CamNews

(ភ្នំពេញ)៖ ជាមួយគ្នានឹងការចេញមុខ ទទួលស្នើសុំឲ្យប្រព័ន្ធតុលាការស្រុកខ្មែរ ចេញមុខជួយស្វែ​ងរកយុត្តិធម៌ ឲ្យតារាចម្រៀងស្រី កញ្ញា ពៅ បញ្ញាពេជ្រ ដែលត្រូវបានខ្មាន់កំភ្លើង​បាញ់​ប្រហា​រ​ហូ​​តធ្លាក់ខ្លួនពិការ នាអំឡុងឆ្នាំ២០០៧ ព្រមទាំងសិល្បការិនីដទៃទៀតនោះ ប្រធានសមាគម​សិ​ល្បករកម្ពុជា លោក សុះ ម៉ាច បានលើកឡើងជា​ចំងល់ថា «ហេតុអ្វីរាល់​រឿងរ៉ាវ ដែលកើតមកលើសិល្បករ-សិល្បការិនី ការស្វែងរកយុត្តិធម៌ ហាក់ដូចជារាវម្ជុល ក្នុងបាតសមុទ្រ ?​»។

លោក សុះ ម៉ាច បានសរសេរបង្ហោះ នៅលើបណ្តាញសង្គមហ្វេសប៊ុក ដោយលើកករណី​អ្នក​ចម្រៀង កញ្ញា ពៅ បញ្ញាពេជ្រ ប្រៀ​បធៀបជាមួយនាង ខុម ចាន់តារ៉ាទី ហៅស្រីមុំថា ក្នុងនាមស្រ្តីខ្មែរដូចគ្នា តុលាការគួរតែស្វែងរកយុត្តិ​ធម៌ឲ្យនាង (ពៅ បញ្ញាពេជ្រ) និងសិល្បការិនីដទៃទៀត ដែលរគ្រោះ​ដោយការបាញ់ប្រហារ និងជះទឹកអាស៊ីតស្លាប់របួសពិកា អស់ជាច្រើនឆ្នាំមកហើ​យ យុត្តិធម៌ត្រូវតែមានចំពោះស្ត្រីខ្មែរទូទៅ មិនថាប្រជាពលរដ្ឋ ឬសិល្បការិនីនោះឡើយ។

ប្រធានសមាគម​សិ​ល្បករកម្ពុជា លោក សុះ ម៉ាច បានបន្តថា «ខ្ញុំសូមគាំទ្រជានិច្ច នូវរាល់ចំណា​ត់ការបស់តុលាការ ក្នុងការស្វែងរកយុត្តិធម៌ ប្រកបដោយតម្លាភាព ដល់ស្ត្រីខ្មែរទូទៅ។ ក្នុងន័យប្រយោជន៍ ដើម្បីលើកស្ទួយ និងឲ្យតម្លៃដល់សុភាពស្ត្រីខ្មែរយើង»។ ​ជាមួយនឹងកាលើកឡើ​ង​ដូច្នេះ លោក សុះ ម៉ាច ក៏បានចោទជាសំណួរទៀតថា តើមានអាថ៌កំបាំងអ្វី ? តើត្រូវពឹងប៉ាវចិន និងចាន់ចាវកុងស៊ុនឲ្យជួយឬ? ការសរសេរបញ្ចេញមតិរបស់ខ្ញុំនេះ គឺ​តែក្នុងដែនរង្វង់នៃអ្នកសិល្បៈតែប៉ុណ្ណោះ បើមានខុសឆ្គងសូមអភ័យទោសផង..!»។

សូមបញ្ជាក់ថា អ្នកចម្រៀងស្រីរូបស្រស់ កញ្ញា ពៅ បញ្ញាពេជ្រ នៅព្រឹកថ្ងៃទី២៣ ខែកុម្ភៈឆ្នាំ២​០០៧ ត្រូវបាន​ឧ​ក្រិ​ដ្ឋជនពីររូប តាមបាញ់ប្រហារ ពេលនាងចេញពីរថយន្ត នៅចំកណ្តាលទីក្រុងភ្នំពេញ។ កញ្ញា ពៅ បញ្ញា​ពេជ្រ គឺជាតារាចម្រៀងសម័យដ៏ល្បីឈ្មោះ និងមានប្រជាប្រិយ​ភាពមួយរូប ក្នុងដើមទស​​វត្សរ៍ ឆ្នាំ២០០០។ កញ្ញាត្រូវបាន​ទទួល​រងការបាញ់ប្រហារ ប៉ងផ្តាច់ជី​វិតលើរូបនាង ដោយគ្មានត្រាប្រណី កាលពីប្រមាណ១០ឆ្នាំមុន ​។ ​រហូតមកទល់ពេលនេះ ការបាញ់ប្រហារលើតារាចម្រៀង កញ្ញា ពៅ បញ្ញាពេជ្រ ហាក់នៅតែស្ថិ​តក្នុងអាថ៌កំបាំង នៅឡើយ៕

ផ្តល់សិទ្ធដោយ ៖ ខ្មែរថកឃីង