ភ្នំពេញ៖ នៅទីបំផុតកញ្ញាឯក តំណាងឲ្យប្រទេសកម្ពុជា នាង ទឹម ស្រីនាថ ក្រោយពីបានចូលប្រឡង ក្នុងកម្មវិធី Miss Grand International 2014 នៅក្នុងប្រទេសថៃ នៅយប់ថ្ងៃទី០៧ ខែតុលានេះ នាងបានទទួលជ័យជំនះគួរជាទីគាប់ចិត្តហើយ បន្ទាប់ពីទទួលបានសំឡេង បោះឆ្នោតគាំទ្រ ច្រើនលើសលប់ដល់ទៅ ២៧.១៩ ភាគរយ ខណៈដែលបេក្ខនារីតំណាងប្រទេសនានា ទូទាំង ពិភពលោកមិនមានសំឡេង គាំទ្រដល់ ១០ ភាគរយ ផងនោះ ។
នេះអាចនិយាយបានថា ជាមោទនភាពមួយសម្រាប់ ប្រទេសកម្ពុជា នៅលើឆាកអន្តរជាតិ ខណៈដែល កញ្ញា ស៊ន សៀវម៉ី បានឈ្នះមេដាយមាស ក្នុងព្រឹត្តិការណ៍ Asian Games នាំកិត្តិយសមកជូនជាតិមាតុភូមិ ជាប្រវត្តិសាស្ត្រ ហើយនោះ ។ ដោយឡែកកញ្ញា ទឹម ស្រីនាថ ជាយុវនារីកម្ពុជាម្នាក់ទៀត ត្រូវបានប្រកាសឈ្នះ ជាផ្លូវការ លើជ័យលាភី ផ្នែកប្រជាប្រិយ (Miss Popular Vote Award) នៅក្នុងកម្មវិធី Miss Grand International 2014 នៅក្នុងប្រទេសថៃ ។
សូមបញ្ជាក់ថា គិតត្រឹមល្ងាចថ្ងៃទី០៧ ខែតុលា ឆ្នាំ២០១៤ កញ្ញា ទឹម ស្រីនាថ ទទួលបានសំឡេងគាំទ្រ ចំនួន ២៧.១៨ ភាគរយ លើសគេបង្អស់ បើធៀបនឹងបេក្ខនារី ប្រទេសនានាមានដូចជា អូស្រ្តាលី អាហ្សង់ទីន ប្រេស៊ីល ឈីលី កាណាដា កាមេរូន គុយបា ហ្វាំងឡង់ បារាំង ឥណ្ឌា ជប៉ុន សិង្ហបុរី និងញូវហ្សេឡែន ព្រមទាំងបេក្ខនារីជាច្រើន រូបទៀត ប្រមាណ៨៥នាក់ ៕
- អាន ៖ កញ្ញា ទឹម ស្រីនាថ កំពុងទទួលបាន សំឡេងគាំទ្រនាំមុខគេ (Video Inside)
ផ្តល់សិទ្ធដោយ ៖ ដើមអម្ពិល