គណបក្សសិទ្ធិមនុស្ស និងគណបក្សសមង្ស៊ី បានប្រកាស ថា នឹងបង្កើតគណបក្សថ្មីមួយ
នៅរសៀលថ្ងៃទី១៧ ខែកក្កដា ឆ្នាំ២០១២ គណបក្សសិទ្ធិមនុស្ស និងគណបក្សសមង្ស៊ី បានប្រកាស
ថា នឹងបង្កើតគណបក្សថ្មីមួយ ដែលនឹងមានលោក សម រង្ស៊ី ជាប្រធាន ហើយលោក កឹម សុខា ជា
អនុប្រធាន។
នៅក្នុងសន្និសីទកាសែត នៅទីស្ដីការគណបក្ស សម រង្ស៊ី តាមរយៈ Video Conference ពីទីក្រុង
ម៉ានីល ប្រទេសហ្វីលីពីន នៅរសៀលថ្ងៃទី១៧ ខែកក្កដា មេដឹកនាំគណបក្សទាំងពីរ លោក កឹម
សុខា និងលោក សម រង្ស៊ី បានថ្លែងទៅកាន់អ្នកយកព័ត៌មានជាតិ និងអន្តរជាតិថា ពួកគាត់បាន
ព្រមព្រៀងគ្នាបង្កើតចលនាប្រជាធិបតេយ្យសង្គ្រោះជាតិ និងបង្កើតគណបក្សថ្មីមួយនៅពេលខាង
មុខ ដែលស្ថាប័នទាំងពីរនេះ លោក សម រង្ស៊ី ជាប្រធាន និងលោក កឹម សុខា ជាអនុប្រធាន ដើម្បី
ទល់ប្រកួតប្រជែងជាមួយនឹងគណបក្សកាន់អំណាចបច្ចុប្បន្ន។
លោក សម រង្ស៊ី បានមានប្រសាសន៍ថា «យើងបានសម្រេចជាប្រវត្តិសាស្រ្ត ចាប់ពីថ្ងៃនេះទៅឆាក
នយោបាយនៅប្រទេស កម្ពុជាមានការផ្លាស់ប្តូរដ៏សំខាន់។ សេចក្តីសម្រេចនេះគឺជាការសម្រេច
រវាងគណបក្សទាំងពីរ ដែលប្តេជ្ញាចិត្ត បំពេញបេសកកម្មស្រោចស្រង់ប្រទេសជាតិជាមួយគ្នា….»
ទោះបីជាយ៉ាងនេះក្ដី ទាំងលោក កឹម សុខា និងលោក សម រង្ស៊ី មិនទាន់បញ្ជាក់ច្បាស់លាស់នៅ
ឡើយថា តើគណបក្សបង្កើតថ្មីនោះមានឈ្មោះអ្វី និងបង្កើតនៅក្នុងខែណានោះទេ។ គួរបញ្ជាក់ថា
រយៈពេលជាងមួយខែមកហើយ ដែលគណបក្សទាំងពីរបានគិតគូរអំពីការបង្កើតគណបក្សថ្មីនេះ
ប៉ុន្តែ នៅតែមិនទាន់អាចនិយាយឲ្យដាច់ស្រឡះបាន អំពីឈ្មោះគណបក្សថ្មីនោះ។ ហើយតើគណ
បក្សថ្មីនោះ នឹងមានន័យបែបណា នៅពេលដែលលោកសមរង្ស៊ីដែលជានឹងក្លាយជាប្រធាននោះ
មិនអាចធ្វើនយោបាយនៅក្នុងប្រទេសបាន ដោយសារតែលោករស់នៅក្រៅប្រទេស គេចចេញពី
ការចាប់ឃុំខ្លួននៅពន្ធនាគារ ពីព្រោះតែលោកត្រូវតុលាការផ្តន្ទាទោសក្នុងរឿងដកបង្គោលព្រំដែន។
ដោយ៖ មិនា
ប្រភព៖ សរុប
- អំណោយសម្រាប់ថ្ងៃចូលឆ្នាំ ដែលបុគ្គលិក ចូលចិត្តបំផុត (10/01/2014 20:36:00)
- គណបក្សកាន់អំណាចថៃ ប្ដឹងលោក អាប់ភីស៊ីត ពីបទបរិហារកេរ្តិ៍ (18/10/2012 15:51:00)
- ប្រធានគណបក្សសិទ្ធិមនុស្សថាខ្លួនទទួលជោគជ័យ ក្នុងការបោះឆ្នោតឃុំ សង្កាត់ (05/06/2012 10:51:00)
ដែលមើលច្រើន
