CamNews

ភាពងងុយគេង គឺជាលទ្ធផលដ៏សាមញ្ញបំផុត ពីការគេងមិនបានសមស្រប ឬគេងមិនបានគ្រប់គ្រាន់។ ជាក់ស្ដែង ការងងុយគេងខ្លាំងនៅពេលថ្ងៃ អាចជាសញ្ញាមួយនៃវិបត្ដិដំណេក។ ទិដ្ឋភាពផ្លូវអារម្មណ៍រួមមានដូចជា ការធ្លាក់ទឹកចិត្ដ ការថប់អារម្មណ៍ ស្រ្ដេស ភាពធុញទ្រាន់ក៏អាចបណ្ដាលឱ្យកើតមាននូវវិបត្ដិដំណេកនេះដែរ។ ភាពងងុយគេង អាចជះឥទ្ធិពលទៅលើផលិតភាពការងាររបស់អ្នក និងបង្កក្ដីរំខានដល់ជីវិតផ្ទាល់ខ្លួនរបស់អ្នក។ ដោយការផ្លាស់ប្ដូររបៀបរស់នៅ ការទទួលទានអាហារល្អចំពោះសុខភាព និងការរៀបចំគំរូគេងឱ្យបានសមស្រប អ្នកអាចប្រឆាំងនឹងភាពងងុយគេងបានយ៉ាងងាយស្រួល។ ប៉ុន្ដេទោះជាយ៉ាងណា សូមធ្វើការប្រឹក្សាជាមួយវេជ្ជបណ្ឌិត ប្រសិនបើអ្នកចាប់ផ្ដើមមានអារម្មណ៍ងងុយគេង ក្រោយពីអ្នកចាប់ផ្ដើមប្រើថ្នាំថ្មីប្រភេទណាមួយ លេបថ្នាំច្រើនលើសកំណត់ ឬរងរបួសផ្នែកក្បាល។  ខាងក្រោមនេះ យើងសូមណែនាំអ្នក ពីវិធីមួយចំនួន ដែលជួយអ្នកឱ្យបាត់នូវភាពងងុយគេង៖

១. ការគេងមិនបានគ្រប់គ្រាន់ និងគេងមានសម្លេងរំខាន គឺជាហេតុផលពីរដ៏ចំបង នៅពីក្រោយការងងុយគេងពេលថ្ងៃ។ ដូច្នេះ ការកំណត់កាលវិភាគគេងឱ្យបានសមស្រប គឺជាវិធីសាស្រ្ដមួយដ៏ប្រសើរ ដើម្បីបង្ការភាពងងុយគេងពេលថ្ងៃ។ ការគេងបានប្រក្រតី នឹងជួយអ្នកការពារប្រឆាំងនឹងការធ្លាក់ចុះថាមពលរាងកាយ ការស្រុតចុះកម្លាំង ការធ្លាក់ទឹកចិត្ដ និងស្រ្ដេស។ មនុស្សផ្សេងៗពីគ្នា គាត់ត្រូវការនូវបរិមាណនៃពេលវេលាគេងខុសគ្នាដើម្បីជួយឱ្យរាងកាយបំពេញមុខងារបានប្រក្រតី ប៉ុន្ដែទោះជាយ៉ាងណា ពេលវេលានៃការគេង ពី ៧ ទៅ ៨ម៉ោងក្នុងមួយយប់គឺគ្រប់គ្រាន់ ដើម្បីជួយឱ្យរាងកាយរបស់អ្នកបំពេញមុខងារបានប្រក្រតី។ ខាងក្រោមនេះជាវិធីជួយឱ្យអ្នកគេងលក់ស្រួល៖

• រក្សាកាលវិភាគគេង ដែលកំណត់ឱ្យបានច្បាស់លាស់ពីពេលវេលាគេង និងពេលក្រោកពីគេង។
• រក្សាបន្ទប់គេងរបស់អ្នកកុំឱ្យមានពន្លឺ ដើម្បីលើកកម្ពស់ការគេងយ៉ាងសម្រាកសម្រាន្ដ។ ប្រសិនបើចាំបាច់ សូមប្រើក្រណាត់ ឬវាំងនន ដើម្បីបិទកុំឱ្យពន្លឺជះពីខាងក្រៅ។
• ប្រើពូក ដែលមានគុណភាពល្អ និងកម្រាល និងខ្នើយទន់ៗ ដើម្បីលើកកម្ពស់គុណភាពដំណេករបស់អ្នក។
• អានសៀវភៅ ឬធ្វើយូហ្កា ឱ្យបាន ២០នាទី មុនពេលចូលគេង។
• កំណត់ការសំឡឹងមើលអេក្រង់កុំព្យូទ័រ ទូរទស្សន៍ ឬទូរស័ព្ទដៃឱ្យបានសមស្របមុនពេលចូលគេង។

២. ចាប់ផ្ដើមថ្ងៃថ្មីរបស់អ្នកជាមួយនឹងពន្លឺព្រះអាទិត្យ៖ សូមឱ្យខ្លួនរបស់អ្នកប៉ះនឹងពន្លឺព្រះអាទិត្យឱ្យបានរាល់ថ្ងៃ។  ការប៉ះនឹងពន្លឺព្រះអាទិត្យនឹងជួយអ្នកប្រុងជើងការ និងមានថាមពលពេញមួយថ្ងៃ ហើយនឹងបង្ការភាពងងុយគេងពេលថ្ងៃ។ ជាក់ស្ដែងពន្លឺព្រះអាទិត្យ ជួយគ្រប់គ្រងវដ្ដនៃការគេង និងការភ្ញាក់ពីគេងរបស់អ្នក ពីព្រោះវាជួយឱ្យខួរក្បាលចងចាំថា ពេលណាត្រូវភ្ញាក់ពីគេង។ ម្យ៉ាងទៀត ពន្លឺព្រះអាទិត្យជួយឱ្យរាងកាយផលិតចេញនូវវីតាមីនD។ ការសិក្សាស្រាវជ្រាវមួយ កាលពីឆ្នាំ ២០១៣ ចុះផ្សាយនៅក្នុងទស្សនាវដ្ដីឱសថជំនួយការគេងបានណែនាំថា ភាពកង្វះវីតាមីនD អាចមានទំនាក់ទំនងទៅនឹងបញ្ហាគេង ជាពិសេសភាពងងុយគេងពេលថ្ងៃ។

៣. ប្រោសទឹកត្រជាក់លើមុខរបស់អ្នក៖  នៅពេល ដែលអ្នកមានអារម្មណ៍ងងុយគេង សូមប្រោសទឹកត្រជាក់ទៅលើមុខរបស់អ្នក។ ការផ្លាស់ប្ដូរសីតុណ្ហភាពភ្លាមៗជួយបំបាត់អារម្មណ៍ងងុយគេង និងលើកកម្ពស់កម្រិតថាមពល ព្រមទាំងជួយឱ្យផ្ដោតអារម្មណ៍បានល្អផងដែរ។ ក្រោយពេលប្រោសទឹកត្រជាក់នៅលើមុខរបស់អ្នក សូមឈរបែរមុខទៅម៉ាស៊ីនត្រជាក់ ដើម្បីធ្វើឱ្យការព្យាបាលដោយទឹកនេះកាន់តែមានប្រសិទ្ធភាពខ្ពស់។ ម្យ៉ាងទៀត អ្នកអាចងូតទឹកត្រជាក់នៅពេលព្រឹកដើម្បីបំបាត់ចោលភាពងងុយគេង និងលើកកម្ពស់ចរន្ដឈាមរត់ផងដែរ ៕

ប្រែសម្រួល៖ សារ៉ាត

ប្រភព៖ steptohealth