CamNews

ព័ត៌មានអន្តរជាតិ ៖ សារព័ត៌មានកំសាន្តយើងខ្ញុំ កាលពីម្សិលមិញនេះ ធ្លាប់ លើក ឡើងរួចម្តងមក ហើយទាក់ទងទៅនឹងប្រធានបទក្តៅ ពេជ្រខៀវដ៏កម្រ នោះគឺ Blue Diamond ទំហំ ១២,០៣ការ៉ាត់ ដែលបានដាក់ដេញថ្លៃនៅក្នុងទីក្រុង Geneva ត្រូវសេដ្ឋីក្រុងហុងកុង ដេញថ្លៃ យកទាល់តែបាន។

ប្រភព បញ្ជាក់អោយដឹងថា សេដ្ឋី អចលនទ្រព្យមកពីក្រុងហុងកុង លោក Joseph Lau បានដេញ ថ្លៃទិញទាល់តែបាន ពេជ្រខៀវដ៏កម្រ និងល្អវិចិត្រមួយនេះ ក្នុងតម្លៃមួយថ្លៃ ខ្ពស់កប់ពពកដល់ទៅ ៤៨លានដុល្លារ។ ច្រើនជាងនេះទៅទៀត អ្វីដែលជាភាពភ្ញាក់ផ្អើលនោះគឺថាការដេញថ្លៃបញ្ជាទិញ ទាល់តែបាន ពេជ្រខៀវលើកនេះ គឺលោកយកវាធ្វើជាកាដូជូនទៅ  កូនស្រីសំណព្វ របស់ខ្លួនដែល មានវ័យទើបតែ ៧ ឆ្នាំ។ លោកបានដាក់ឈ្មោះពេជ្រនោះសាជាថ្មីតាមឈ្មោះកូនស្រីរបស់ខ្លួននោះ គឺ "Blue Moon of Josephine" ។

សាលដេញថ្លៃ នៅក្នុងទីក្រុង Geneva    ប្រទេស  ស្វីស ពោល  សាល Sotheby អោយដឹងថា ការ ដាក់ដេញថ្លៃ​តម្លៃពេជ្រខៀវខ្ពស់កប់ពពកលើកនេះ​ គឺបំបែកកំណត់ត្រាប្រវត្តិសាស្រ្តពិភពលោកនៃ ការដេញថ្លៃពេជ្រគ្រប់ពណ៌ គ្រប់ទម្រង់ទាំងអស់ ។ គួរបញ្ជាក់ថា នេះមិនមែនជាលើកទី ១ នោះទេ ដែលសេដ្ឋីលំដាប់ជួរមុខ វិស័យអចលនទ្រព្យក្រុងហុងកុង បញ្ជា ទិញពេជ្រសម្រាប់កូនស្រីវ័យ ៧ ឆ្នាំរបស់ខ្លួន ពោល លោកក៏បានដេញថ្លៃ បញ្ជាទិញទាល់តែបាន  ដូចគ្នាដែរ ទៅលើ ពេជ្រផ្កាឈូក ទំហំ ១៦,០៨  ការ៉ាត់  ក្នុងតម្លៃ ២៨,៥ លាន   ដុល្លារ ដូចគ្នាដែរ សម្រាប់កូនស្រីតូចរបស់លោក ។ ច្រើន ជាងនេះ ប្រភពឲ្យអោយដឹងថា អំឡុងឆ្នាំ ២០០៩ លោកក៏ បាន  បញ្ជាទិញ ពេជ្យខៀវរួចម្តង មកហើយ សម្រាប់ Josephine ក្នុងតម្លៃ ៩,៥ លានដុល្លារ មានទំហំ ៧,០៣ ការ៉ាត់ ។

របាយការណ៍ បញ្ជាក់អោយដឹងថា សេដ្ឋីអចលនទ្រព្យក្រុង ហុងកុង លោក Lau រងនូវការចោទប្រ កាន់ពីបទស៊ីសំណូក និងលាងលុយកខ្វក់ អំឡុងឆ្នាំ ២០១៤ កន្លងទៅនេះ  ។ លោកត្រូវបានតុលា ការក្រុង ម៉ាកាវ ផ្តន្ទាទោស អោយជាប់ពន្ធនាគារ រយៈពេល ៥ ឆ្នាំ ពីការចោទប្រកាន់ខាងលើ ប៉ុន្តែ លោកមិនបានជាប់ពន្ធនាគារនោះទេ បន្ទាប់ពីអវត្តមាននៅក្នុងប្រទេសចិន។ គួររំឮកថា ពុំមានកិច្ច ព្រមព្រៀងបត្យាប័នរវាងក្រុងហុងកុង និងម៉ាកាវនោះទេ ៕

- អាន ៖ ពេជ្រខៀវ ដ៏វិចិត្រ ទំហំ ១២ ការ៉ាត់ ដេញថ្លៃ តម្លៃ ៤៨លានដុល្លារ បំបែកកំណត់ត្រា ប្រវត្តិសាស្រ្ត ពិភពលោក

ប្រែសម្រួល ៖ កុសល

ប្រភព ៖ ប៊ីប៊ីស៊ី