CamNews

ភ្នំពេញ៖ លោក មុំ មុន្នីរិទ្ធិ គឺជាកវីនិពន្ធទំនុកច្រៀង វ័យក្មេងកំពុងល្បីឈ្មោះ និង លេចមុខគួរសម ប្រចាំផលិតកម្ម ដាយមិនម្ញូសិក ។ ខណៈពេលបច្ចុប្បន្ននេះ បទចម្រៀងរបស់លោក ក៏កំពុងដាក់លក់នៅលើទីផ្សារ ជាហូរហែ ។ ជាការកត់សម្គាល់ មហាជនទូទៅបានមើលឃើញថា បទចម្រៀងរបស់លោក មុំ មុន្នីរិទ្ធិ នីមួយៗ ដែលបាននិពន្ធឡើង ភាគច្រើនសុទ្ធសឹង តែជាបទមនោសញ្ចេតនា ដែលអាចធ្វើឲ្យមិត្តអ្នក ស្តាប់ស្រក់ទឹកភ្នែក សើចសប្បាយ ទៅតាមអត្ថន័យរបស់បទចម្រៀង ។ ក្នុងនោះដូចជា Block បងចោលទៅ , ទឹកភ្នែកហូរក្នុងកុន4D , Baby របស់បង គឺសង្សារចាស់អូន ,មនុស្សដំបូងធ្វើឲ្យខ្ញុំយំ និងបទ អូនថាទឹកភ្នែកបងគ្មានតម្លៃ ជាដើម។

អ្នកនិពន្ធបទចម្រៀងវ័យក្មេង មានស្រុកកំណើតនៅខេត្តបាត់ដំបង រូបនេះ ជាកូនប្រុសច្បង ក្នុងចំណោមបងប្អូនពីរនាក់ ហើយរហូតមកដល់បច្ចុប្បន្ននេះ លោក មុំ មុន្នីរិទ្ធិ ទើបមានអាយុ ២៦ឆ្នាំតែប៉ុណ្ណោះ។ ក្រៅពីការងារជាអ្នកនិពន្ធច្រៀង លោក មុំ មុន្នីរិទ្ធិ ក៏ទើបបញ្ចប់ការសិក្សា ផ្នែកសំណង់ស៊ីវិល នៅសាកលវិទ្យាល័យន័រតុន។

តាមរយៈបទចម្រៀង ជាស្នាដៃនិពន្ធ របស់លោកមុំ មុន្នីរិទ្ធិ ជាច្រើនបទ លក់លើទីផ្សារួចមកហើយនោះ គឺហាក់ទទួលបានការចាប់អារម្មណ៍ គាំទ្រច្រើនពីសំណាក់ទស្សនិកជន ។ ជាពិសេសកំពុងពេញនិយមសម្រាប់ ស្រទាប់មិត្តយុវ័យបច្ចុប្បន្ន នេះតែម្តង គឺបទ Block បងចោលទៅ និង បទមនុស្សដំបូងធ្វើឲ្យខ្ញុំយំ ។

យ៉ាងណាមិញ បើតាមការសង្កេតមើល ពីទីផ្សាសិល្បៈក្នុងស្រុក នាពេលសព្វថ្ងៃនេះឃើញថា តារាចម្រៀងដែលអាចល្បីឈ្មោះ និងក្រសោមបានទីផ្សារគាំទ្រច្រើន ពីទស្សនិកជន ក៏អាស្រ័យទៅបទចម្រៀង ហើយក៏តម្រូវឱ្យអ្នកនិពន្ធ ក្នុងស្រុកទាំងអស់ ត្រូវមានសមត្ថភាពខ្ពស់ ដើម្បីតាក់តែងទំនុកច្រៀង បានល្អសម្រាប់តារា របស់ខ្លួនផងដែរ។

ជួបជាមួយគេហទំព័រ LookingTODAY តាមសារអេឡិចត្រូនិច លោក មុំ មុន្នីរិទ្ធិ បាននិយាយថា លោកបានក្លាយជាអ្នកនិពន្ធ រយៈពេល៣ ឆ្នាំមកហើយ។ លោក មានអារម្មណ៍ថាសប្បាយចិត្ត នឹងការងារដែលលោកទទួលបានសព្វថ្ងៃ ព្រោះវាជាចំណង់ចំណូលចិត្ត និងសេចក្តីប្រាថ្នា តាំងពីតូចមកម្ល៉េះ។

លោក មុំ មុន្នីរិទ្ធិ បានបញ្ជាក់ថា ទំនុកច្រៀងរបស់លោក មិនដែលចំឡង ឬបកប្រែអត្ថន័យ ពីបរទេសទេ បើទោះបីវា មិនទាន់បានល្អ១០០% ក៏ពិតមែន តែលោកនឹងព្យាយាមបន្ត ឥតឈប់ឈរ ព្រោះថាសិល្បៈខ្មែរ ហាក់កំពុងមានការរីកចំរើន ពីមួយឆ្នាំទៅមួយឆ្នាំ។ ម្យ៉ាងទៀត រាល់ទំនុកច្រៀងទាំងអស់ សុទ្ធតែចេញពីការគិត និងការនិពន្ធដោយផ្ទាល់របស់លោក។ ការនិពន្ធអ្នកណា ក៏ចេះនិពន្ធដែរ ប៉ុន្តែ អ្វីដែលសំខាន់ តើការនិពន្ធរបស់យើង សរសេរចេញទៅ ស៊ីជាមួយអារម្មណ៍ អ្នកស្តាប់ឬទេ? នេះជាចំណុចសំខាន់ របស់អ្នកនិពន្ធម្នាក់ៗ៕

ផ្តល់សិទ្ធដោយ ៖ ដើមអម្ពិល