដាហ៍ទី៧ នៃលីគកំពូលកម្ពុជា (C-League) តារាងចំណាត់ថ្នាក់បណ្ដោះអាសន្ន មានការប្រែប្រួលបន្ដិចបន្ទួច ប៉ុន្ដែកៅអីកំពូលតារាង នៅតែតានតឹងដដែល ក្រោយក្រុមក្រសួងការពារជាតិ និងក្រុមបឹងកេតអង្គរ រកបាន ៣ពិន្ទុបន្ថែម ពីការប្រកួតចុងសប្ដាហ៍កន្លងទៅ ពិសេសគឺក្រោយពេលបឹងកេត លក់ក្រុមអគ្គស្នងការដ្ឋាននគរបាលជាតិ (ប៉ូលិស) ៧-១ ម្សិលមិញតែម្ដង ។
ធ្លាប់តែជាគូប្រជែងដ៏សំខាន់លើទីលានមុនរកឈ្នះចាញ់ឃើញ ប៉ុន្ដែម្សិលមិញ ក្រុមបឹងកេតអង្គរ បានយកឈ្នះក្រុមប៉ូលិស យ៉ាងងាយក្នុងជំនួបជើងទី១ នៃ C-League ឆ្នាំ២០១៦នេះ ។ គ្រាប់បាល់ជ័យជម្នះទាំង ៧គ្រាប់ក្រុមបឹងកេត គឺរកបានដោយកីឡាករ ឃួន ឡាបូរ៉ាវី ៤គ្រាប់ ខណៈកីឡាករ ចាន់ វឌ្ឍនាកា ធ្វើបានសម្រេច ២គ្រាប់ និងមិត្តរួមក្រុមកីឡាករ Bata រកបាន ១គ្រាប់ ។
ដោយឡែកក្រុមកំពុងឡើងជើងក្រសួងការពារជាតិ ដែលធ្លាប់តែយកឈ្នះក្រុមខ្លាំងៗ មិនទុកមុខនោះ កាលពីថ្ងៃសៅរ៍កន្លងទៅ បានយកឈ្នះក្រុមអាស៊ីអឺរ៉ុប ដោយលទ្ធផល ២-១ ទាំងលំបាកលើទឹកដីស្ដាតចាស់របស់ក្រសួងការពារជាតិ ដែលធ្វើសម្រេចដោយ កីឡាករ Kim Kyong Hun ១គ្រាប់ និងកីឡាករ Choe Myong Ho ១គ្រាប់ ខណៈ ១គ្រាប់របស់អាស៊ីអឺរ៉ុប រកបានដោយកីឡាករ បញ្ញា ។
ប៉ុន្ដែជ័យជម្នះខាងលើនេះ បានធ្វើក្រុមក្រសួងការពារជាតិ និងបឹងកេតអង្គរ រកបាន ១៨ពិន្ទុស្មើគ្នា ក្រោយឆ្លងផុត ៧ប្រកួតកន្លងមកដែលធ្លាប់ឈ្នះ ៦ប្រកួត និងចាញ់ ១ប្រកួតនោះ ។ ប៉ុន្ដែដោយសារក្រុមបឹងកេតអង្គរ ធ្លាប់ប្រកួតចាញ់ក្រុមក្រសួងការពារជាតិ ដូច្នេះក្រុមនេះក៏ដណ្ដើមបានកៅអីកំពូលតារាងជាបណ្ដោះអាសន្នឯក្រុមបឹងកេត នៅតែរក្សាចំណាត់ថ្នាក់លេខ២ បើទោះបីមានគ្រាប់បាល់ចំណេញច្រើនជាងក៏ដោយ ។
ចំណែកលទ្ធផល ៣ប្រកួតផ្សេងទៀត រួមមានក្រុមព្រះខ័នរាជស្វាយរៀង បានប្រកួតចាញ់ក្រុមភ្នំពេញក្រោន ទាំងមិនអស់ចិត្ត ដោយលទ្ធផល ១-០ ។ គ្រូបង្វឹកក្រុមព្រះខ័នរាជស្វាយរៀងលោក សំ វ៉ាន់ដេត បាននិយាយថា ការប្រកួតនេះបានធ្វើឡើង ២ថ្ងៃក្រោយក្រុមលោកប្រកួតពាន Hun Sen Cup រដូវកាលថ្មីនេះ ដូច្នេះកូនក្រុមលោកគ្មានកម្លាំងគ្រប់គ្រាន់ ដើម្បីប្រកួតឡើយ ។
រីឯក្រុមណាហ្គាវើល និងក្រុម Cambodian Tiger បានទទួលម្នាក់ ១ពិន្ទុរៀងៗខ្លួន ក្រោយបញ្ចប់ការប្រកួតដោយលទ្ធផលស្មើគ្នា ១-១ នៅលើទីលានពហុកីឡដ្ឋានជាតិម្សិលមិញ ។ លទ្ធផលនេះបានធ្វើឲ្យក្រុមណាហ្គាវើល ឈរលេខរៀងទី៤ ជាបណ្ដោះអាសន្ន តែក្រុម Cambodian Tiger បានធ្លាក់មកចំណាត់ថ្នាក់លេខ៦ ។ រីឯក្រុមមជ្ឈមណ្ឌលកំចាត់មីនកម្ពុជា បានយកឈ្នះក្រុមវេស្ទើន ៤-២ ដើម្បីចៀសផុតពីតំបន់គ្រោះថ្នាក់នៃបាតតារាង ៕
ផ្តល់សិទ្ធដោយ ៖ ខ្មែរថកឃីង
កីឡាជាតិ ដែលមើលច្រើន
