CamNews

ព័ត៌មានអន្តរជាតិ ៖ លោក Dan Heyman អ្នករាយការណ៍ព័ត៌មានឱ្យ Public News Service បាននិយាយថា រូបលោកត្រូវបានចាប់ខ្លួន នៅក្នុងរដ្ឋ West Virginia Capitol  បន្ទាប់ពីព្យាយាមសួររដ្ឋមន្រ្ដីសុខាភិបាល លោក Tom Price  នូវសំណួរមួយអំពីសេចក្ដីព្រាងច្បាប់ស្ដីពីការថែទាំសុខភាព ដែលអនុម័តដោយសភា ដើម្បីលុបចោល និងជំនួសគម្រោងសុខភាព ObamaCare ។

នៅក្នុងសន្និសីទកាសែតមួយ ដែលបានប្រារព្ធធ្វើឡើងរយៈពេលខ្លី បន្ទាប់ពីការប្រកាសដោះលែងរូបលោក លោក  Heyman បាននិយាយថា លោកបានសួរ លោក Price ម្តងហើយម្តងទៀតអំពីថាតើ អំពើហិង្សាក្នុងគ្រួសារ ត្រូវបានចាត់ទុកជាមុនថា ជាជំងឺ យោងតាមសេចក្ដីព្រាងច្បាប់ថ្មីស្ដីពីការថែទាំសុខភាព GOP  នេះ ឬយ៉ាងណា។

យោងតាមគណនីរបស់ Heyman ឱ្យដឹងថា លោក បានរង់ចាំលោក Price អញ្ជើញមកក្នុងអគារ  ហើយបន្ទាប់មក លោក បានដើរកាត់​មុខអ្នកអមដំណើរលោក Price ដោយកាន់ទូរស័ព្ទក្នុងដៃរបស់ខ្លួន ហើយបានសួរសំណួរច្រំដែលដល់លោកអំពីការថែទាំសុខភាព។ លោក Heyman  បានបន្ថែមថា អ្នកកាសែតមួយចំនួនផ្សេងទៀត ក៏ចង់លើកឡើងពីបញ្ហា នៃគម្រោងធានារ៉ាប់រងជំងឺជាមុន ( preexisting conditions ) នេះដែរ។
លោកបាននិយាយថា ប៉ូលីសក្រុងកាពីតូល៖ "បានសម្រេចថា ខ្ញុំរឹងរួសក្នុងការសួរសំណួរនេះហើយព្យាយាមធ្វើការងាររបស់ខ្ញុំ ដូច្នេះហើយទើបពួកគេចាប់ខ្លួនខ្ញុំ»។

លោកនិយាយថា លោកមិនអាចចាំបានថា តើខ្លួនបានសួរសំនួរនេះប៉ុន្មានដងនោះទេ ប៉ុន្តែលោកបានបន្ថែមថា វាជាការងាររបស់លោក ក្នុងការសួរសំណួរ ដោយមិនជឿថា ខ្លួនត្រូវបានចាប់ខ្លួននោះទេ។

លោកថា៖ "ពេលដំបូង ខ្ញុំមិនធ្លាប់ត្រូវបានចាប់ខ្លួន ពីបទសួរសំណួរសោះឡើយ ។ ពេលដំបូង ខ្ញុំមិនធ្លាប់បានឮថានរណាម្នាក់ ដែលរងការចាប់ខ្លួនពីបទសួរសំណួរនោះទេ"។

លោក Heyman បាននិយាយថា លោកបានសួរសំណួររបស់ខ្លួន នៅក្នុងកន្លែងសាធារណៈ ហើយមិនបានទទួលការព្រមានថា លោកប្រព្រឹត្ដខុសនោះទេ ឬបានធ្វើទង្វើផ្សេងទៀត  ដែលនាំឱ្យមានការចាប់ខ្លួនលោកដែរ។

លោកបាននិយាយថា៖ "គ្មានប៉ូលីសណាម្នាក់ ប្រាប់ខ្ញុំថា"អ្នកមកកន្លែងខុសហើយនោះទេ "។ ប៉ូលីស បាន"ដាក់ដៃនៅលើស្មារបស់ខ្ញុំ ប៉ុន្ដែពួកគេមិនបានធ្វើបាបរាងកាយខ្ញុំទេ”។

លោក Heyman បានបង់ប្រាក់ធានាខ្លួន ពីការចាប់ខ្លួន ៥,០០០ ដុល្លារ និងត្រូវបានចោទប្រកាន់​ ពីបទបង្កការរំខានដោយចេតនា ដល់ដំណើរការរបស់រដ្ឋាភិបាល ដែលជាបទល្មើសមជ្ឈិម៕

 ប្រែសម្រួល ៖ សារ៉ាត

ប្រភព ៖ The Hill