CamNews

(ភ្នំពេញ)៖ ពានរង្វាន់ AFF U-16 Championship ឆ្នាំ២០១៦ បានឈានដល់ការប្រកួតវគ្គពាក់កណ្ដាលផ្ដាច់ព្រ័ត្រ ចាប់ពីរសៀលថ្ងៃទី២១ ខែកក្កដានេះហើយ ដោយក្រុមម្ចាស់ផ្ទះកម្ពុជា ត្រូវជួបក្រុមយុវជនវៀតណាម ក្រោយពេលក្រុមការពារតំណែងជើងឯកថៃ ត្រូវជួបក្រុមយុវជនមាឌធំអូស្ដ្រាលី ។ ចាំមើលតើក្រុមណាខ្លះ បានឡើងដល់វគ្គផ្ដាច់ព្រ័ត្រនៃពានរង្វាន់យុវជនក្រោមអាយុ ១៦ឆ្នាំនេះ?

សម្រាប់ការប្រកួតល្ងាចនេះ គូដែលអ្នកគាំទ្រទន្ទឹងរង់ចាំទស្សនាជាងគេ គឺក្រុម U-16 កម្ពុជា ជួបក្រុមយុវជនវៀតណាម ព្រោះនេះគឺជាលើកដំបូង ដែលក្រុមយុវជនកម្ពុជា ឡើងដល់វគ្គពាក់កណ្ដាលផ្ដាច់ព្រ័ត្រនៃពានរង្វាន់ថ្នាក់តំបន់នេះ។ យុវជនកម្ពុជា បានប្រកួតជម្រុះក្នុងពូល B ៤ប្រកួតឈ្នះ៣ និងចាញ់១ មាន ៩ពិន្ទុឈរលេខរៀងទី២ ហេតុនេះកម្ពុជា ក៏ត្រូវប្រឈមមុខជាមួយក្រុមលេខ១ ពូលA គឺក្រុមយុវជនវៀតណាមតែម្ដង។

លោក Inoue Kazanori គ្រូបង្វឹកក្រុមយុវជនកម្ពុជា ហាក់មិនមានការព្រួយបារម្ភអ្វីឡើយ ចំពោះការប្រកួតនេះ បើទោះបីលោកចាត់ទុកវៀតណាម គឺជាក្រុមខ្លាំងក៏ដោយ។ លោកថា លោកមិនអាចប៉ាន់ស្មានលទ្ធផលទុកមុនបានឡើយ ប៉ុន្ដែលោកនឹងព្យាយាមឲ្យអស់ពីលទ្ធភាព នៅក្នុងការជំរុញកូនក្រុមស្វែងរកជ័យជម្នះ និងបង្កើតប្រវត្តិសាស្រ្ដថ្មីមួយ ជូនប្រទេសកម្ពុជាឲ្យបាន។

ចំណែកការប្រកួតរវាងក្រុមការពារតំណែងជើងឯកថៃ និងក្រុមយុវជនអូស្រ្ដាលី ក៏ជាជំនួបដែលអ្នកស្នេហាវិស័យកីឡាចង់ដឹងផងដែរ ព្រោះក្រុមថៃ គឺជាខ្លាកំណាចមួយក្នុងតំបន់អាស៊ាន ខណៈយុវជនអូស្ដ្រាលី ជាក្រុមកីឡាករមាឌធំ។ លោក Chaiyong Khumpiam ក្រុមគ្រូបង្វឹកយុវជនថៃ ធ្លាប់បាននិយាយថា បើសិនជាអាច លោកចង់ជួបយុវជនវៀតណាម នៅវគ្គពាក់កណ្ដាលផ្ដាច់ព្រ័ត្រនេះជាងជួបវៀតណាម។

សម្រាប់ការប្រកួតខ្វែងពូលនេះ ចំពោះក្រុមទទួលបានជ័យជម្នះ នឹងមានឱកាសឡើងវគ្គផ្ដាច់ព្រ័ត្រ ដើម្បីប្រជែងយកតំណែងជើងឯកពានរង្វាន់យុវជនថ្នាក់តំបន់ ឆ្នាំ២០១៦នេះ។ ចំណែកក្រុមចាញ់ ក៏ត្រូវជួបគ្នា ដើម្បីដណ្ដើមយកចំណាត់ថ្នាក់លេខ៣ផងដែរ ដែលការប្រកួតនឹងធ្វើឡើងថ្ងៃតែមួយ នៅថ្ងៃទី២៣ ខែកក្កដានេះ នៅលើទីលានពហុកីឡដ្ឋានជាតិ ក្នុងរាជធានីភ្នំពេញ។

គួរបញ្ជាក់ថា ពានយុវជនថ្នាក់តំបន់នេះ បានដំណើរការប្រកួតកាលពីថ្ងៃទី១០ ខែកក្កដាកន្លងទៅ ដោយមាន ១១ប្រទេសចូលរួម និងបែងចែកជា ២ពូល ក្នុងនោះពូលA មានក្រុមយុវជនវៀតណាម អូស្រ្ដាលី ម៉ាយ៉ាន់ម៉ា ម៉ាឡេស៊ី សិង្ហបុរី និងក្រុមយុវជនហ្វីលីពីន។ រីឯពូលB មានក្រុមម្ចាស់ផ្ទះកម្ពុជា ឡាវ ទីម័រខាងកើត ប្រ៊ុយណេ និងក្រុមការពារតំណែងជើងឯកឆ្នាំចាស់ថៃ។

ជាលទ្ធផលគេបានរកឃើញក្រុមខ្លាំង ៤ក្រុមឡើងដល់វគ្គពាក់កណ្ដាលផ្ដាច់ព្រ័ត្រ គឺមានក្រុមយុវជនវៀតណាម អូស្រ្ដាលី ថៃ និងក្រុមយុវជនកម្ពុជា៕

U-16 កម្ពុជា

U-16 វៀតណាម

ផ្តល់សិទ្ធដោយ ៖ ខ្មែរថកឃីង