CamNews

(ហាណូយ)៖ គំរោងថ្មីមួយរបស់ប្រទេសវៀតណាម ក្នុងការបង្កើតភ្លៀងសិប្បនិម្មិត នឹងធ្វើការសាកល្បង នៅភាគកណ្តាលប្រទេសវៀតណាម នៅខែតុលាខាងមុខនេះ ហើយនឹងចំណាយថវិកា ប្រមាណ ៥,០០០ពាន់លានដុង (២២៥លានដុល្លារអាមេរិក)។ នេះបើតាមការផ្សាយ​នៅមុននេះបន្តិច ដោយទីភ្នាក់ងារព័ត៌មាន​ចិនស៊ិនហួរ នាព្រឹកថ្ងៃសុក្រ ទី១៦ ខែកញ្ញា ឆ្នាំ២០១៦។

សារព័ត៌មានវៀតណាម Tien Phong បានរាយការណ៍​នៅថ្ងៃសុក្រនេះទៀតថា ថវិកាដែលនឹងត្រូវ ចំណាយក្នុងគំរោងមួយនេះ ត្រូវបានស្នើដោយក្រុមហ៊ុន វិទ្យាសាស្រ្ត​និងបច្ចេកវិទ្យា An Sinh Xang ទៅរដ្ឋាភិបាលវៀតណាម ដើម្បីទិញនាវា​និងយន្តហោះ ដែលអាចបម្រើក្នុងប្រតិបត្តិការ បង្កើតភ្លៀងសិប្បនិម្មិត ទប់ទល់នឹងបញ្ហាគ្រោះរាំងស្ងួត ឬក៏បង្កាមិនឲ្យមាន​ទឹកជំនន់បាន។

នាយកប្រតិបត្តិទូទៅ របស់ក្រុមហ៊ុនខាងលើ លោក Phan Dinh Phuong បានឲ្យដឹងថា នាវាដែលនឹងត្រូវ ទិញមកនោះ នឹងត្រូវប្រើប្រាស់សម្រាប់បូមទឹកសមុទ្រ ចូលទៅកាន់បំពង់ទឹក ហើយយកទៅកាន់ រយៈកម្ពស់ប្រាំគីឡូម៉ែត្រ ដើម្បីភ្ជាប់ទៅនឹងឧទ្ធម្ភាគចក្រ ឬបាឡុង។ បន្ទាប់មកទៀត​បំពង់នោះ នឹងបំភាយទឹកសមុទ្រ ដែលបូមបានទៅក្នុងផ្ទៃមេឃ ដែលមានពពកច្រើន​នៅលើផ្ទៃសមុទ្រ។

លទ្ធផលជាបន្តទៀតនោះ គឺពពកខ្មៅក្រាស់នឹងបង្កើតបាន​ជាទឹកភ្លៀងធ្លាក់ច្រើន នៅតំបន់សមុទ្រ ដែលប្រការនេះនឹងមិនបង្កឲ្យមានគ្រោះទឹកជំនន់ នៅទីប្រជុំជនឡើយ។ លោក Phuong បានបន្ថែមទៀតថា ស្ថានីយបង្កើតភ្លៀងសិប្បនិម្មិត នឹងត្រូវកសាងឲ្យបាន ជាង១០០កន្លែងដោយអម​ជាមួយនាវា​និងយន្តហោះ ដែលនឹងត្រូវដាក់ពង្រាយ នៅតាមឈូងសមុទ្រ Beibu ភាគខាងជើងប្រទេសវៀតណាម ផងដែរ។

គួរបញ្ជាក់​ថា ក្រសួងនិងស្ថាប័នពាក់ព័ន្ធនានា នឹងធ្វើការពិភាក្សា លើការអនុវត្តន៍ការសាកល្បង នៃគំរោងបង្កើតភ្លៀងសិប្បនិម្មិតនេះ នៅក្រុងដាណាង ក្នុងខែតុលាខាងមុខ៕

ប្រភព ៖ ស៊ិនហួរ

ផ្តល់សិទ្ធដោយ ៖ ខ្មែរថកឃីង