CamNews

រឿងចម្លែកដ៏កម្រមួយបានកើតឡើងនៅប្រទេសសឹង្ហបុរី ពេលដែលអ្នកគាំទ្រ iPhone ពីររូប ជាប់​ទោសព្រហ្មទណ្ឌ ពេលដែលពួកគេបានព្យាយាមទិញ បណ្តា iPhone ស៊េរីថ្មី ឆាប់បានប្រើមុនគេ។

រឿងទិញ iPhone 7/7 Plus មួយគ្រឿង នៅតាមហាងលក់រាយ ក្នុងបណ្តាថ្ងៃដាក់លក់ដំបូងឆ្នាំនេះ​វាមានការលំបាកច្រើនជាងឆ្នាំមុន។ ហេតុដូច្នេះ អ្នកគាំទ្រ Apple ពីរនាក់នៅសឹង្ហបុរី បានគិតឃើញ​នូវវិធី​ប្លែកមួយ ដើម្បីទិញ iPhone ថ្មីឲ្យឆាប់បានប្រើមុនគេបំផុត។ ប៉ុន្តែគួរឲ្យសោកស្តាយ ពួកគេ​ទាំងពីរ​នាក់ត្រូវបានប្រឈមមុខ នឹងការជាប់គុក នេះបើតាមការឲ្យដឹងពីសារព័ត៌មាន Cultofmac។

ជនជាតិសឹង្ហបុរីពីរនាក់ បានជាប់ចោទ ទោសព្រហ្មទណ្ឌ ពេលនឹកឃើញវិធីខុសធម្មតាមួយ ដើម្បីទិញ iPhone ថ្មី បានលឿនមុនគេ (រូបភាព៖ Cultofmac)

ជាក់ស្តែង មនុស្សពីរនាក់នេះ បានដើរត្រង់ទៅកាន់ព្រលានយន្តហោះ Changi បន្ទាប់មកបានទិញ​សំបុត្រយន្តហោះចំនួនពីរ ដើម្បីបានចូលទៅក្នុងបន្ទប់រង់ចាំ និងទិញ iPhone នៅទីនោះ ប៉ុន្តែពួកគេ​មិនបានឡើងជិះយន្តហោះនោះទេ។

ប៉ុន្តែនៅប្រទេសសឹង្ហបុរី ការដែលដើរចូលទៅក្នុងបន្ទប់រង់ចាំ ចេញដំណើរ ហើយមិនឡើងយន្ត​ហោះ​ គឺជាបទល្មើសព្រហ្មទណ្ឌ។ អ្នកគាំទ្រ Apple ពីរនាក់ខាងលើនេះ ត្រូវបានប៉ូលិស ចាប់ឃាត់​ខ្លួន នៅពេលរកឃើញថា ពួកគេមិនមានគំនិតចង់ចាកចេញពី សឹង្ហបុរី។

ការដាក់ពិន័យចំពោះទោសរំលោភច្បាប់ នៅតាមកន្លែងដូចជាព្រលានយន្តហោះ គឺអាចឡើងដល់​ចំនួន ១,០០០ ដុល្លារសឹង្ហបុរី (ប្រហាក់ប្រហែល ៧៣៦ ដុល្លារអាមេរិច) ហើយនឹងអាចត្រូវពិន័យ បន្ថែមដោយជាប់គុកពីរឆ្នាំថែមទៀត។ ប៉ូលិសនៅទីនោះ បានធ្វើការព្រមានជាច្រើនដង ស្តីពីការ​ដែលប្រជាជនមិនត្រូវអនុញ្ញាតឲ្យបន្លំទិញសំបុត្រយន្តហោះ ដើម្បីអាចទិញបណ្តាទំនិញមិនគិតពន្ធ​ នៅក្នុងបន្ទប់រង់ចាំនៅព្រលានយន្តហោះនោះទេ។

បច្ចុប្បន្ន ប្រទេសសឹង្ហបុរីនៅមិនទាន់មាន Apple Store ជាផ្លូវការនោះទេ។ ព័ត៌មានចចាអារាម​ជាច្រើនបានឲ្យដឹងថា Apple នឹងបើកការិយ៉ាល័យខ្លួននៅទីនោះ ក្នុងពេលអនាគតឆាប់ៗខាងមុខ​នេះ។​ កន្លែងដាក់ Apple Store ថ្មីអាចនឹងស្ថិតនៅក្នុងអគារ Knightsbridge តាមដងផ្លូវ Orchard ដែល​ជាកន្លែង Shopping មួយ ក្នុងចំណោមកន្លែង Shopping ដែលមានមនុស្សម្នាចេញចូលច្រើន បំផុតនៅប្រទេសសឹង្ហបុរី ពេលបច្ចុប្បន្ននេះ៕

- ភាគហ៊ុនរបស់ Apple បានធ្លាក់ចុះ ដោយសារតែការព្រួយបារម្ភ បរិមាណលក់ iPhone 7 ទាប

ប្រែសម្រួល៖ មង្គល
ប្រភព៖ Cultofmac, zing