ព័ត៌មានកីឡា៖ ខ្សែប្រយុទ្ធដ៏ល្បីឈ្មោះបំផុតរបស់ Real Madrid ត្រូវបង្ខំឲ្យសម្រេចចិត្ដ ផ្លាស់ប្ដូរ ឈ្មោះពិតចេញពីស្បែកជើង ខណៈដែលម្ចាស់ជំនួយធំ ដាក់គំនាបសង្កត់ ឲ្យប្រើប្រាស់ឈ្មោះពិត ផលិតផលរបស់ក្រុមហ៊ុន។
Cristiano Ronaldo ដែលត្រូវបានគេស្គាល់ថា ជាកីឡាករដែលអាចរកបានចំណូលច្រើន លំដាប់ថ្នាក់ទី ២ លើពិភពលោក ក្នុងវិស័យកីឡា ត្រូវទទួលរងគំនាបសង្កត់ ដោយឲ្យប្ដូរឈ្មោះកីឡាករចេញពីផលិតផលរបស់ម្ចាស់ជំនួយ ពោលគីស្បែកជើងប្រកួតរបស់កីឡាករ ដែលក្រុមហ៊ុន តម្រូវឲ្យលុបឈ្មោះនិមិត្ដសញ្ញា Ronaldo ចេញ ដោយជំនួសមកវិញនូវឈ្មោះ ផលិតផលក្រុមហ៊ុន Nike ដែលកីឡាករធ្លាប់ចុះហត្ថលេខាលើកិច្ចកុងត្រា យល់ព្រមទទួលជំនួយ ឧបត្ថម្ភរហូតដល់ទៅជិត ៥.៥ លានផោនក្នុងមួយឆ្នាំ។ Ronaldo មិនទាន់មានសកម្មភាពអ្វីប្លែកនៅឡើយ ទេ ក្រោយពីទទួលបាននូវសេចក្ដីសម្រេចមួយនេះ។
យោងតាមប្រភពព័ត៌មានបន្ដទៀតថា Cristiano Ronaldo ចំាបាច់ត្រូវតែសម្រេច តាមគោលការណ៍របស់ក្រុមហ៊ុន Nike បើមិនដូច្នោះទេ កីឡាករនឹងបាត់បង់ ប្រាក់ចំណូលដ៏ច្រើន ប្រចាំឆ្នាំ។
គូសបញ្ជាក់ផងដែរថា Cristiano Ronaldo គឺជាជនទីពីរហើយ ដែលអាចរកលុយបាន ក្នុងវិស័យកីឡាក្នុងនាមជាកីឡាករ ចំណែកអ្នកដែលអាចរកប្រាក់ចំណួលច្រើនជាងគេលើពិភពលោក គឺ Floyd Mayweather ដែលជាកីឡាករប្រដាល់ ។
ដោយ៖ អឿ អ៊ុយ
ប្រភព៖ Mirror