CamNews

Facebook ត្រូវបានគេជឿថា នឹងសហការណ៍ជាមួយ Samsung ដើម្បីផលិតម៉ូដែលស្មាតហ្វូនថ្មី ដែលជំនាញខាងប្រើបណ្ដាញសង្គមនេះ។

ស្មាតហ្វូនមួយប្រភេទដែលមានជំនាញខាងប្រើប្រាស់បណ្ដាញសង្គម Facebook ប្រហែលជា
ប្រការដែល CEO Mark Zuckerberg ស្រមៃគិតតាំងពីយូរណាស់មកហើយ។ មុននេះ Facebook
ក៏ធ្លាប់បានសហការណ៍ជាមួយ HTC ហើយបានបញ្ចេញផលិតផលមួយចំនួន ដែលមានជំនាញ
ខាងប្រើ Facebook ដូចជា HTC ChaCha ឬ First ប៉ុន្ដែ ផលិតផលទាំងពីរនេះ មិនទទួលបាន
ជោគជ័យ និងមិនបានធ្វើឱ្យអ្នកប្រើប្រាស់ចាប់អារម្មណ៍នោះទេ។

ថ្មីៗនេះ Facebook បានបង្ហាញសញ្ញាមួយចំនួន ក្នុងបំណងសហការណ៍នឹងក្រុមហ៊ុនផលិត
ឧបករណ៍ Android ធំបំផុតនាបច្ចុប្បន្ន នោះគឺ Samsung ។ យោងតាមសារព័ត៌មានកូរ៉េខាងត្បូង
លោក Mark Zuckerberg បានជួបពិភាក្សាជាមួយអគ្គនាយករងរបស់ Samsung លោក Lee
Jay-Yong នៅទីស្នាក់ការធំរបស់ក្រុមហ៊ុន Samsung ដែលស្ថិតនៅកូរ៉េខាងត្បូង។ ជំនួបនេះ
ត្រូវបានគេជឿថា Samsung និង Facebook នឹងបង្កើត "Facebook Phone" ថ្មីមួយ នៅពេលដ៏
ខ្លីខាងមុខ។

លោក Mark Zuckerberg (ស្ដាំ) និង​លោក Lee Jay-Yong

នេះមិនមែនជាជំនួបលើដំបូងរបស់ថ្នាក់ដឹកនាំនៃ​ក្រុម​ហ៊ុន​ទាំងពីរ ប៉ុន្ដែមុននេះ ពួកគេក៏ធ្លាប់
បានជួបពិភាក្សាគ្នា ពីរលើករួចមកហើយ ដោយលើកចុងក្រោយ ត្រូវបានធ្វើឡើង កាលពីខែ
មិថុនា។ ជាក់ស្បែងណាស់ Facebook កំពុងតែព្យាយាមស្វែងរកដៃគូផ្នែករឹង (hardware) ដែល
គួរឱ្យទុកចិត្តមួយ ដើម្បីធ្វើឱ្យស្មាតហ្វូនបន្ទាប់របស់ពួកគេ ក្លាយជាការពិត។

ស្មាត​ហ្វូន HTC ChaCha បង្កើត​ឡើង​ដោយ HTC និង Facebook

មុននេះ វ៉ែនតែ Samsung Gear VR ដែលត្រូវបានឧទ្ទេសនាម នៅ IFA 2014 ក៏ត្រូវបានចាត់
ទុកថា ជាផ្លែផ្កានៃកិច្ចសហការណ៍របស់ក្រុមហ៊ុនទាំងពីរនេះ។ អេក្រង់បង្ហាញរូបភាពរបស់
Gear VR គឺ Galaxy Note 3 និង Note 4 រីឯបច្ចេកវិទ្យារបស់ Gear VR គឺអភិវឌ្ឍដោយ Oculus
ហើយ Oculus គឺជាក្រុមហ៊ុនកូនរបស់ Facebook ។

វ៉ែនតែ Samsung Gear VR ជា​លទ្ធ​ផល​នៃ​កិច្ច​សហការណ៍​រវាង Facebook និង Samsung

នៅពេលមានកិច្ចសហករណ៍ដ៏ជិតស្និទ្ធ រវាងក្រុមហ៊ុនធំទាំងពីរនេះ គេប្រាកដថា អនាគតដ៏ខ្លី
ខាងមុខ ក្នុងទីផ្សារនឹងមានផលិតផលគួរឱ្យចាប់អារម្មណ៍ជាច្រើន ដែលកើតចេញពី ការចាប់ដៃ
គ្នា រវាង Facebook និង Samsung ៕

ប្រែសម្រួលដោយ ៖ តារា
ប្រភព ៖ businessinsider