លោក សំ វ៉ាន់ដេត បន្ទោស FFC ធ្ងន់ៗ ក្រោយចាញ់ភ្នំពេញក្រោន ១-០ យប់មិញ
(ភ្នំពេញ)៖ ក្រុមព្រះខ័នរាជស្វាយរៀង បានរងបរាជ័យលើកទី២ ក្នុងការប្រកួតលីគកំពូលកម្ពុជា ក្រោយប្រកួតចាញ់ក្រុមម្ចាស់ផ្ទះភ្នំពេញក្រោន ១-០ កាលពីយប់មិញ ។ ប៉ុន្ដែការបរាជ័យនេះ លោក សំ វ៉ាន់ដេត គ្រូបង្វឹកក្រុមព្រះខ័នរាជស្វាយរៀង មិនបានបន្ទោសកូនក្រុមខ្លួនឡើយ តែលោកបានបន្ទោសធ្ងន់ៗ លើសហព័ន្ធកីឡាបាល់ទាត់កម្ពុជា (FFC) ដែលរៀបចំកម្មវិធីប្រកួត ៣ថ្ងៃមាន២ប្រកួត ។
លោក សំ វ៉ាន់ដេត បានលើកឡើងថា កូនក្រុមរបស់លោក ទើបតែបញ្ចប់ការប្រកួតជម្រុះពានរង្វាន់ Hun Sen Cup កាលពីថ្ងៃពុធ ទី៤ ខែឧសភាកន្លងទៅ ប៉ុន្ដែរំលងតែ ២ថ្ងៃក្រោយមក គឺថ្ងៃទី៦ ខែឧសភានេះ កូនក្រុមលោកត្រូវធ្វើការប្រកួតក្នុងលីគវិញម្ដង ដូច្នេះកម្លាំងពួកគេមានបញ្ហា មិនអាចធ្វើបានល្អ នៅក្នុងការប្រកួតជាមួយក្រុមភ្នំពេញក្រោនេះឡើយ ។
លោកនិយាយថា «ប្រកួតនេះកូនក្រុមខ្ញុំធ្វើបានល្អក្នុងរយៈពេល ៧០នាទី ប៉ុន្ដែ ២០នាទីចុងក្រោយ គឺយើងមានបញ្ហាកម្លាំង ។ ពួកយើងទើបធ្វើការប្រកួតថ្ងៃពុធ តែកម្មវិធីតម្រូវឲ្យយើងប្រកួតថ្ងៃសុក្រនេះទៀត នេះជារឿងមួយ ដែលកូនក្រុមខ្ញុំសម្រាកមិនគ្រប់គ្រាន់ ។ ដូច្នេះខ្ញុំស្អប់លើការរៀបចំកម្មវិធីប្រកួតរបស់សហព័ន្ធ Game ថ្ងៃនេះចាញ់ដោយសារសហព័ន្ធអ្នករៀបចំ» ។
គួរបញ្ជាក់ផងដែរថា នេះជាការបរាជ័យលើកទី២ របស់ក្រុមព្រះខ័នរាជស្វាយរៀង បន្ទាប់ពីចាញ់ក្រុមក្រសួងការពារជាតិ ៥-១ កាលពីសប្ដាហ៍មុន ហើយការបរាជ័យនេះដែរ បានធ្វើឲ្យក្រុមរក្សា ១២ពិន្ទុក្នុងដៃ ឈរលេខរៀងទី៣ ក្នុងតារាងបណ្ដោះអាសន្នដដែល ។ ខណៈក្រុមការពារតំណែងជើងឯកភ្នំពេញក្រោន ទើបរកបាន ១១ពិន្ទុប៉ុណ្ណោះ ក្រោយឆ្លងកាត់ ៧ប្រកួត ឈ្នះ៣ ចាញ់២ និងស្មើ ២ដងនោះ ៕
ក្រុមព្រះខ័នរាជស្វាយរៀង ឯកសណ្ឋានពណ៌ខៀវ និងភ្នំពេញក្រោន ពណ៌ក្រហម
ផ្តល់សិទ្ធដោយ ៖ ខ្មែរថកឃីង
កីឡាអន្តរជាតិ ដែលមើលច្រើន
