ព័ត៌មានអន្តរជាតិ ៖ ក្រុមកោសល្យវិច័យ ប្រទេស អ៊ីរ៉ាក់ បានជីកគាស់ កកាយ រកឃើញសពខ្មោច ៤៩៩ នាក់ពីផ្នូរច្រើនកន្លែង នៅក្នុងបរិវេណសម្បទា ប្រធានាធិបតី កណ្តាល ទីក្រុង Tikrit ប្រទេស អ៊ីរ៉ាក់ នេះបើយោងតាមការគូសបញ្ជាក់អោយដឹង ពីមន្រ្តីកំពូល បម្រើការ នៅឯឈាបនដ្ឋាន មាន ភារកិច្ចចម្បង ក្នុងប្រតិបត្តិការខាងលើ ។
សេចក្តីរាយការណ៍ បញ្ជាក់អោយដឹងថា បណ្តាសពខ្មោចទាំងអស់នេះ ត្រូវ បានគេមានជំនឿជាក់ អោយដឹងថា គឺជាសព យោធា ប្រទេស អ៊ីរ៉ាក់ ដែល ISIS ធ្លាប់បានអះអាងថា បានសម្លាប់ចោល រង្គាល អំឡុងខែ មិថុនា ឆ្នាំ ២០១៤ កន្លងទៅ ។ របាយការណ៍ដដែលបន្តអោយដឹង ថា បណ្តាសាក សពដែលត្រូវបានប្រទះឃើញ ត្រូវបានក្រុមការងារ យកទៅរក្សាទុក នៅឯឈាបនដ្ឋានមួយកន្លែង កណ្តាលទីក្រុង បាដាដ ស្របពេលដែល ក្រុមកោសល្យវិច័យ កំពុងតែ ធ្វើការ តាមដាន និងស៊ើប អង្កេត ក៏ដូចជា ធ្វើតេស្តិ៍ ។
ប្រភពដដែលបន្តអោយដឹងថា បណ្តាសាកសពទាំងអស់ ពុំ ទាន់បញ្ជូន ទៅ អោយគ្រួសារសពនៅ ឡើយទេ ស្របពេលដែល ក្រុមការងារ កោសល្យវិច័យកំពុង តែតាមដានបន្តទៀត ទៅលើការជីក គាស់កកាយផ្នូរ ជាច្រើនកន្លែង នៅក្នុងប្រទេស ៕
ប្រែសម្រួល ៖ កុសល
ប្រភព ៖ ប៊ីប៊ីស៊ី