CamNews

ភ្នំពេញ៖ ទោះជាពេលនេះ លោក ខេមរៈ សេរីមន្ត បានក្លាយខ្លួនជា តារាចម្រៀងមួយដួងដែលមានភាពលេចធ្លោ និងមានភាពហ៊ឺហារ ខុសពីពេលមុនដែល លោកមិនចូលប្រឡូកក្នុងសិល្បៈ ក៏ដោយតែលោក នៅតែអះអាងថា ខ្លួនលោក និងគ្រួសារមិនចង់ធ្វើអ្វី ឲ្យមានភាពលេច ត្រដែត ខ្លាំង នៅស្រុកកំណើត ក្នុងឱកាសបុណ្យភ្ជុំបិណ្ឌឡើយ ព្រោះខ្លាចគេថាលោកអួត។

ជួបសម្ភាសន៍ ជាមួយគេហទំព័រ Looking TODAY លោក ខេមរៈ ភារុណ ត្រូវជាបងប្រុសបង្កើតរបស់តារា ចម្រៀងល្បីឈ្មោះ លោក សេរីមន្ត បានប្រាប់ឲ្យដឹងថា នៅថ្ងៃភ្ជុំធំនេះ លោកក៏ដូចជា សេរីមន្ត នឹងធ្វើដំណើរទៅ ខេត្តកំពង់ចាម ដើម្បីទៅវត្តជុំជាមួយ ក្រុមគ្រួសារហើយ និងមានកម្មវិធីជួបជុំបង ប្អូនសាច់ញាតិជាលក្ខណៈគ្រួសារ ព្រោះពួកលោកកម្រ មានពេលវេលាជួបគ្នាណាស់។

លោក ភារុណ បានប្រាប់ឲ្យដឹងបន្តទៀតថា ក្រៅពីទៅវត្តសេរីមន្ត គេបានរៀបចំពិធីជប់លៀងរាំកម្សាន្ត ជាលក្ខណៈ គ្រួសារតូចមួយ ហើយនិងមានការចូលជា បច្ច័យមួយចំនួនដល់វត្តដែរ ព្រោះរាល់ឆ្នាំវត្តនៅ ស្រុកកំណើត តែងតែមានកម្មវិធី សប្បាយៗ សម្រាប់ប្រជាពលរដ្ឋ ជារឿងធម្មតា។

បងប្រុសតារាចម្រៀងរូបនេះ បានប្រាប់ឲ្យដឹងទៀតថា “សម្រាប់ការចូលបច្ច័យរបស់ សេរីមន្ត គឺជារឿងធម្មតាហើយ ព្រោះធ្វើរាល់ឆ្នាំគ្រាន់តែ មន្ត គេមិនចង់បើកចំហរ ឫធ្វើលក្ខណៈធំដុំអីទេ ដោយសារតែប្អូនប្រុសខ្ញុំគេខ្លាចរអា ថាមានការ រិះគន់ថាគេអួត ដូច្នេះហើយទើប គេមិនចង់ធ្វើអីធំដុំ ពោលគឺធ្វើតាមធម្មតា ដូចរាល់ឆ្នាំគ្មានអីប្លែក ខុសពីរាល់ឆ្នាំទេ”។

លោក ខេមរៈ ភារុណ បានប្រាប់ឲ្យដឹងទៀតថា នៅក្នុងឱកាសបុណ្យភ្ជុំបិណ្ឌនេះ សន្ទុះការងារមិនសូវច្រើនទេ ដូច្នេះបើតាមគម្រោង នៅថ្ងៃភ្ជុំពួកលោក នឹងធ្វើដំណើរ ទៅស្រុកកំណើតជុំគ្រួសារ ហើយសម្រាប់ការងារ គឺប្រហែលជាមិនប៉ះពាល់ទេ ដោយសារតែរាល់ឆ្នាំ អ្នកសិល្បៈមិនសូវរវល់ការងារទេ៕

ផ្តល់សិទ្ធដោយ ៖ ដើមអម្ពិល