CamNews

យុវវ័យប្រហែលជាបានស្កាល់ក្រុមចម្រៀងពន្លកថ្មីមួយចំនួនហើយមើលទៅ តែក៏នៅមានក្រុមខ្លះ
ដែលនៅកប់លាក់ខ្លួនមិនទាន់មានអ្នកស្គាល់ច្រើននៅឡើយ ហើយពេលនេះ Camnews ចង់នាំ
លោកអ្នកមិត្តយុវវ័យអោយបានស្គាល់ក្រុមតន្រ្តី-ចម្រៀងមួយក្រុមដែលជាពន្លកថ្មីគឺក្រុម Khmer
Music Recover (KMR) ដែលមិត្តយុវវ័យមួយចំនួនក៏បានស្គាល់ហើយនូវក្រុមនេះដែលជាក្រុម
ដែលបាននិពន្ធបទទឹកចិត្តសន្តោស។ កាលពីដើមសប្ដាហ៍នេះ Camnews បានជួបសមាជិកក្រុម
KMR ដែលសុទ្ធសឹងជាពន្លកយុវវ័យ កំពុងតែលេងកីឡានៅទីធ្លាសាលកវិទ្យាល័យភូមិន្នភ្មំពេញ
ហើយយើងក៏បានជួបសម្ភាសន៍ប្រធានក្រុមគឺបងប្រុស Be Far បានប៉ុន្មានសំនួរផងដែរ។

Camnews៖ សួស្ដី Be Far ខានជួបគ្នាយូរហើយ ថ្ងៃនេះបានជួបគ្នានៅទីនេះពិតជាជួនគ្នាមែន
ហើយថ្ងៃនេះខាងខ្ញុំមានសំនួរខ្លះចង់សួរពីដំណើរការក្រុម។ ចង់សួរថាក្រុម KMR ហ្នឹងបង្កើតមក
ប៉ុន្មានឆ្នាំដែរហើយ?

Be Far៖ បាទបើគិតមកដល់ពេលនេះគឺ ១ ឆ្នាំហើយគឺក្នុងអំឡុងខែ ឧសភា នេះគឺគ្រប់ ១​ ឆ្នាំ។

Camnews៖ ចុះកាលពីបង្កើតដំបូងមកមានគ្នាប៉ុន្មាននាក់ដែរ ហើយរយៈពេល ១ ឆ្នាំនេះ KMR
បានចេញជាសមិទ្ធិផលអ្វីខ្លះដែរ?

Be Far៖ កាលពីបង្កើតដំបូងនោះគឺមានគ្នាតែ ៣ នាក់ទេដែលពួកយើងសុទ្ធសឹងតែជាមិត្តភ័ក្រ
ស្គាល់គ្នា តែមកដល់ពេលនេះគឺយើងមានសមាជិក ៨ នាក់ហើយដែលក្នុងនោះមាននារី ២
នាក់។ ចំពោះស្នាដៃវិញគឹយើងបាននិពន្ធបទចម្រៀង ក៏ដូចជាសាច់ភ្លេងបានច្រើនដែរ ប្រមាណ
អាចនិយាយបានថាមួយអាល់ប៊ុមហើយតែមិនទាន់បានចេញនោះទេ។

Camnews៖ ហេតុអ្វីបានជាមិនទាន់មានបទចម្រៀងរបស់ KMR ចេញលក់នៅលើទីផ្សារ?

Be Far៖ ការពិតទៅមិនមែនមិនចង់ចេញទេ មានផលិតកម្មក្នុងស្រុកមកទាក់ទងយើងច្រើនតែ
ដោយសារក្រុមមិនទាន់ស្រុះគ្នាព្រោះមានអ្នកខ្លះគេមានការងារធ្វើក្រៅ អ្នកខ្លះទៅក៏ត្រូវរៀន ២
សាលា។ហើយណាមួយពួកខ្ញុំតែងសាច់ភ្លេងដោយខ្លួនឯង តែងចម្រៀងដោយខ្លួនឯង អត់ចង់
នៅក្រោមអ្នកនិពន្ធដែលចម្លងនោះទេ។ ហេតុនេះហើយបានជាពួកខ្ញុំសុខចិត្តនិពន្ធបទចម្រៀង
ខ្លួនឯង ហើយចេញសម្ដែងដូចបានចេញសម្ដែងច្រើនកន្លងមកហើយ ហើយដែលនាំអោយគេ
ស្គាល់ច្រើននោះគឺវត្តមានក្រុម KMR ក្នុងកម្មវិធី ឡូយ៩ ក៏ដូចជាកម្មវិធីរាំកាលពីសប្ដាហ៍មុននេះ
ឯង។

Camnews៖ ចុះចំពោះគំរោងថ្ងៃអនាគតវិញមានគំរោងអ្វីប្លែកទេ?

Be Far៖ មាន! គឺថាក្នុងអំឡុង ប៉ុន្មានខែខាងមុខនេះក្រុមខ្ញុំនឹងបើកជាកន្លែងបង្រៀន ហ្គីតាមួយ
ដែលយើងបើកតូចទេ ហើយយើងស្វាគមន៍អ្នកមករៀនដោយយើងអត់យកកម្រៃច្រើនទេ យើង
អាចយកពីអ្នកដែលចង់រៀនត្រឹម ៥$ ដើម្បីមកផ្គួបទិញសម្ផារៈសម្រាប់រៀនតទៅទៀត។

Camnews៖ ហេតុអីបានជាមានគំនិតនេះកើតឡើង?

Be Far៖ ការពិតទៅពួកខ្ញុំគិតឃើញការពិតមួយ គឺថាមានមនុស្សច្រើនណាស់ដែលចង់រៀនតន្រ្តីជា
ពិសេសគឺ ហ្គឺតា តែនៅតាមសាលាផ្សេងៗមិនងាយមានបង្រៀនទេ ហើយថ្លៃទៀតផង ត្រឹមតែមួយ
វគ្គអាចមានតម្លៃដល់ ៥០$ តែការពិតទៅវាអត់មានអ្វីពិបាកក្នុងការបង្រៀននោះទេ ចុះហេតុអីបាន
ជាគ្រាន់តែចែករម្លែកក៏មិនបានដែរនោះ? និយាយទៅគឺគ្រាន់តែចង់ចែករម្លែកដូចជាពាក្យស្លោកជា
ភាសាអង់គ្លេសថា Share is Care។

វត្តមាន KMR ក្នុងកម្មវិធី ឡូយ៩ 

ការសម្ដែងក្នុងកម្មវិធី ព្រឹត្តិការណ៍ដ៏អស្ចារ្ស

ឈុតមួយនេះគឺជាសកម្មភាពរបស់ KMR ក្នុងកម្មវិធី ឡូ៩ ដែលមានការសម្ដែង
បទទឹកចិត្តសន្កោស ផងដែរ

ចុះលោកអ្នកគិតយ៉ាងណាដែរចំពោះការខិតខំប្រឹងប្រែង និងក្ដីសុបិន្តរបស់មនុស្សមួយក្រុមនេះ?

ដោយ៖ វឌ្ឍនា