ព័ត៌មានអន្តរជាតិ ៖ យ៉ាងហោចណាស់ មនុស្ស ៧ នាក់ បានស្លាប់បាត់បង់ជីវិត ខណៈ ១៩ នាក់ ផ្សេងទៀត បានទទួលរងរបួសធ្ងន់ និងស្រាល ក្រោយពីមានករណីផ្ទុះ គ្រាប់បែក បន្សល់ទុកតាំង ពីសម័យសង្គ្រាមលោកលើកទី ២ នៅឯផ្ទះទិញ អេតចាយមួយកន្លែង ក្នុងក្រុង បាងកក ប្រទេសថៃ នេះបើ់តាមការដកស្រង់ អត្ថបទផ្សាយ ពីទំព័រសារព័ត៌មានបរទេស ប៊ីប៊ីស៊ី ដែល ទើប តែបានចេញផ្សាយមុននេះបន្តិច ។
លើសពីនេះ ប្រភពសារព័ត៌មានដដែល បន្តអោយដឹងថា បុគ្គលិកការដ្ឋានសាងសង់មួយកន្លែង បានប្រទះឃើញវា និងយកទៅលក់ នៅឯផ្ទះអេតចាយខាងលើ តែដឹងអីថា ក្រុមការងារ នៅឯ ផ្ទះអេតចាយ និង បុរសជាជាងសំណង់យកមកលក់នោះ បានគិតថា គ្រាប់បែកខាងលើ លែង មានប្រសិទ្ធភាពទៀតហើយ ដូច្នេះ ពួកគេ ក៏បាននាំគ្នា ដំយកសម្បទា ដែលអាចលក់បាន រំពេច នោះ សោកនាដកម្មក៏បានកើតឡើង ពោល គ្រាប់បែកផ្ទុះ ឡើងកក្រើកក្រុង ខណៈ បានធ្វើអោយ ផ្ទះអេតចាយខាងលើ ខូចខាតទាំងស្រុង បានធ្វើអោយដីក្រហូងយ៉ាងធំ និង បានធ្វើអោយមាន ករណីគ្រោះអគ្គីភ័យ ឆាបឆេះរាយដាល ដល់សំណង់ផ្សេងទៀត នៅក្បែរ ខាងថែមទៀតផង ។
លោក Virasak Foythong ជាមេបញ្ជាការ ស្នងការប៉ូលីស ប្រចាំតំបន់ បានផ្តល់ជាកិច្ចសម្ភាសន៍ អោយដឹងថា មនុស្ស ៥ នាក់ បានស្លាប់ភ្លាមៗ នៅកន្លែងកើតហេតុ ខណៈពីរនាក់ផ្សេងទៀត បានស្លាប់ជាបន្តបន្ទាប់ ។ ដោយឡែក បើតាមការសន្មត់ គ្រាប់បែកខាងលើ ជាគ្រាប់បែក បន្សល់ ទុកតាំងពីសម័យសង្រ្គាមលោកលើកទី ២ ដោយនៅក្នុងនោះ វាទំនងជាមិនផ្ទុះ ក្រោយ ពីទម្លាក់ ចេញពីយន្តហោះ ៕
ប្រែសម្រួល ៖ កុសល
ប្រភព ៖ ប៊ីប៊ីស៊ី