CamNews

(ភ្នំពេញ)៖ បន្ទាប់ពីផ្ទុះរឿងអាស្រូវហែកហួរគ្នា ទៅលើតារាសម្ដែង និងជាពិធីការិនី​ ប្រចាំក្នុង​ស្ថានីយទូរទស្សន៍ប៉ុស្ដិ៍លេខ៨ (TV8) នាង សូរ អេណា ថាបានឆក់ដណ្ដឹមប្ដីគេ ថែមទាំងផ្គើននឹងប្រពន្ធដើម ធ្វើឲ្យល្បីកក្រើកពេញបណ្ដាញព័ត៌មានក្នុងស្រុករួចមក ថ្មីៗនេះបានលេចឮដំណឹងល្ហិចល្ហៀងល្បីមកថា ពិធីការិនី សូរ អេណា ត្រូវបានស្ថានីយទូរទស្សន៍ ប៉ុស្ដិ៍លេខ៨ ដកបញ្ឈរជើងចោល ដើម្បីកុំឲ្យប៉ះពាល់ដល់កេរ្តិ៍ឈ្មោះរបស់ស្ថានីយ។

រឿង​រ៉ាវតារាស្រីមិនសូវល្បី កញ្ញា សូរ អេណា តារាម៉ូឌែលរបស់ក្រុម សាន់ម៉ូឌែល ដែល​ត្រូវបានភាគីខាងប្រពន្ធដើមហែកហួរ និង​មហាជនក្នុងបណ្ដាញសង្គម តិះដៀលខ្លាំងៗ ព្រោះតែនាងហ៊ានយកប្ដីគេ មកឲ្យនឹងដើមទ្រូង រួចហៅថា ប៉ាប៉ា ។ ក្រៅពី សូរ អេណា ម្នាក់ឯង ក្ដៅក្រហាយមិនអស់ចិត្ត បែរជាធ្វើឲ្យម្ដាយអ្នកនាង សារាយ សក្ខណា រងគ្រោះជាប់ឈ្មោះ​ជាម៉ែយ៉ែម ខណៈដែលអ្នកស្រី សម្ភស្ស ជាមនុស្សម្នាក់​ដែលអ្នកសិល្បៈ គោរពស្រឡាញ់ ព្រោះលោកស្រី ក៏ជាអ្នកសិល្បៈម្នាក់ដែរ​។

កញ្ញា សូរ អេណា ត្រូវបានគេមើលឃើញថា មិនមានស្នាដៃអ្វីសម្ដែងច្រើនឡើយ ហើយក៏មិនប្រឡូកក្នុងសិល្បៈជាប់លាប់ដែរ ទើបតែមួយរយៈក្រោយនេះ ឃើញនាងចាប់អាជីព ធ្វើជាពិធីការិនី ឲ្យទូរទស្សន៍ស៊ីធីវី៨ (TV8) ដែលជាស្ថានីយទូរទស្សន៍មួយថ្មី បំបែកចេញពីទូរទស្សន៍​ខ្សែកាប រាជធានីភ្នំពេញ​។ សូរ អេណា ​បានកាន់កាប់កម្មវិធី «ចំណូលចិត្តតារា» ដែលជាកម្មវិធីថ្មី មានប្រជាប្រិយភាពមធ្យម ព្រោះទើបតែបង្កើតថ្មី។ ប៉ុន្តែប្រភពពីក្នុងស្ថានីយ បានលួចខ្សឹបប្រាប់ថា ស្ថានីយឲ្យនាង សូរ អេណា សម្រាកមួយរយៈសិន ព្រោះនាង ហាក់លែងចង់ប្រឡូកសិល្បៈ ដោយសាររឿងអាស្រូវបញ្ច្រាស់ខ្យល់មួយនេះ​។

ពិធីការិនី សូរ អេណា មិនត្រឹមតែបានដកខ្លួន ចេញពីសិល្បៈទេ សូម្បីតែ Facebook របស់ខ្លួន ក៏នាងប្លុក (Block) ខ្លួនឯងចោលដែរ ព្រោះនាងមិនចង់ដឹង ចង់ឮរឿងអ្វីតទៅទៀតឡើយ ខណៈមហាជន​ជេរនាងដូចព្យុះមូសុងរដូវវស្សា។ សូរ អេណា បានព្យាយាមគេចចេញពីបញ្ហា ដោយការមិនឆ្លើយឆ្លង មិនតបត ហើយដើរចេញដោយស្ងៀមស្ងាត់។ នាងអាចយករួចខ្លួនត្រឹមតែ រយៈពេលខ្លីមួយប៉ុណ្ណោះ ព្រោះវិប្បដិសារី នឹងតាមជេរស្ដីនាងរហូត​ គ្មានថ្ងៃស្រាកស្រាន្ត។

តាំងពីមានរឿងផ្ទុះឡើងភ្លាម មហាជនសង្កេតឃើញថា សូរ អេណា មិនព្រមបង្ហាញជំហរដោះស្រាយអ្វីឡើយ ដែលនេះជាគំរូដ៏អាក្រក់ សម្រាប់អ្នកសិល្បៈ ព្រោះអ្នកសិល្បៈ នឹងត្រូវធ្លាក់តម្លៃ ព្រោះសម្បូរតារាប្រភេទនេះ តែបើសិនជាការពិតនាងត្រូវរកភាពស្អាត​ស្អំ និង​យុត្តិធម៌ ឲ្យខ្លួនឯង ទើបគេហៅថា ជាអ្នកសិល្បៈមានទំនួលខុសត្រូវខ្ពស់ ហ៊ានប្រឈមមុខការពិត ចំពោះទង្វើដែលខ្លួនបានប្រព្រឹត្ត៕

ផ្តល់សិទ្ធដោយ ៖ ខ្មែរថកឃីង