CamNews

ប្រហែលជា​ឆ្នាំម្សាញ់ គឺជា​ឆ្នាំ​អាក្រក់​សម្រាប់​ស្ដ្រី​ត្រកូល Liu ម្នាក់នេះ នៅពេល​ពស់​មួយ​ក្បាល​ដែល​ត្រូវបាន​ត្រាំ​ក្នុង​ស្រា អស់​រយៈពេល​ដល់​ទៅ ៣ខែ បែរជា​អាច​ងើបក្បាលឡើង ហើយ​បាន​វាយ​ ប្រហារ​​លើ​ស្ដ្រី​រូបនេះ។

ការរស់រាន មានជីវិត​មួយរយៈ​ពេល​ខ្លី​នៅក្នុង​ស្រា គឺ​ពិតជា​អស្ចារ្យ​ចំពោះ​សត្វ​ពស់ ប៉ុន្ដែ ការបន្ដ​​មាន​ជីវិត​ដល់​ទៅ ៣ខែ ហើយ​អាច​មាន​កម្លាំង​គ្រប់គ្រាន់​ក្នុងការ​វាយប្រហារ​មនុ​ស្ស ដូច​ករណី​ដែល​បានកើត​ឡើង​នៅ​ប្រទេស​ចិន ថ្មីៗនេះ ប្រាកដជា​ធ្វើឱ្យ​មនុស្ស​ទាំងឡាយ មានការ​ភ្ញាក់ផ្អើល។

ទំព័រ China Daily បានឱ្យដឹងថា កាលពី​ថ្ងៃទី ៣ខែកញ្ញា​កន្លងទៅ ស្ដ្រី​ម្នាក់​មានត្រកូល Liu រស់នៅក្នុង​ក្រុង Shuangcheng នៃ​ខេ​ត្រ Heilongjiang ប្រទេស​ចិន ត្រូវបាន​ពស់​ដែល​ត្រាំ​ក្នុង​ស្រា ចិក​ចំ​ដៃ។ ការដែល​ត្រូវបាន​ពស់​ចិក ប្រហែលជា​មិន​គួរឱ្យភ្ញាក់ផ្អើល​នោះទេ ប្រសិន​ពស់​នោះ​កំពុង​ស្ថិតនៅ​ខាងក្រៅ​ដូច​ធម្មតា ប៉ុន្ដែ​នេះ​វា​ត្រូវបាន​គេ​ត្រាំ​នៅក្នុង​ក្រឡ​ស្រា អស់​ជាច្រើន​ខែ។

 ស្រាថ្នាំ​ដែល​ត្រាំ​សត្វ​ពស់ គឺជា​ប្រភេទ​ស្រា​ដែល​ត្រូវបាន​គេ​និយម​ច្រើន នៅ​ប្រទេស​ចិន

ប្រភពព័ត៌មាន​ឱ្យដឹងថា អ្នកស្រី Liu បាន​ទិញ​ពស់​នេះ​មក​ត្រាំ​ស្រា កាលពី​ខែមិថុនា ដើម្បី​ធ្វើជា​ថ្នាំ​ព្យាបាល​ជម្ងឺ​សន្លាក់។ ក្នុង​ថ្ងៃកើតហេតុ ខណៈដែល​អ្នកស្រី​កំពុងតែ​ចាក់​ស្រា​បន្ថែម​ចូលក្នុង​ក្រឡ ក៏​ស្រាប់តែ​ពស់​ដែល​បានដាក់​ត្រាំ​ក្នុងនោះ ងើបក្បាលឡើង ខាំ​ចំ​ដៃ​តែម្ដង។ ប្រការនេះ មានន័យថា ពស់​នោះ​នៅមាន​ជីវិត​នៅឡើយ បើ​ទោះ​ត្រូវបាន​ត្រាំ​ក្នុង​ស្រា អស់​រយៈពេល ៣ខែ​កន្លងមក​​ក៏​ដោយ។

ក្រោយពី​ត្រូវ​ពស់​ខាំ​ភ្លាម អ្នកស្រី Liu ក៏ត្រូវ​បាន​បញ្ជូន​ទៅកាន់​មន្ទីរពេទ្យ​ដើម្បី​សង្គ្រោះបន្ទាន់ ប៉ុន្ដែ គ្រូពេទ្យ​ឱ្យដឹងថា របួស​នេះ​មិន​ធ្វើឱ្យប៉ះពាល់​ដល់​អាយុជីវិត​នោះទេ។

គួររំឭកថា កាលពី​ឆ្នាំ ២០០៩ នៅ​ខេ​ត្រ Hubei ប្រទេស​ចិន ក៏មាន​ករណី​ស្រដៀង​គ្នា​នេះ​កើតឡើង។ លោក Zhang ត្រូវបាន​ពស់​ដែល​ត្រាំ​នៅក្នុង​ស្រា ខាំ ប៉ុន្ដែ​របួស​មិន​ធ្ងន់ធ្ងរ​ដូច​ករណី​របស់​មនុស្ស​ម្នាក់​ផ្សេងទៀត រស់នៅក្នុង​ខេ​ត្រ Guangxi កាលពី​ខែមេសា ឆ្នាំ ២០១។ ជនរងគ្រោះ​ម្នាក់នេះ បាន​បាត់​បង់ជីវិត ក្រោយពី​ត្រូវ​ពស់​ដែល​ត្រាំ​ក្នុង​ស្រា​ខាំ​បាន​មួយថ្ងៃ។

ដោយ ៖ តារា
ប្រភព ៖ China Daily/globaltimes