CamNews

(ញូវយ៉ក)៖ រដ្ឋាភិបាលសហព័ន្ធ​សហរដ្ឋអាមេរិក នៅថ្ងៃសុក្របានវិលត្រឡប់​ទៅដាក់ការិយាល័យ របស់ខ្លួននៅអគារពាណិជ្ជកម្មពិភពលោកវិញ ដោយស្ថិតនៅសង្កាត់ Lower Manhattan នៃទីក្រុងញូយ៉ក ដែលការវិលត្រឡប់នេះ បានធ្វើឡើងក្នុងរយៈ​ពេល១៥ឆ្នាំ បន្ទាប់ពីព្រឹត្តិការណ៍ថ្ងៃទី១១ ខែកញ្ញា ឆ្នាំ២០០១កន្លងទៅនេះ ដែលបណ្តាលឲ្យអគារភ្លោះ ពាណិជ្ជកម្មពិភពលោក បានដួលរលំខ្ទេចខ្ទី។

រដ្ឋមន្ត្រីសន្តិសុខអាមេរិក លោក Jeh Johnson បានថ្លែងក្នុងព្រឹត្តិការណ៍នេះ ដែលរៀបចំឡើង នៅក្នុងអគារជាន់ទី ៦៣ថា«ថ្ងៃនេះជាថ្ងៃចម្រើនទៅមុខ ជានិមិត្តសញ្ញានៃកិច្ច​ខិតខំប្រឹងប្រែង របស់យើងក្នុងការឆ្ពោះ​ទៅមុខ»។ ចំណែកលោក Bill de Blasio អភិបាលក្រុង ញូយ៉ក បានថ្លែងថា ការវិលត្រឡប់ទៅដាក់ស្នាក់ការ នៅអគារពាណិជ្ជកម្មពិភពលោក របស់រដ្ឋាភិបាល សហព័ន្ធ ជាសារដ៏សំខាន់ប្រាប់​ទៅកាន់ពិភពលោកទាំងមូលថា «សហរដ្ឋអាមេរិក មិនលះបង់តម្លៃរបស់ខ្លួនឡើយ ហើយក៏មិនដែលខ្លាចញញើត ចំពោះភេរវកម្មដែរ»។

អគារនេះ ត្រូវបានគេចាត់ទុកថា ជាអគារសេរីភាព ដែលមានចំនួន ១០៤ជាន់។ មជ្ឈមណ្ឌលពាណិជ្ជកម្មពិភពលោក​មួយនេះ ជាអគារខ្ពស់ស្កឹមស្កៃជាងគេ នៅក្នុងរដ្ឋ Hemisphere ខាងលិច ដែលមានកម្ពស់៥៤១ម៉ែត្រ។

សំណង់អគារនេះ ត្រូវបានចាប់ផ្តើមកសាងឡើង ក្នុងឆ្នាំ២០០៦ និងបើកសម្ភោធដាក់ឲ្យ ប្រើប្រាស់ ជាផ្លូវការនៅក្នុងឆ្នាំ២០១៤កន្លងទៅនេះ។ បច្ចុប្បន្ន៦៧ភាគរយ នៃអគារដែលមាន ផ្ទៃក្រឡាជិត ១.៥លានម៉ែត្រាការេ ត្រូវបានគេជួល​អស់ហើយ។

គួរបញ្ជាក់ថា ក្នុងព្រឹត្តិការណ៍ថ្ងៃទី១១ ខែកញ្ញា ឆ្នាំ២០០១កន្លងទៅនេះ យន្តហោះ សហរដ្ឋអាមេរិក៤គ្រឿង ត្រូវបានក្រុមភេរវករប្លន់ ព្រមទាំងបើកបុកអគារ​ភ្លោះពាណិជ្ជកម្ម ពិភពលោកនៅបុរីញូវយ៉ក និង អគារមន្ទីរប៉ង់តាហ្គោន ក្បែររដ្ឋធានីវ៉ាស៊ីនតោន​DC និងទីវាលមួយកន្លែងក្នុងរដ្ឋ Pennsylvania ដែលបណ្តាលឲ្យមនុស្សជិត ៣,០០០នាក់ ស្លាប់បាត់បង់ជីវិត៕

ផ្តល់សិទ្ធដោយ ៖ ខ្មែរថកឃីង