CamNews

ភ្នំពេញៈ តារាចម្រៀងមានទឹកដម សំឡេងពីរោះរណ្តំ ចិត្តក្រអួនក្រអៅ មានរហស្សនាម "រៃកណ្ដឹង" អ្នកនាង ម៉េង កែវពេជ្ជតា ដែលកន្លងមកធ្លាប់តែ មានព័ត៌មានលេចឮថា នាងមានការ អាក់អន់ស្រពន់ចិត្ត ជាមួយផលិតកម្ម ហង្សមាស ក្រោយពីផលិតកម្មមួយនេះ បានទទួលតារា ចម្រៀងចំណូលថ្មី ច្រើនលែងខ្វល់ ពីអ្នកនាង និងតារាចាស់ៗមួយចំនួនទៀត ជាហេតុធ្វើឲ្យ សំនៀងរបស់ ម៉េង កែវពេជ្ជតា លែងមានបទថ្មីទាល់តែសោះ ក្នុងផលិតកម្មហង្សមាស រយៈ ពេលជាង២ឆ្នាំមកនេះ ។

ទាក់ទងនឹងព័ត៌មាន ខាងលើនេះ ត្រូវបានប្រភពពីអ្នកជិតសិទ្ធ នៅហង្សមាស បានប្រាប់គេហ ទំព័រ LookingTODAY ឲ្យដឹងថា សម្រាប់ព័ត៌មាន លេចឮថា តារាចម្រៀងមាន ទឹកដមសំនៀង ពីរោះរណ្តំចិត្ត អ្នកនាង ម៉េង កែវពេជ្ជតា មានភាពរកាំរកូស ជាមួយខាងស្ថានីយទូរទស្សន៍ និង ផលិតកម្មហង្សមាសនោះ មិនមែនជាការពិតទេ ។ មូលហេតុអ្នកនាង មិនដែលបង្ហាញមុខ ក្នុង ផលិតកម្ម និងកញ្ចក់ទូរទស្សន៍ហង្សមាសនោះ ដោយសារតែអ្នកនាងរវល់ ជាមួយការងារ ខាង ក្រៅ គ្មានអីទាក់ទង និងរឿងចេញបទចម្រៀង នោះឡើយ ។

ប្រភពដដែល បានប្រាប់ឲ្យដឹងទៀតថា នៅក្នុងពេលឆាប់ៗខាងមុខនេះ តារាចម្រៀង ម៉េង កែវពេជ្ជតា នឹងមានចេញបទចម្រៀង ទោលតែម្នាក់ឯង មួយវ៉ុល ដោយខាងផលិតកម្ម បាន សម្រឹតសម្រាំង បទចម្រៀងពីរោះៗឲ្យអ្នកនាង ក្នុងបំណងវាយលុកទីផ្សារ និងសាងកេរ្តិ៍ ឈ្មោះ របស់អ្នកនាង ឲ្យមានភាពលេចធ្លោ កាន់តែខ្លាំងឡើងជាងមុន ។ ម្យ៉ាងទៀតអាចនិយាយបានថា ជាការលួងចិត្ត តារាចម្រៀង ម៉េង កែវពេជ្ជតា ផងដែរ ខណៈ តារាចម្រៀងចាស់ មួយចំនួនបាន ដើរចេញ ពីហង្សមាសជាបន្តបន្ទាប់ ។ ជាក់ស្ដែងដូចជា លោក ណូយ វ៉ាន់ណេត ជាដើម បាន ប្រកាសថា លោក ឈប់ច្រៀងឲ្យផលិតកម្ម ហង្សមាស ទៀតហើយ ។

ប្រភពខាងលើប្រាប់ទៀតថា ខាងផលិតកម្ម បានត្រៀម បទចម្រៀងមួយវ៉ុល ឲ្យ អ្នកនាង ម៉េង កែវពេជ្ជតា ខណៈដែលអ្នកនាងមិនចង់ បាន បទចម្រៀង ច្រើនម្នាក់ឯង រហូតដល់មួយវ៉ុលទេ ពោលគឺត្រឹមតែ២-៣ បទក៏បាន ព្រោះចង់ចេញ ឬមិនចង់ចេញបទឲ្យច្រៀង ក៏អ្នកនាង ម៉េង កែវពេជ្ជតា អត់ចង់ខ្វល់នោះឡើយ អាស្រ័យលើផលិតកម្ម គេនឹកឃើញ។

បើទោះជាមានប្រភពច្បាស់ការ នៅហង្សមាស បង្ហើបប្រាប់យ៉ាងនេះក្តី ប៉ុន្តែ LookingTODAY នៅមិនទាន់ អាចសន្និដ្ឋានបានទេ ព្រោះថា LookingTODAY នៅមិនទាន់អាចទាក់ទងទៅ អ្នក នាង ម៉េង កែវពេជ្ជតា ដើម្បីសាកសួរច្បាស់បានទេ នៅថ្ងៃទី៣ ខែកក្កដា នេះ ៕

ផ្តល់សិទ្ធិ ៖ ដើមអំពិល