Vardy ខកខានជួយអង់គ្លេស ប៉ះអូស្រ្តាលី ដោយសារចំថ្ងៃរៀបមង្គលការរបស់ខ្លួន
(ក្រុងឡុងដ៍)៖ កីឡាករខ្សែប្រយុទ្ធជួរមុខ Jamie Vardy មកពីក្លឹបកញ្ជ្រោង Leicester City ខកខានជួយក្រុមជម្រើសជាតិអង់គ្លេស ១ប្រកួតពេលប៉ះក្រុមជម្រើសជាតិអូស្រា្តលីក្នុងមិត្តភាពអន្តរជាតិ នៅរាត្រីថ្ងៃសុក្រសប្តាហ៍នេះ ដោយសារ តែថ្ងៃរៀបមង្គលការរបស់ខ្លួន ។
កីឡាករដែលរកបានគ្រាប់ជ័យជំនះ ពេលឈ្នះក្រុមភ្ញៀវតួកគី ២-១ ក្នុងមិត្តភាពយប់មិញនេះនឹងខកខាន ១ប្រកួតដំបូង របស់អង់គ្លេស ក្រោយចាប់ផ្តើមចូលលេងបាន៣ប្រកួតមកនេះ ដោយសារតែចំថ្ងៃរៀបមង្គលការរវាងកីឡាករវ័យ២៩ឆ្នាំ ដែលបានពន្យារពេលរៀបការ១ឆ្នាំមកហើយ ។
ទន្ទឹមគ្នានោះដែរគ្រូបង្វឹកអង់គ្លេសលោក Roy Hodgson ក៏បានថ្លែងប្រាប់ BBC ដែរថា «វាដល់ពេលហើយសម្រាប់ Vardy ដែលត្រូវចូលរោងការ មុន២ថ្ងៃដែលអង់គ្លេស ត្រូវប៉ះក្រុមមកពីទ្វីបអាស៊ីអូស្រ្តាលី ដែលជាប្រកួតសំខាន់លើកទី២ មុនទៅលេង Euro 2016 នៅបារាំង» ។
លោក Hodgson បានបន្តថា «ខ្ញុំមិនគិតថា កន្លែងរបស់គាត់ក្នុងក្រុមជម្រើសជាតិខ្វះចន្លោះឡើយ ដោយយើងត្រូវតែ សំឡឹងរកកីឡាករណាផ្សេងទៀត ដើម្បីជំនួស» ។
សម្រាប់កីឡាករដែលស៊ុតបញ្ចូលទីបាន២៤គ្រាប់ ជួយក្រុម Leicester City ឈ្នះពាន Premier League រដូវកាលឆ្នាំ ២០១៥-២០១៦ នេះក៏បានបញ្ជាក់ផងដែរថា រូបគេនឹងចូលហ្វឹកក្នុងក្រុមជម្រើសជាតិអង់គ្លេសភ្លាមៗ ក្រោយពីរៀបមង្គលការរួច ពោលគឺនៅមុនប៉ះជម្រើសជាតិព័រទុយហ្គាល់ ថ្ងៃទី២ មិថុនា នៅកីឡដ្ឋាន Wembley និងធ្វើដំណើរទៅបារាំងរួមគ្នាថ្ងៃទី៥ មិថុនា ៕
ផ្តល់សិទ្ធដោយ ៖ ខ្មែរថកឃីង
កីឡាអន្តរជាតិ ដែលមើលច្រើន
