គោមយក្ស ធ្វើអំពីដបទឹកសុទ្ធធំៗ ចំនួន ៧ពាន់ដប សម្រាប់បំភ្លឺរដូវបុណ្យព្រះខែ

ប្លែកៗ

គោមយក្ស ធ្វើអំពីដបទឹកសុទ្ធធំៗ ចំនួន ៧ពាន់ដប សម្រាប់បំភ្លឺរដូវបុណ្យព្រះខែ

04:19 PM 13.09.2013
Print Email

ជាមួយនឹងដបទឹកសុទ្ធជ័រធំៗចំនួន ៧,០០០ ដប ក្រុមអ្នកសិល្បៈមកពីហុងកុង កំពុងត្រៀមសម្រេចជាស្ថាពរនូវគោមយក្សមួយ ដើម្បីអុជបំភ្លឺនៅពេលរាត្រី ក្នុងរដូវបុណ្យព្រះខែរបស់ជនជាតិចិន នាងពេលខាងមុខ។

ដបទឹកសុទ្ធជ័រធំៗចំនួន ៧,០០០ ដប ត្រូវបានគេប្រើប្រាស់ ដើម្បីផ្គុំចូលគ្នា និងលើកជារូបរាង គោម នៅក្នុងឧទ្យាន ជ័យជំនះ (Victoria Park) របស់ក្រុងហុងកុង។ ក្រោយពីដំណាក់កាលផ្គុំ ត្រូវបានធ្វើរួចរាល់ ក្រុមអ្នកឯកទេស ក៏នឹងបំពាក់ប្រព័ន្ធអំពូលភ្លើង ដើម្បីបំភ្លឺក្នុងរាត្រីនៃរដូវបុណ្យព្រះខែ (Mid Autumn Festival) របស់ជនជាតិចិន ដែលនឹងត្រូវបានរៀបចំឡើងនៅថ្ងៃទី ១៩ ខែកញ្ញា ឆ្នាំ ២០១៣ ។
។
គោមយក្សមួយនេះ ត្រូវគេប្រើដែកធំៗ ដើម្បីធ្វើជាគ្រោង។ ប្រភពព័ត៌មានឱ្យដឹងថា គោមនេះ មានអង្កត់ផ្ចិត ២០ម៉ែត្រ និងកំពស់ ១០ម៉ែត្រ។

បច្ចុប្បន្ន គ្រោងដែករបស់គោមយក្សនេះ ត្រូវបានគេតម្លើងរួចរាល់ហើយ នៅសល់តែការតម្លើងសម្បករបស់វាតែប៉ុណ្ណោះ។ សូមបញ្ជាក់ថា ដើម្បីតម្លើងគោមយក្សនេះ ក្រុមអ្នកជំនាញការ ត្រូវប្រើប្រាស់ដងសន្ទូតយន្ដ ក្នុងការលើកដាក់ បន្ទះគ្រោងដែកនិមួយៗដែលមានដាក់ដបទឹកសុទ្ធ។

នៅពេលមើលពីខាងលើ គោមយក្សនេះ ហាក់មានរូបរាងមិនដូចគោមប៉ុន្មាននោះទេ ប៉ុន្ដែវា ដូចទៅនឹងអាគារកញ្ចក់សម្រាប់សួនជីវសាស្ដ្រចម្រុះ ឬផ្ទាំងសូឡាយក្ស ទៅវិញ។