ទីបេ បូជាសពដោយកាប់សាច់ បោះឱ្យត្មាតស៊ី

ប្លែកៗ

ទីបេ បូជាសពដោយកាប់សាច់ បោះឱ្យត្មាតស៊ី

05:39 PM 02.11.2013
Print Email

មិនត្រឹមតែមានទំនៀមទម្លាប់បូជាសពដោយការហាលកណ្ដាលវាល ឬកាប់សាច់សាកសពបោះឱ្យសត្វត្មាតស៊ីប៉ុណ្ណោះទេ ប៉ុន្ដប្រជាជននៅទីបេ ក៏មានទម្លាប់បូជាសព្វចម្លែកៗ គួរឱ្យខាចជាច្រើនទៀត។

ប្រភេទនៃការបូជាសព

ការបូជាសពនៅទីបេ មានពីរប្រភេទសំខាន់ៗ ទីមួយគឺ ដង្ហែសពឡើងលើភ្នំ រួចទុកចោលឱ្យសត្វត្មាតស៊ី។ ចំណែកប្រភេទទីពីរ គឺមានពិធីបុណ្យស្មុគស្មាញជាងវិធីទីមួយ។ អាចារ្យ ឬសង្ឃឡាមៈ (Lama) នឹងធ្វើពិធីសូត្រធម៌បួងសួងឱ្យអ្នកស្លាប់ ដោយដាក់ឱ្យអង្គុយរយៈពេល ២៤ម៉ោង។ សាកសពត្រូវបានសូត្រធម៌បួងសួង លាងជម្រះ នឹងត្រូវបានរុំដោយក្រណាត់ពណ៌ស។ ចុងក្រោយ គេនឹងបំផ្លាញឆ្អឹងខ្នងរបស់សាកសព ដើម្បីងាយស្រួលនាំទៅកាន់កន្លែងបូជា។ សមាជិកគ្រួសារ ឬមិត្តជិតស្និទ្ធម្នាក់របស់សព នឹងស្ពាយសាកសពនេះនៅពីក្រោយខ្នង។

ការដង្ហែសពទៅកាន់ទីបូជា ចាប់ផ្ដើមពីព្រឹកព្រលឹម។ សមាជិកគ្រួសារ ដង្ហែសព និងមានការសូត្រធម៌ និងលេងភ្លេងកំដរសព ប៉ុន្ដែត្រូវរក្សាគំលាតពីសាកសព។ សពត្រូវបានគេដាក់ដេកផ្កាប់នៅលើដី ក្រុមអាចារ្យខ្មោច Rogyapa ដុតឈើមួយប្រភេទដើម្បីទាក់ទាញសត្វត្មាត ហើយចាប់ផ្ដើមការងាររបស់ខ្លួន ដោយប្រើកាំបិតមុតស្រួច។ រាងកាយនៃសពទាំងមូល ចាប់ពីសក់ ដើមទ្រូង សសៃ ពោះវាន ជើង ជាដើម ត្រូវបានកាត់ បំបែកចេញជាដុំៗ នឹងបោះទៅឱ្យសត្វត្មាតស៊ី។ ចំណែកឆ្អឹង ត្រូវបានអាចារ្យខ្មោច ដំបំបែកឱ្យខ្ទេច រួចច្របល់ជាមួយម្សៅអង្ករ ដើម្បីឱ្យសត្វងាយស្រួលស៊ី។

ប្រភពនៃជំនឿ

ទីបេ មានផ្ទៃក្រឡាប្រមាណជា ១,២លានគីឡូម៉ែត្រ ស្ថិតនៅភាគឦសានប្រទេសឥណ្ឌា គឺជាផ្ទះរបស់ជួរភ្នំហេមពាន្ត (Himalaya) និងបណ្ដាតំបន់ដែលកម្រនឹងមានគេទៅដល់។ ប្រជាជនទីបេ ភាគច្រើនរស់នៅតំបន់ដែលមានកម្ពស់ប្រមាណ ៥ពាន់ម៉ែត្រ ធៀបនឹងកម្រិតទឹកសមុទ្រ ហើយនៅតំបន់ខ្ពង់រាបនេះ មានអាកាសធាតុត្រជាក់ដល់ឆ្អឹង។

ខ្ពង់រាបទីបេ គឺជាកន្លែងខ្ពស់បំផុតក្នុងពិភពលោក ហើយដោយសារតែអាកាសធាតុ ប្រជាជនមិនអាចបញ្ចុះសពនៅក្រោមថ្ម ឬទឹកកក ចំណែកដី គឺមានតម្លៃថ្លៃ។ រីឯការបូជាដោយភ្លើង ក៏មានការលំបាក ព្រោះតែឱស និងសម្ភារៈសម្រាប់បូជាភ្លើង មិនមានច្រើន។ ប្រការទាំងនេះ នាំឱ្យកើតមានទម្លាប់បូជាសពដោយការបោះឱ្យសត្វស៊ី។

ជនជាតិទីបេ ភាគច្រើន កាន់សាសនាព្រះពុទ្ធ វជរយាន ពួកគេជឿថា ព្រលឹងរបស់អ្នកស្លាប់ បានចាកចេញពីរាងកាយ ហើយសាកសពគ្រាន់តែជាសំណល់ ប្រៀបដូចអង្កត់ឱស រកប្រយោជន៍គ្មាន។ ចំណែកសត្វត្មាត ត្រូវបានគេចាត់ទុកដូចសត្វដែលមានវិញ្ញាណដ៏អស្ចារ្យ។ ការយកសាកសពឱ្យសត្វត្មាតស៊ី ប្រៀបដូចទៅនឹងព្រះពុទ្ធក្នុងកំណើតផ្សេងៗ យកជីវិតរបស់ខ្លួន ចិញ្ចឹមសត្វខ្លា ដើម្បីការពារសត្វលោក។ ដូច្នេះ ការយកសាកសព ទៅឱ្យសត្វត្មាតស៊ី អ្នកស្លាប់នឹងឆាប់បានទៅកើតនៅឋានសួគ៌៕

អត្ថបទសំខាន់ៗគួរចាប់អារម្មណ៍ ៖

ក្មេងស្រីគ្មានម្រាមដៃ តែមានទេពកោសល្យខ្ពស់ អាចលេងព្យាណូបានយ៉ាងល្អ (Video Inside)

បញ្ជូនទូរស័ព្ទចូលពន្ធនាគារ ឱ្យសង្សារ តាមសត្វព្រាប ត្រូវនគរបាលចាប់ខ្លួន

គ្រួសារ Beckham ក្លែងក្លាយ ធ្វើឱ្យផ្អើលក្រុង London ពេលបង្ហាញខ្លួន តាមដងផ្លូវ

ប្រែសម្រួលដោយ ៖ តារា
ប្រភព ៖ VE/Rex