តារាឯករបស់អាល្លឹម៉ង់ Leroy Sane ជិតផ្លាស់មកលេងឲ្យ Man City ហើយ ក្នុងតម្លៃខ្លួន ៣៧លានផោន
(មេនឆេស្ទើ)៖ កីឡាករលេចធ្លោក្នុង Euro 2016 របស់ក្រុមជម្រើសជាតិអាល្លឺម៉ង់ Leroy Sane កាន់តែប្រកៀកក្នុងការផ្លាស់មកលេងឲ្យក្លឹបថ្មី Manchester City របស់អង់គ្លេស ក្រោមតម្លៃពលកម្មគួរសមដែរ គឺ ៣៧លានផោន ពីក្លឹប អាល្លឺម៉ង់ Schalke របស់អាល្លឹម៉ង់។
សារព័ត៌មាន BBC បានផ្សាយឲ្យដឹងថា ក្លឹបលេងនៅ Bundesliga របស់អាល្លឹម៉ង់ Schalke បានជូនដំណឹងអំពីការចាកចេញរបស់ Sane ដោយពុំបានចូលរួមហ្វឹកហាត់ជាមួយក្រុម ត្រៀមប្រយុទ្ធបើករដូវកាលថ្មីឡើយ ហើយក៏មិន បានរួមដំណើរទៅប្រកួតមិត្តភាពអន្តរជាតិនៅប្រទេសអូទ្រីស ជាមួយមិត្តរួមក្រុមផងដែរ បន្ទាប់ពីអតីតគ្រូបង្វឹកក្លឹប Bayern Munich លោក Pep Guardiola បានប្រកាសកាលពីថ្ងៃទី២១ ខែកក្កដាថា នឹងចុះហត្ថលេខានាំយក Sane នាពេលខាងមុខនោះ។
កីឡាករវ័យទើបតែ២០ឆ្នាំ Leroy Sane ជួយឲ្យក្រុមឥន្រ្ទីដែកអាល្លឺម៉ង់ ឆ្លងចូលវគ្គពាក់កណ្តាលផ្តាច់ព្រ័ត្រនៃ ព្រឹត្តិការណ៍ UEFA Euro 2016 នៅប្រទេសបារាំង មុនពេលចាញ់ម្ចាស់ផ្ទះមាន់គកបារាំង ២-០ គ្រាដែលរូបគេ ទើបតែបានចូលលេងក្នុងក្រុមជម្រើសជាតិកាលពីខែវិច្ឆិកា ឆ្នាំ២០១៥ មកប៉ុណ្ណោះ។
តាមពិតទៅ Sane ជាកីឡាករចេញពីឈុតយុវជនរបស់ក្លឹប Schalke និងត្រូវបានកោះហៅឲ្យចូលលេងក្នុងឈុតធំ កាលពីខែមេសា ឆ្នាំ២០១៤ និងស៊ុតបញ្ចូលទីបាន៨គ្រាប់ ពីការចូលលេងបាន៣៣ប្រកួត ក្នុង Bundesliga កាលពី រដូវកាលមុននេះ ដោយ Schalke បញ្ចប់ទៅដោយចំណាត់ថ្នាក់លេខ៥ ប៉ុណ្ណោះ ដោយពុំមានឈ្មោះក្នុងវគ្គជម្រុះ Champions League ឡើយ៕
ផ្តល់សិទ្ធដោយ ៖ ខ្មែរថកឃីង
កីឡាអន្តរជាតិ ដែលមើលច្រើន
