CamNews

សម្រាប់ជនល្មើសភាគច្រើន ការចុះផ្សាយរូបថតដើម្បីតាមចាប់ខ្លួនពីសំណាក់នគរបាល នឹងនាំ
ឱ្យពួកគេឆាប់គេចខ្លួនពួនអត្មា  ពួកគេត្រូវតែជៀសក្រុមសមត្ថកិច្ច។ ក៏ប៉ុន្តែ ក៏មានជនល្មើសខ្លះ
បានធ្វើផ្ទុយពីនេះ។

ជនល្មើសក្នុងករណីនេះ ថែមទាំងហ៊ានចូល comment លើសេចក្ដីប្រកាសតាមចាប់ខ្លួន ដែល
ត្រូវបានចុះផ្សាយនៅលើទំព័រ Facebook របស់នគរបាលព្រោះយល់ថា រូបថតរបស់ខ្លួនដែល
នគរបាល បានចុះផ្សាយនោះ វាអាក្រក់ខ្លាំងពេក។

រឿងរ៉ាវខាងលើនេះ កើតឡើងនៅក្នុងរដ្ឋ Victoria ប្រទេសអូស្ត្រាលី។ នគរបាល បានចុះផ្សាយ
សេចក្ដីប្រកាស តាមចាប់ខ្លួនជនល្មើសម្នាក់​ ដែលមានឈ្មោះថា Danny Damon ដោយសារ
បានបំពានច្បាប់ចរាចរណ៍ និងមានជាប់ទាក់ទិននឹងបញ្ហាគ្រឿងញៀន។ នៅពេលនគរបាល
កំពុងស្រាវជ្រាវតាមចាប់ខ្លួន ស្រាប់តែ Danny Damon លេចមុខលើ Facebook ហើយចូល
comment ទៅលើសេចក្ដីប្រកាសតាមចាប់ខ្លួនរបស់នគរបាល តំបន់ ​Victoria។

ជនល្មើសបានសរសេរថា​៖ "អស់លោក អាចប្រើប្រាស់រូបថតស្អាតជាងនេះ។ រូបនេះមើលទៅ
វាអាក្រក់ខ្លាំងណាស់"។ បុគ្គលិកនគរបាល ក៏ប្រញាប់តបវិញ ៖ "សួស្ដី Daniel សូមអញ្ជើញមក កាន់ការិយាល័យនគរបាលដែលនៅជិតបំផុត ហើយយើងនឹងជួយថតរូបថ្មី"។ ជនល្មើស ហាក់
មិនមានការភ័យខ្លាច នៅពេល comment បន្ត ៖ "ខ្ញុំក៏មានបំណងធ្វើដូច្នេះដែរ បន្ទាប់ពីទិញ
របស់របរមួយចំនួន។​ សូមត្រៀមមេធាវីម្នាក់ឱ្យខ្ញុំ និងត្រៀមអ្វីៗគ្រប់យ៉ាង"។

ថ្វីបើ Danny Damon មិនទាន់ត្រូវបាននគរបាលចាប់បានភ្លាមៗ ប៉ុន្តែ ការចូល comment របស់
ជននេះ ក្នុងទំពរ Facebook បានជួយឱ្យនគរបាល កំណត់បានទីតាំងដែលជននេះកំពុងលាក់
ខ្លួន។ ជននេះ អាចនៅក្នុងតំបន់ Melbourne ឬ Bendigo។ ក្រុមនគរបាលកំពុងអំពាវនាវ​ដល់
សាធារណជន ឱ្យជួយផ្ដល់ព័ត៌មាន ប្រសិនដឹងថា​ ជនល្មើសនៅទីណាពិតប្រាកដ៕

ប្រែសម្រួលដោយ ៖ តារា
ប្រភព ៖ Mashable/Metro