CamNews

រថភ្លើង​ដឹកអ្នកដំណើរ​ពីរ​ខ្សែបានបុកគ្នា​ នៅតំបន់​ Puglia, ភាគខាងត្បូង​ប្រទេស​អ៊ីតាលី បណ្ដាល​
ឱ្យមានមនុស្សស្លាប់យ៉ាងតិច ២២នាក់។

គេហទំព័រ Reuters បានចុះផ្សាយ​ថា ករណីខាងលើនេះ បានកើតឡើងនៅ​វេលាម៉ោងប្រហែល
១១កន្លះ នៅឯផ្លូវដែក​ចន្លោះ​ក្រុង Corato និង Andria ក្នុងតំបន់ Puglia ភាគខាងត្បូងប្រទេស
​អ៊ីតាលី។ ផ្លូវដែកនេះ ត្រូវបានគ្រប់គ្រងដោយក្រុមហ៊ុន​ Ferrotramviaria ។

Giuseppe Corrado ដែលជាមន្ត្រី​មានសមត្ថកិច្ច​ម្នាក់​ ឱ្យដឹងថា “ចំនួនមនុស្សស្លាប់ បានកើនឡើង
ដល់ ២២នាក់”។ មន្ត្រីរូបនេះ បន្តថា​ អ្នក​រង​របួស​ក្នុងករណី​នេះ​ មានចំនួនជាង ៣០នាក់។ Giuseppe
Corrado ក៏បានអំពាវ​នាវ​ សូមឱ្យ​ប្រជាជនក្នុងតំបន់ ទៅបរិចាគ​ឈាម ដើម្បីសង្គ្រោះជីវិត​ជនរង
គ្រោះផងដែរ។

Luca Cari អ្នកនាំពាក្យ​របស់​កងកម្លាំង​ពន្លឺអគ្គិភ័យ ឱ្យដឹងថា ការចូលទៅជួយជនរងគ្រោះ ជួប​ការ
លំបាក ដោយសារ​តែ​រថភ្លើង​បុកគ្នា​ នៅតំបន់ជនបទ។

បច្ចុប្បន្ន គេមិនទាន់ដឹង​ថា រថភ្លើងបុកគ្នា​នេះ បណ្ដាលមកពីមូលហេតុអ្វីនៅឡើយ។ ក្រសួង​ដឹក
ជញ្ជូន​អ៊ីតាលី បានប្រកាស​ថា បានបញ្ជូន​អ្នកស៊ើប​អង្កេត​ពីរនាក់ ទៅកាន់កន្លែងកើត​ហេតុ។

នាយករដ្ឋមន្ត្រីអ៊ីតាលី Matteo Renzi បាន​ថ្លែងទៅកាន់​អ្នកកាសែត​ថា “យើង​នៅតែរង់ចាំ រហូត​ដល់
មាន​ចម្លើយ​ពិតប្រាកដអំពីគ្រោះថ្នាក់ដែលបានកើតឡើង”។ នាយករដ្ឋមន្ត្រីអ៊ីតាលី បាន​ត្រឡប់ពី
ទស្សនកិច្ច​តំបន់ Milan ដើម្បី​ធ្វើដំណើរទៅកាន់ក្រុង Rome បន្ទាប់មកនឹង​ទៅ​កាន់ Puglia នៅថ្ងៃនេះ
ដើម្បីពិនិត្យ​ហេតុការណ៍។

គួរំលឹកថា កាលពីឆ្នាំ ២០០៩ ក៏មានគ្រោះថ្នាក់​រថភ្លើង​មួយ​ករណីផងដែរ ដែលពេលនោះ រថភ្លើង​
ដឹកទំនិញមួយខ្សែ បាន​រត់​ខុស​ផ្លូវដែក នៅ​តំបន់ភាគកណ្ដាលអ៊ីតាលី បណ្ដាលឱ្យ​មនុស្ស​ ៣០នាក់
ដែលរស់នៅក្បែរ​ផ្លូវដែក បាត់បង់ជីវិត​។

ប្រែសម្រួល ៖ បុត្រា