CamNews

នេះ​គឺជា​គំនិត​ដ៏​អស្ចារ្យ​មួយ! ជាង​ម៉ាស៊ីន​ម្នាក់ ជា​ជនជាតិ​ប្រេ​ហ្សី​ល ឈ្មោះ Alfredo Moser បាន​ប្រើប្រាស់​ដប​ជ័រ​ដែល​ពេញ​ដោយ​ទឹក និង​មាន​សារធាតុ​ធ្វើឱ្យ.ស ព្រម​ជាមួយនឹង​ពន្លឺ​ធម្មជាតិ ធ្វើឱ្យ​បន្ទប់​ទាំងឡាយ ភ្លឺ​ពេញ​មួយថ្ងៃ។

ការរកឃើញ​របស់ Alfredo Moser នឹង​ត្រូវបាន​យកទៅអនុវត្ត​ទៅលើផ្ទះ​ជាង​ជាង ១លាន​ខ្នង នៅ​ចុង​ឆ្នាំនេះ ហើយ​លោក​ក៏​មានការ​ត្រេកអរ​ចំពោះ​ជីវភាព​ដែល​នឹងត្រូវ​ផ្លាស់ប្ដូរ​ថ្មី​របស់​ប្រជាជន​នៃ​បណ្ដា​ប្រទេស​ក្រីក្រ​ក្នុង​ពិភពលោក ដែល​នឹង​បាន​ប្រើប្រាស់​គំនិត​របស់លោក។

ជាង​ម៉ាស៊ីន​រូបនេះ បាន​រកឃើញ​គំនិត​នេះ នៅពេលដែល​ផ្ទះ​របស់លោក​ស្ថិតនៅក្នុង​តំបន់ Uberaba ភាគខាងត្បូង​ប្រទេស ប្រេ​ហ្សី​ល ត្រូវ​ប្រឈម​នឹង​ការ​ដាច់​ភ្លើង​ជាច្រើន​ម៉ោង រាល់ថ្ងៃ។

Alfredo Moser បាន​ប្រើប្រាស់​ដប​ជ័រ​ទន់ ចាក់ទឹក​ពេញ និង​មាន​ដាក់​សារធាតុ​ធ្វើឱ្យ​ស ដើម្បី​បំភ្លឺ​បន្ទប់​របស់លោក ចាប់តាំងពី​ឆ្នាំ ២០០២ ហើយ​បច្ចុប្បន្ន គំនិត​ច្នៃប្រឌិត​របស់លោក ត្រូវបាន​គេ​ប្រើប្រាស់​ពាសពេញ​ពិភពលោក។

គេ​វាយតម្លៃថា ប្រព័ន្ធ​បំភ្លឺ​ដែល​ប្រើប្រាស់​ពន្លឺព្រះអាទិត្យ​រប​ស់លោក នឹងត្រូវ​បាន​ប្រើ​នៅក្នុង​ផ្ទះ​រាប់លាន​ខ្នង នៅ​ចុងឆ្នាំ ២០១៣នេះ។

អាថ៌កំបាំង​នៃ​ជាតិ​រាវ​ក្នុង​ដប​ទឹក ជា​របស់​ដែល​យើង​តែងតែ​បោះចោល នោះ​គឺ​សារធាតុ​ធ្វើឱ្យ​ស ចំនួន ២ស្លាបព្រា ដែល​ត្រូវ​បានដាក់​បន្ថែម​ចូលទៅក្នុង​ទឹក ប្រការនេះ​នឹង​ជួយ​ឱ្យ​ទឹក​មិន​ប្រែ​ទៅជា​ពណ៌​ខៀវ នៅពេល​ត្រូវ​ទទួល​ពន្លឺព្រះអាទិត្យ។

លោក Alfredo Moser ចោះ​រន្ធ​មួយ​ដែល​ល្មម​នឹង​ដប នៅលើ​ដំបូលផ្ទះ ហើយ​ក្រោយមក លោក​យក​ដប​ដែល​បានរៀបចំ​រួច ញុ​ក​ទៅនឹង​រន្ធ​នោះ ទើប​យក​ជ័រ polyester បិទ​ឱ្យ​ជាប់ ការពារ​មិនឱ្យ​ជ្រាប​ទឹក។

លោក Alfredo Moser បាន​និយាយ​នៅលើ​វិទ្យុ BBC World Service ថា វា​អាស្រ័យ​លើ​កំដៅ​ព្រះអាទិត្យ ប៉ុន្ដែ “អំពូល​ភ្លើង” នេះ មាន​ពន្លឺ​ប្រហាក់ប្រហែល​នឹង​អំពូល​ភ្លើង ចាប់ពី ៤០ ដល់ ៦០W ។

Alfredo Moser អាច​រកបាន​ប្រាក់​ប៉ុន្មាន​ដូ​ល្លារ​ប៉ុណ្ណោះ ពី​ការបំពាក់ “អំពូល​ភ្លើង” របស់លោក ឱ្យ​ផ្ទះ​អ្នកជិតខាង និង​ហាង​ទំនើប​ក្នុង​តំបន់​លោក​រស់នៅ ប៉ុន្ដែ ការរកឃើញ​នេះ មិនបាន​ជួយ​ឱ្យ​លោក​ក្លាយជា​អ្នកមាន​នោះទេ។

“អំពូល​ភ្លើង Moser” បាន​ត្រូវគេ​ប្រើប្រាស់ ក្នុងផ្ទះ​ជាង ១៤០,០០០ ខ្នង នៅ​ប្រទេស ហ្វ៊ី​លី​ពី​ន ក្រៅពីនេះ វា​ក៏មាន​វត្ដ​មាននៅ​ក្នុងប្រទេស​ចំនួន ១៥ផ្សេងទៀត ដូចជា ប្រទេស​អា​ហ្ស​ង់​ទីន ប្រទេស​ឥណ្ឌា និង​ប្រទេស​ហ្វ៊​៊ី​ជី។ល។

លោក Illac Angelo Diaz ដែលជា​អគ្គនាយក​ផ្នែក​ផលិត​របស់​ក្រុមហ៊ុន MyShelter នៅ ហ្វ៊ី​លី​ពី​ន មានការ​សរសើរ​ជាខ្លាំង ចំពោះ​ការរកឃើញ​នេះ។ លោក Illac Angelo Diaz ក៏​ជឿថា ផ្ទះ​ជាង ១លាន​ខ្នង នៅ​ទូទាំង​ពិភពលោក បាន និង​កំពុង​ប្រើប្រាស់​របកគំហើញ​នេះ។លោក Illac Angelo Diaz បន្ដថា ៖ “បើទោះជា​ទទួលបាន​ពាន់រង្វាន់ Nobel  ឬ​អត់ នោះ ក៏​យើង​នៅតែ​ចង់ឱ្យ​លោក Alfredo Moser ដឹងថា មាន​មនុស្ស​រាប់មិនអស់ មានការ​កោតសរសើរ​ចំពោះ​អ្វីដែល​លោក​កំពុង​ធ្វើ” ។

ដោយ ៖ តារា
ប្រភព ៖ Dailymail