CamNews

បើទោះជាមិនទាន់បានដាក់លក់ជាផ្លូវការ ប៉ុន្តែ មនុស្សមួយចំនួនមានសំណាង បានបើកប្រអប់ស្មាតហ្វូនជំនាន់ថ្មីរបស់ Apple ។

អ្នកស្នេហាវិស័យបច្ចេកវិទ្យានៅលើពិភពលោក កំពុងត្រៀមខ្លួនផ្ដោតអារម្មណ៍ទៅលើថ្ងៃទី ១៦កញ្ញា ដែលជាថ្ងៃ Apple ចាប់ផ្ដើមដាក់លក់ iPhone 7។ ប៉ុន្តែ ចាប់តាំងពីថ្ងៃទី ១២កញ្ញា បណ្ដារូបភាពបើកប្រអប់ស្មាតហ្វូនជំនាន់ថ្មីរបស់ Apple បានបង្ហាញខ្លួន ហើយខុសពីការបែកធ្លាយមុនៗ នេះគឺជាស្មាតហ្វូនរបស់ Apple ពិតៗ។

iPhone 7 ដែលត្រូវបានបើកប្រអប់គឺជាកំណែពណ៌ខ្មៅរលើប Jet Black ចំណែក iPhone 7 Plus គឺកំណែពណ៌ខ្មៅស្រអាប់។ ក្រុមហ៊ុន Apple បានផ្លាស់ប្ដូរការវេចខ្ចប់ ពោលគឺកំណែពណ៌ខ្មៅរលើប Jet Black មានប្រអប់ពណ៌ខ្មៅ ចំណែកកំណែពណ៌ដទៃទៀតគឺ ខ្មៅស្រអាប់ ពណ៌ប្រាក់ លឿន និងពណ៌រ៉ូសហ្គូល (Rose Gold) នឹងមានប្រអប់ពណ៌ ស ដូចទៅនឹង iPhone ជំនាន់មុនៗ។

បណ្ដារូបថតបើប្រអប់ iPhone ថ្មីនេះ ត្រូវបានគេជឿថា មានប្រភពពីប្រទេសចិន។ ម៉ាស៊ីនេះ មានដាក់មកជាមួយនូវឆ្នាំងសាកថ្មប្រភេទបួនជ្រុង ប៉ុន្តែ ព័ត៌មានលំអិត មិនទាន់ត្រូវបានគេបង្ហើបឱ្យដឹងនៅឡើយ។

iPhone 7 ត្រូវបាន Apple ឧទ្ទេសនាមកាលពីថ្ងៃទី ៧កញ្ញា ជាមួយនឹងការកែលំអជាច្រើន ប៉ុន្តែ រូបរាងខាងក្រៅរបស់វា មិនខុសគ្នាប៉ុន្មាន បើធៀបនឹង iPhone 6s ។ ស្មាតហ្វូនម៉ូដែលថ្មីនេះមានសមត្ថភាពទប់ទល់នឹងជម្រាបទឹក រន្ធដោតកាសត្រូវបានបំបាត់ រីឯខ្សែអង់តែនត្រូវបានរើទៅដាក់នៅគែមខាងលើរបស់ទូរស័ព្ទ។ អ្វីដែលគួរឱ្យចាប់អារម្មណ៍នោះគឺ វត្តមានរបស់កំណែពណ៌ខ្មៅរលើប Jet Black និងពណ៌ខ្មៅស្រអាប់ ជំនួសឱ្យពណ៌ប្រផេះដូចជំនាន់មុន។

ចំពោះ iPhone 7 Plus ក្រុមហ៊ុន Apple បានបំពាក់ប្រព័ន្ធកាមេរ៉ាភ្លោះ ដែលជួយឱ្យម៉ាស៊ីននេះ ថតរូបបានច្បាស់ជាងមុន។ ស្មាតហ្វូនជំនាន់ថ្មីទាំងពីរនេះ មានអេក្រង់ 4,7 inch និង 5,5 inch និងសុទ្ធតែមានកំណែអង្គចងចាំ 32, 128 និង 256 GB ។

ប្រែសម្រួល ៖ តារា
ប្រភព ៖ appleinsider