ហេតុអ្វីប្រាក់ខែរបស់បុគ្គលិក ប្រែប្រួល ពេលមេ មានកូន?

ជីវិត និងការងារ

ហេតុអ្វីប្រាក់ខែរបស់បុគ្គលិក ប្រែប្រួល ពេលមេ មានកូន?

11:18 AM 26.09.2013
Print Email

នៅពេលប្រធានក្រុមហ៊ុនជាបុរសបានក្លាយជាឪពុក ពួកគេតែងសម្រេចចិត្តផ្ដល់ប្រាក់ខែតិចដល់បុគ្គលិក ហើយខ្លួនឯងយកប្រាក់ខែច្រើន។ ប៉ុន្ដែ វាមិនមែនមានន័យថា រាល់ប្រធានក្រុមហ៊ុន និងបុគ្គលិក សុទ្ធតែធ្វើ និងទទួលឥទ្ធិពលដូច្នេះនោះទេ។

នេះគឺជាលទ្ធផលនៃការស្រាវជ្រាវថ្មីមួយរបស់សាស្ដ្រាចារ្យ៣រូប ដែលបានបញ្ចេញរបាយការណ៍នៅក្នុងកិច្ចប្រជុំប្រចាំឆ្នាំរបស់សមាគមន៍សេដ្ឋកិច្ចអាមេរិក ដែលត្រូវបានធ្វើឡើងនៅ San Diego។

ទិន្នន័យដែលក្រុមអ្នកស្រាវជ្រាវប្រើប្រាស់ គឺមានចំនួន ១០,៦៥៥ ក្រុមហ៊ុន របស់ Denmark ក្នុងអំឡុងពេល ពីឆ្នាំ ១៩៩៦ ដល់ ២០០៦ រួមមាន ទារកជាង ១,៦០០នាក់ និងប្រធានក្រុមហ៊ុនជាង ១៨,០០០នាក់។ ភាគច្រើននៃក្រុមហ៊ុនខាងលើ សុទ្ធសឹងតែជាប្រភេទខ្នាតតូច និងមធ្យម ដែលមានបុគ្គលិកចាប់ពី ១០នាក់ឡើងទៅ។

របាយការណ៍នេះ ត្រូវបានធ្វើឡើងដោយសាស្ដ្រាចារ្យ David Gaddis Ross នៃវិទ្យាស្ថានសេដ្ឋកិច្ច Columbia រួមនឹងសហការី គឺសាស្ដ្រាចារ្យសេដ្ឋកិច្ច Michael Dahl មកពីសកលវិទ្យាល័យ Aalborg និងសាស្ដ្រាចារ្យ Cristian Dezso នៃវិទ្យាស្ថានសេដ្ឋកិច្ច នៃសកលវិទ្យាល័យ Maryland Smith ។

ទិន្នន័យនេះ អនុញ្ញាតឱ្យក្រុមស្រាវជ្រាវ អាចស្វែងយល់អំពីការប្រែប្រួលដែលបានកើតឡើងចំពោះប្រាក់ខែរបស់បុគ្គលិក នៅពេលថៅកែ ឬប្រធានក្រុមហ៊ុនរបស់ពួកគេ មានកូន។ ក្រុមអ្នកស្រាវជ្រាវ បានសម្រេចចិត្តផ្ដោតទៅលើប្រធានក្រុមហ៊ុនដែលជាបុរស ព្រោះថា ទិន្នន័យទាំងអស់ បង្ហាញថា ក្រុមហ៊ុនភាគច្រើនគឺមានប្រធានជាបុរស។

សាស្ដ្រាចារ្យ David Gaddis Ross និងសហការី បានលើកឡើងនូវសម្មតិកម្មថា ការចាប់កំណើតរបស់ទារកមួយរូបនឹងធ្វើឱ្យប្រធានក្រុមហ៊ុន មានអារម្មណ៍ថា “ធ្វើជាស្វាមី និងឪពុក គឺត្រូវចេះនាំប្រាក់ចំណូលច្រើនរបស់ក្រុមហ៊ុន មកឱ្យគ្រួសារដែលកំពុងមានសមាជិកបន្ថែមរបស់ខ្លួន” ។

ប៉ុន្ដែ ការចាប់កំណើតរបស់កូនៗនៃមេៗក្រុមហ៊ុន ក៏មិនមែនមានន័យថា ប្រាក់ខែរបស់បុគ្គលិកទាំងអស់ ត្រូវកាត់បន្ថយនោះដែរ។ ប្រសិន មេ មានកូនស្រី នោះប្រាក់ខែរបស់បុគ្គលិកនឹងកើនឡើង ក្នុងនោះ បុគ្គលិកស្រី ទទួលបានបន្ថែម ប្រហែល ១,១% ចំណែកប្រាក់ខែរបស់បុគ្គលិកប្រុស អាចទទួលបានបន្ថែម ប្រហែល ០,៦% ។

ហេតុអ្វី មេៗ តម្លើងប្រាក់ខែដល់បុគ្គលិក បន្ទាប់ពីខ្លួនមានកូនស្រី (មិនមែនកូនប្រុស) ? ការស្រាវជ្រាវនេះ បង្ហាញថា បុរសដែលមានកូនស្រី នឹងមានចិត្ដទន់ ដូចទៅនឹងស្ដ្រីភេទ។

សាស្ដ្រាចារ្យ Dezso បកស្រាយថា ៖ “នៅពេលកូនដំបូងបានចាប់កំណើត ឪពុករបស់គេនឹង បានយល់អំពីទំនួលខុសត្រូវរបស់ខ្លួន និងមានអាធ្យាស្រ័យច្រើនចំពោះការលំបាកដែលស្ដ្រីភេទត្រូវប្រឈម នៅកន្លែងធ្វើការ” ។ ប្រការនេះក៏បានបកស្រាយអំពីមូលហេតុថា ថៅកែមានកូនប្រុសដំបូង ប្រាក់ខែរបស់បុគ្គលិកស្រី ត្រូវថយចុះត្រឹមតែ ០,២% ធៀបនឹង ០,៥% របស់បុគ្គលិកប្រុស។

ប្រសិន មេមានកូនបន្ទាប់ នោះបុគ្គលិកស្រីនឹងបានតម្លើងប្រាក់ខែ ប្រហែល ០,៨% ប្រសិនកូនរបស់គាត់ជាកូនប្រុស និងទទួលបាន ១,១% ប្រសិនជាកូនស្រី។

ដោយ ៖ តារា
ប្រភព ៖ AF