CamNews

​ភ្នំពេញ​៖​ ​ក្រសួងទេសចរណ៍​ ​និង​ក្រសួងសុខាភិបាល​ ​បាន​ស្នើ​ឲ្យ​គណៈ​គ្រប់គ្រង​អាកាស​យាន្ត​ដ្ឋាន​អន្តរជាតិ​ភ្នំពេញ​ ​កែសម្រួល​កន្លែង​ជក់បារី​ឲ្យ​នៅ​ឆ្ងាយ​ពី​ច្រកចេញ​ចូល​នៃ​ស្ថានីយ​ចេញដំណើរ​ និង​ស្ថានីយ​ដំណើរ​មកដល់​ ​និង​កែសម្រួល​នូវ​ចំណុច​ខ្វះខាត​មួយចំនួន​ក្នុង​ការអនុវត្ត​ច្បាប់​ស្តី​ពី​ការ​ត្រួតពិនិត្យ​ថ្នាំជក់​ ​ដើម្បី​រួមចំណែក​លើកកម្ពស់​សុខមាលភាព​ភ្ញៀវ​ទេសចរ​ ​និយោជិត​ ​និង​ប្រជាពលរដ្ឋ​។​

​ការ​ស្នើ​នេះ​ ​បាន​ធ្វើឡើង​នៅក្នុង​កិច្ចប្រជុំ​ស្តី​ពី​ ​«​បរិស្ថាន​គ្មាន​ផ្សែង​បារី​ក្នុង​វិស័យ​ទេសចរណ៍​នៅ​អាកាសយាន​ដ្ឋាន​អន្តរជាតិ​ភ្នំពេញ​»​ ​នៅ​អាកាសយាន​ដ្ឋាន​អន្តរជាតិ​ភ្នំពេញ​ ​នៅ​ថ្ងៃនេះ​។​

​អនុរដ្ឋ​លេខាធិការ​ក្រសួងទេសចរណ៍​ ​លោក​ ​ហោ​ ​សា​រុន​ ​បាន​មានប្រសាសន៍​ថា​ ​តាម​ការសង្កេត​កន្លងមក​ ​នៅ​អាកាសយាន​ដ្ឋាន​អន្តរជាតិ​ភ្នំពេញ​ត្រង់​ស្ថានីយ៍​អ្ន​ក​ដំណើរ​មកដល់​ ​និង​ស្ថានីយ៍​ចេញដំណើរ​ ​មាន​ភ្ញៀវ​ទេសចរ​ ​និង​ប្រជាពលរដ្ឋ​មួយចំនួន​ ​បាន​ជក់បារី​បង្ហុយផ្សែង​ពេញ​ស្ថានីយ៍​ទាំង២នោះ​ ​ដែល​ធ្វើឲ្យ​ប៉ះពាល់​ដល់​អ្នកដំណើរ​ផ្សេងទៀត​ ​និង​ប្រជាពលរដ្ឋ​ដែល​ទៅ​ទទួល​និង​ជូនដំណើរ​បងប្អូន​។​

តែ​យ៉ាងណា​ ​លោក​ថា​ ​បច្ចុប្បន្ន​ ​អាកាសយាន​ដ្ឋាន​អន្តរជាតិ​ភ្នំពេញ​ ​បាន​ធ្វើការ​កែសម្រួល​ច្រើន​ ​ដោយមាន​រៀបចំ​បន្ទប់​សម្រាប់​ជក់បារី​ ​និង​បាន​ដាក់​ទីតាំង​ជក់បារី​នៅ​ខាងក្រៅ​អគារ​ស្ថានីយ៍​ទាំងពីរ​នេះ​ ​ប៉ុន្តែ​ទីតាំង​ទាំងនោះ​ ​ស្ថិតនៅ​ក្រោម​សំយាប​ដំបូល​នៃ​អគារ​នៅឡើយ​ ​ដែល​ទាមទារ​ឲ្យ​មានការ​កែសម្រួល​បន្ថែម​ទៀត​ ​ឲ្យ​ស្រប​ទៅតាមច្បាប់​ ​និង​អនុក្រឹត្យ​នានា​ដែល​បាន​ចង្អុលបង្ហាញ​។​

​លោក​ថា​៖​ ​«​អីចឹង​យើង​ត្រូវ​ពិភាក្សា​គ្នា​ថា​ ​គួរ​ប្តូរ​ទីតាំង​កន្លែង​ជក់បារី​នោះ​ ​ទៅកាន់​សួនច្បារ​ ​ឬ​កន្លែងណា​មួយ​ដែល​មាន​វាល​លំ​ហរ​ផុត​ពី​ដំបូល​អាគារ៥ម៉ែត្រ​ ​សម្រាប់​ឲ្យ​អ្នក​ជក់បារី​ ​ទៅ​ជក់​នៅ​ទីនោះ​ ​ដើម្បីកុំឲ្យ​ផ្សែង​បារី​បង្ក​ផល​ប៉ះពាល់​ដល់​អ្នក​មិន​ជក់​»​។​

​លោក​ ហោ​ ​សា​រុន​ ​បាន​បន្ថែម​ថា​៖​ ​«​ដូច្នេះ​យើង​ត្រូវ​ធ្វើការ​រួមគ្នា​ ​ធ្វើ​ម៉េច​ជំរុញ​ឲ្យ​ព្រលា​នយន្ត​ហោះ​អន្តរជាតិ​របស់​យើង​ ​គ្មាន​ផ្សែង​បារី​»​។​

លោក​ ​គាំ​ ​ស៊ីនួន​ ​អនុប្រធាន​នាយកដ្ឋាន​ក្រសួងសុខាភិបាល​ ​បាន​មានប្រសាសន៍​ថា​ ​យោង​តាមច្បាប់​ស្តី​ពី​ការ​ត្រួតពិនិត្យ​ផលិតផល​ថ្នាំជក់​ ​និង​អនុក្រឹត្យ​ពាក់ព័ន្ធ​នានា​ ​បាន​ហាមឃាត់​ការ​ជក់បារី​ក្នុង​អគារ​នៃ​កន្លែង​ធ្វើការ​ ​និង​កន្លែង​សាធារណៈ​នានា​ ​ដូចជា​ ​ខាងក្នុង​មធ្យោបាយ​ធ្វើដំណើរ​សាធារណៈ​ ​បរិវេណ​នៃ​គ្រឹះស្ថានសិក្សា​ ​គ្រឹះស្ថាន​សុខាភិបាល​ ​គ្រឹះស្ថាន​សាសនា​ ​ទារកដ្ឋាន​ ​សួនកុមារ​ ​សួនច្បារ​សាធារណៈ​ ​សារមន្ទីរ​ ​រមណីយដ្ឋាន​វប្បធម៌​ប្រវត្តិសាស្ត្រ​ ​និង​កន្លែង​ងាយ​ឆាបឆេះ​ជាដើម​។​

​លោក​បន្ត​ថា​ ​ច្បាប់​និង​អនុក្រឹត្យ​ ​ក៏បាន​តម្រូវឲ្យ​ម្ចាស់​អាជីវកម្ម​ផលិតផល​ថ្នាំជក់​ ​ត្រូវ​បោះ​ពុម្ភ​សារ​ព្រមាន​សុខភាព​ជា​ភាសាខ្មែរ​ ​និង​ជា​រូបភាព​លើ​កញ្ចប់​ផលិតផល​ថ្នាំជក់​ទំហំ​ ​៥៥​%​ នៃ​ផ្នែក​ខាងលើ​សង្ខាង​នៃ​កញ្ចប់​ផលិតផល​ថ្នាំជក់​ ​អាច​តាំង​ផលិតផល​ថ្នាំជក់​បានតែ​មួយ​កញ្ចប់​ក្នុង​មួយ​ម៉ាក​នៅ​កន្លែង​លក់់​មួយ​ ​ទូ​ឬ​សម្ភារៈ​តាំង​ផលិតផល​ថ្នាំជក់​ត្រូវ​មាន​ពណ៌ត្នោត​ ​និង​មាន​ទំហំ​មិន​ឲ្យលើស​ពី ២០០០សង់ទីម៉ែត្រ​ការ៉េ​ ​ព្រមទាំង​ហាមឃាត់​នូវ​ការផ្សាយ​ពាណិជ្ជកម្ម​ផលិតផល​ថ្នាំជក់​តាម​គ្រប់​មធ្យោបាយ​ ​និង​គ្រប់​ទីកន្លែង​ផង​ដែរ​។

​ប៉ុន្តែ​ ​លោក​ថា​៖​ ​«​សម្រាប់​ហាង​ដែល​បាន​តាំង​លក់​ផលិតផល​ថ្នាំជក់​នៅ​ក្នុង​ព្រលា​នយន្ត​ហោះ​ ​យើង​ឃើញថា​មិនបាន​គោរព​ទៅតាមច្បាប់​និង​អនុក្រឹត្យ​របស់​យើង​ទេ​ ​គឺ​មានការ​តាំង​លក់​បារី​ច្រើន​កញ្ចប់​ ​មាន​ទីតាំង​ធំ​ ​និង​លើ​កញ្ចប់បារី​មាន​សារ​ព្រមាន​សុខភាព​តិចតួច​ ​ដែល​គួរ​មានការ​ពិនិត្យ​កែ​លម្អ​ឡើងវិញ​ឲ្យ​ស្រប​ទៅតាមច្បាប់​»​។​

​លោក​ ​អ៊ែ​ក​វេ​ ​បូ​ណាំង​ ​នាយក​គ្រប់គ្រង​ទូទៅ​នៃ​អាកាសយាន​ដ្ឋាន​អន្តរជាតិ​ភ្នំពេញ​ ​(​Mr​.​ ​Herve​ ​Bonin​,​ ​General​ ​Manager​ ​of​ ​Phnom​ ​Penh​ ​International​ ​Airport​)​ ​បាន​មានប្រសាសន៍​ថា​ ​អាកាស​យាន្ត​ដ្ឋាន​ ​នឹង​ធ្វើការ​កែសម្រួល​នូវ​ចំណុច​ខ្វះខាត​ ​ដោយ​ការរៀបចំ​ឡើងវិញ​នូវ​ទីតាំង​កន្លែង​ជក់បារី​ឲ្យ​ស្រប​នឹង​ច្បាប់​ ​រៀបចំ​ស្លាក​សញ្ញា​ហាម​ជក់បារី​ឲ្យបាន​ត្រឹមត្រូវ​និង​មាន​បន្ថែម​ជា​ភាសា​ចិន​ ​ដោយសារ​អ្នក​ជក់បារី​ភាគច្រើន​ជា​ជនជាតិ​ចិន​។​ 

លោក​បន្ត​ថា​ ​អាកាសយាន​ដ្ឋាន​ក៏​នឹង​ព្យាយាម​ជជែក​ជាមួយ​ម្ចាស់​អាជីវកម្ម​ដែល​ដាក់​តាំង​លក់​បារី​នៅ​ព្រលា​នយន្ត​ហោះ​ ​ឲ្យ​អនុវត្ត​ការ​ដាក់​តាំង​ស្រប​ទៅតាមច្បាប់​ដែល​បាន​កំណត់​ផង​ដែរ​។​ ​លោក​ថា​៖​ ​«​យើង​នឹង​ព្យាយាម​រក​វិធីសាស្ត្រ​ជាក់លាក់​ក្នុង​ការ​កែ​លម្អ​បញ្ហា​នេះ​ដោយ​អនុ​ឡោម​ទៅតាមច្បាប់​ដែល​បាន​កំណត់​»​។​

​ប្រធាន​អង្គការ​ចលនា​ដើម្បី​សុខភាព​កម្ពុជា​ ​លោក​វេជ្ជបណ្ឌិត​មុំ​ ​គង់​ ​ក៏បាន​ជំរុញ​ឲ្យ​មានការ​កែ​លម្អ​បន្ថែម​ទៀត​ ​លើ​បញ្ហា​ថ្នាំជក់​ ​ជាពិសេស​បញ្ហា​ដាក់​តាំង​លក់​កញ្ចប​បារី​ ​និង​ការផ្សាយ​ពាណិជ្ជកម្ម​បារី​ ​នៅក្នុង​អាកាសយាន​ដ្ឋាន​អន្តរជាតិ​ភ្នំពេញ​នេះ​ ​ដើម្បីឲ្យ​បរិស្ថាន​ក្នុង​អាកាសយាន​ដ្ឋាន​គ្មាន​ផ្សែង​បារី​។​

​លោក​ថា​៖​ ​«​ព្រោះ​ព្រលា​នយន្តហោះ​របស់​យើង​ ​មិន​ត្រឹមតែ​ពលរដ្ឋខ្មែរ​យើង​ទេ​ដែល​ប្រើប្រាស់​សេ​វា​ព្រលា​នយន្ត​ហោះ​ ​ប៉ុន្តែ​វា​ក៏​ជា​ចំណុច​ដំបូង​ដែល​ភ្ញៀវ​ទេសចរ​អន្តរជាតិ​ ​បាន​មើលឃើញ​ទឹកដី​កម្ពុជា​ផង​ដែរ​ ​អីចឹង​យើង​ចង់​ឲ្យ​ព្រលា​នយន្ត​ហោះ​របស់​យើង​ជា​កន្លែង​ដែល​មាន​ភាព​ស្រស់ស្រាយ​ ​ដែល​ផ្តល់​សុខភាព​ល្អ​ ​ទាំង​ការដកដង្ហើម​ល្អ​ទៅដល់​ប្រជាពលរដ្ឋ​ខ្មែរ​ក៏ដូចជា​ភ្ញៀវ​ទេសចរ​ដែល​មក​ទីនេះ​»​។​

​យោង​តាម​របាយការណ៍​របស់ក្រ​សួង​ទេសចរណ៍​ ​ក្នុង​ឆ្នាំ២០១៨​ ​កម្ពុជា​បាន​ទទួលភ្ញៀវ​ទេសចរ​អន្តរជាតិ​ចំនួន​ ​៦.២លាន​នាក់​ ​កើន​ ​១០.៧​%​ ​ធៀប​នឹង​ឆ្នាំ២០១៧​ ​ក្នុង​នោះ​ភ្ញៀវ​ទេសចរ​ធ្វើដំណើរ​តាមផ្លូវអាកាស​មាន​ ​៦៦.១​%​ ​ហើយ​មក​តាមអាកាស​យានដ្ឋាន​អន្តរជាតិ​ភ្នំពេញ​ចំនួន​ជិត២លាន​នាក់ ​៕​

ប្រភព ៖ khmertimes