CamNews

ភ្នំពេញ៖ លោក ប៊ុត សីហា ម្ចាស់ពានរង្វាន់ The voice Cambodia រដូវកាលទី១ បានប្រកាស អំពីពេលវេលា នៃការត្រៀមចេញ បទចម្រៀងថ្មី លើកដំបូងរបស់ខ្លួន នៅលើ CV និង VCD របស់ផលិតកម្មរស្មីហង្សមាស ដើម្បីដាក់លក់នៅលើទីផ្សារ បន្ទាប់ពីលោក ដណ្ដើមបានជ័យលាភី អស់រយៈពេលជាង ២ខែកន្លងទៅហើយនោះ ។

ក្រោយលើកពាន The voice Cambodia រហូតមកដល់ពេលនេះ រាល់ពេលលោក ប៊ុត សីហា ឡើងច្រៀងក្នុងការប្រគំតន្ដ្រី ខនសឺតនានា លោកពុំទាន់មានបទចម្រៀងផ្ទាល់ខ្លួន ដើម្បីយកទៅច្រៀងបង្ហើទឹកដម សំនៀងក្នុងនាម ជាតារាល្បីមួយរូប នៅក្នុងផលិតកម្មរស្មីហង្សមាសនៅឡើយទេ ពោលគឺលោកតែងតែយកបទ ចម្រៀងរបស់តារាផ្សេងៗទៀត  យកទៅច្រៀង ជំនួសទៅវិញ ក្នុងនោះរួមមានសំនៀង ដើមរបស់លោក ឆាយ វីរៈយុទ្ធ និងលោក ឆន សុវណ្ណរាជ ដែលគ្រូបង្វឹកខ្លួនជាដើម ។

បញ្ហានេះ អ្នកគាំទ្រវិស័យសិល្បៈ ដែលទន្ទឹងរង់ចាំចង់ស្ដាប់ទឹកដមសំនៀងម្ចាស់ពានរង្វាន់ The voice Cambodia រដូវកាលទី១ តែងតែចោទសួរ ទៅកាន់លោក ប៊ុត សីហា ថាតើពេលណា ទើបលោកចេញបទចម្រៀងថ្មី របស់ខ្លួននៅក្នុង ផលិតកម្ម រស្មីហង្សមាសនោះ? ពាក់ព័ន្ធនឹងការជជីកសួរម្ដងហើយម្ដងទៀតៗបែបនេះ ថ្នាក់ដឹកនាំផលិតកម្ម ក៏ដូចជាលោក ប៊ុន សីហា ផ្ទាល់តែងតែអះអាងទៅវិញថា នឹងចេញក្នុងពេលឆាប់ៗខាងមុខនេះហើយ ។

ទោះជាយ៉ាងណាការអះអាងខាងលើ បានធ្វើឲ្យទស្សនិកជន ដែលជាអ្នកគាំទ្រ កាន់តែអន្ទះសារចង់ស្ដាប់ ចង់ទស្សនាកាន់តែខ្លាំង ប៉ុន្ដែមិនមានលទ្ធផលអ្វីឡើយ ព្រោះ ២ខែកន្លងផុតទៅហើយ នៅតែមិនឃើញលោក ប៊ុត សីហា មានបទចម្រៀងច្រៀងនៅលើ CD ឬ VCD នៃផលិតកម្មរស្មីហង្សមាសដដែល ។

ទន្ទឹងនឹងការគាំទ្រដ៏ច្រើនលើសលុះបែបនេះ នៅថ្ងៃទី០៤ ខែកុម្ភៈ ឆ្នាំ២០១៥ លោក ប៊ុត សីហា ក៏បានសរសេរសេចក្ដី ជូនដំណឹងមួយ បង្ហោះនៅលើប្រព័ន្ធទំនាក់ទំនងសង្គមរបស់ខ្លួន(Facebook) ដោយលោកបានកំណត់ ពីកាលបរិច្ឆេទ នៃការចេញបទចម្រៀងថ្មីលើកដំបូងរបស់ខ្លួន(Albumថ្មី) ។

ម្ចាស់ពានរង្វាន់ The voice Cambodia រដូវកាលទី១នេះ បានសរសេរថា «ខ្ញំបាទ ប៊ុត សីហា សូមជួនដំណឹងទៅដល់ពុកម៉ែបងប្អូន នឹងមិត្តៗយុវ័យទាំអស់ ដែលបានគាំទ្រដល់រូបខ្ញុំបាទ ហើយក៏កំពុងតែរង់ចាំនូវ Album ថ្មីរបស់ខ្ញុំបាទផងដែរ, ខ្ញុំសូមជម្រាបថា ខ្ញុំបាទនឹងចេញបទថ្មីនៅលើ CD និង VCD ក្នុងផលិតកម្ម រស្មីហង្សមាស នៅដើមខែមេសា ជាមួយនឹងបទបែបជាចង្វាក់ប្រពៃណីខ្មែរ ដើម្បីអបអរសាទរឱកាសបុណ្យចូលឆ្នាំថ្មី ប្រពៃណីជាតិ ឆ្នាំ២០១៥នេះ» ។

គួរបញ្ជាក់ថា ដំណឹងនេះ សម្រាប់បងប្អូន មិត្តៗយុវវ័យ ដែលនិយមលេង Facebook ហើយបានឃើញនៅលើ Page របស់លោក ប៊ុត សីហា នោះ បាននាំគ្នាសម្ដែងនូវការគាំទ្រយ៉ាងច្រើន ហើយសម្រាប់បទចម្រៀងថ្មីៗ ដែលម្ចាស់ពានរង្វាន់ The voice Cambodia ឆ្នាំ២០១៤ ចេញគេក៏រំពឹងថា នឹងទទួលបានការគាំទ្រច្រើនពីសំណាក់ប្រជាពលរដ្ឋខ្មែរទាំងអស់ផងដែរ ៕

ផ្តល់សិទ្ធដោយ ៖ ដើមអម្ពិល