CamNews

ប្រទេសថៃ៖ តុលាការព្រហ្មទណ្ឌ បានច្រានចោល ការសន្មតថា មរណភាពដ៏អាថ៌កំបាំងនៃអតីតមន្រ្តីផ្នែកដីធ្លី ដែលត្រូវបានឃុំខ្លួន នៅមន្ទីរស៊ើបអង្កេតពិសេស (DSI) កាលពីឆ្នាំមុន គឺជារឿងធ្វើអត្ដឃាត ។ តុលាការបាននិយាយថា ខ្លួនបានរកឃើញថា លោក Thawatchai Anukul ដែលជាអតីតមន្ត្រីនៃការិយាល័យដីធ្លី នៅក្នុងខេត្ត Phangnga និងភូកេត ត្រូវគេសម្លាប់។

ការសន្និដ្ឋានបែបនេះ បានធ្វើឡើងបន្ទាប់ពីមានការសម្ភាសន៍ ជាមួយសាក្សីជាច្រើននាក់ តាំងពីដើមឆ្នាំមក តាមសំណើរបស់ព្រះរាជអាជ្ញា ដែលកំពុងស្វែងរកការចេញសាលក្រម ពីតុលាការលើសំណុំរឿងនៃការស្លាប់របស់លោក។ តុលាការ មិនបានវែកញែកលម្អិត ចំពោះការស៊ើបអង្កេតនោះទេ។

លោក Thawatchai អាយុ ៦៦ ឆ្នាំ បានស្លាប់កាលពីថ្ងៃទី ២៩ ខែសីហាឆ្នាំមុន។ លោក ត្រូវបានរកឃើញថា ចងក.សម្លាប់ខ្លួន នៅក្នុងបន្ទប់មួយជាន់ទី ៦ នៃអាគារ DSI ។ បន្ទាប់មក លោក Songsak Raksaksakun អនុប្រធាន DSI និយាយថា ក្រុមមន្រ្តីបានផ្តល់ការសង្រ្គោះបឋមដល់គាត់ ប៉ុន្តែការសង្រ្គោះបឋមនោះ បានយឺតពេលក្នុងការស្រោចស្រង់ជីវិតរបស់គាត់ទៅហើយ។ គាត់ ត្រូវបានគេដឹងថា ស្លាប់ខណៈពេលបញ្ជូនទៅកាន់មន្ទីរពេទ្យ Mongkutwattana ។ DSI បាននិយាយថា ជនរងគ្រោះ បានប្រើស្រោមជើងមួយគូ ដើម្បីចងក.ធ្វើអត្ដឃាត ។

លោក Thawatchai ត្រូវបានតុលាការចោទប្រកាន់ពីបទមិនគោរពកាតព្វកិច្ច ចំពោះការជាប់ពាក់ព័ន្ធគួរឱ្យសង្ស័យរបស់លោក ក្នុងការចេញឯកសារកម្មសិទ្ធិដីធ្លី នៅភូកេត និងផាងហ្គោ ដែលជាការក្លែងបន្លំឯកសារដីធ្លីរួមមានឆ្នេរ Layan នៅស្រុក Thalang នៃខេត្ដភូកេត និងផ្នែកមួយនៃឧទ្យានជាតិ Hat Thai Mueang-Khao Lampi ក្នុងខេត្ត Phangnga ក្នុងទសវត្សរ៍ឆ្នាំ ១៩៩០ ។

ប្អូនប្រុសរបស់លោកឈ្មោះ Narongchai បាននិយាយថា លោកនឹងពិគ្រោះជាមួយមេធាវីរបស់ខ្លួន និងទៅស្ថានីយ៍ប៉ូលីសតុងសុងហុងដើម្បីដាក់ពាក្យបណ្ដឹង ដើម្បីបង្ខំឱ្យបើកការស៊ើបអង្កេតលើសំណុំរឿងឃាតកម្មមួយនេះ ៕

ប្រែសម្រួល៖ សារ៉ាត

ប្រភព៖ Bangkokpost