CamNews

សវនាការ​ទាក់ទិន​នឹង​រឿងក្ដី​រវាង Selena Gomez និង​ក្រុមហ៊ុន​ផលិត​ទឹកអប់ Adrenalina បាន​ត្រូវ​លុបចោល ដោយ​តុលាការ Los Angeles ។ ប៉ុន្ដែ ករណីនេះ ត្រូវបាន​គេ​យល់ថា​នឹងត្រូវ​បញ្ចប់​ដោយ Selena Gomez ត្រូវ​ខាតបង់​ប្រាក់ រាប់លាន​ដុល្លារ​អាមេរិក។

កំពូល​តារាចម្រៀង​ស្រី​ស្រស់​រូប​ស្អាត អាយុ ២០ឆ្នាំ Selena Gomez ត្រូវបាន​ក្រុមហ៊ុន Adrenalina ដែលមាន​ទីស្នាក់ការ​ធំ​នៅ Florida ដាក់​ពាក់​ពាក្យ​ប្ដឹង កាលពី​ខែឧសភា កន្លងទៅ ដោយ​ពួកគេ​បាន​ចោទថា នាង​បានធ្វើឱ្យ​ខាតបង់​ប្រាក់​រាប់លាន​ដុល្លារ​អាមេរិក ក្នុង​គម្រោង​ផលិត​ស្រ​ឡាយ​ទឹកអប់​ថ្មី ដែលមាន​ឈ្មោះថា Selena ។ ជាក់ស្ដែង ក្រុមហ៊ុន​នេះ បាន​ចំណាយ​ប្រាក់ ២លាន​ដុល្លារ​សម្រាប់​ប្រព័ន្ធ​ផលិត និង​ផ្សាយពាណិជ្ជកម្ម។ ចំណែក Selena ក៏បាន​យល់ព្រម​ធ្វើជា​អ្នកតំណាង​របស់​ផលិតផល​នេះ នា​ឆ្នាំ ២០១១ ។

បច្ចុប្បន្ន ក្រុមហ៊ុន​នេះ បាន​ផ្អាក​ដំណើរការ ហើយ​បាន​ចោទប្រកាន់ថា Selena មិនបាន​គោរព​ទៅតាម​កិច្ចសន្យា​ក្នុងការ​ឃោសនា​ផលិតផល​នេះ។ នាង​បាន​បដិសេធ ការអញ្ជើញ​ឱ្យចូល​រួម​ព្រឹត្តិការណ៍​នានា​នៅ Macy, Miami ក៏ដូចជា​ដំណើ​ឃោសនា​នៅ Mexico ។

អ្វីដែល​គួរឱ្យ​ចាប់អារម្មណ៍ គឺថា អ្នកគ្រប់គ្រង និង Selena បាន​ផ្ញើលិខិត​មួយច្បាប់​ឱ្យដឹងថា Selena នឹង​បញ្ចប់​កិច្ចសន្យា​នេះ ក្នុង​រយៈពេល ៣០ថ្ងៃ។ ការសម្រេចចិត្ត​ដ៏​គួរឱ្យភ្ញាក់ផ្អើល​នេះ បានធ្វើឱ្យ​មានការ​ខាតបង់​បន្ទាប់​នោះ។ ក្រុមហ៊ុន Victory International ក៏បាន​ស្នើឱ្យ Selena បង់ប្រាក់​សំណង ១,២លាន​ដុល្លារ ដោយសារតែ​ពួកគេ​ក៏បាន​សហការ​ណ៍​វិនិយោគ​ជាមួយ Selena ។

ភាគី​ខាង Selena បាន​ទាត់ចោល​នូវ​ព័ត៌មាន​នេះ និង​បាន​អះអាងថា នាង​បាន​ដកខ្លួន​ពី​កិច្ចសន្យា​នេះ គឺ​ព្រោះតែ​ក្រុមហ៊ុន Adrenalina បាន​ជំពាក់​ប្រា​ក់នាង ដល់​ទៅ ៥,២លាន​ដុល្លារ និង​មិនបាន​ទូទាត់​សង​ដល់​នាង។ ក្រុមហ៊ុន Adrenalina មុននេះ បាន​ចុះកិច្ចសន្យា​ថា​នឹង​ផ្ដល់ប្រាក់​ឱ្យ Selena ចំនួន ៥% នៃ​ប្រាក់ចំណូល​បានមកពី​ការលក់​ទឹកអប់​ដែលមាន​ឈ្មោះ​នាង ហើយ​ទឹកប្រាក់​នោះ បាន​កើន​ដល់ ៥,២លាន​ដុល្លារ​អាមេរិក។

ប្រភពពី​ទំព័រ TMZ ឱ្យដឹងថា Selena នឹង​ប្ដឹង​ប្រឆាំង​តប​ទៅនឹង​ក្រុមហ៊ុន Adrenalina វិញ ដោយ​នឹង​ចោទ​ក្រុមហ៊ុន​នេះ​ថា បាន​កិបកេង​ប្រាក់​របស់​នាង។ ប៉ុន្ដែ បើទោះជា​ចុងបញ្ចប់ តុលាការ​សម្រេច​បែបណា​ក្ដី Selena ក៏​នៅតែ​ត្រូវ​ចំណាយ​ប្រាក់​រាប់លាន​ដុល្លារ ដើម្បី​ឡើង​តុលាការ។
 

ដោយ ៖ តារា
ប្រភព ៖ TMZ/Dailymail