CamNews

ថ្ងៃនេះ Samsung បានធ្វើការបង្ហាញណែនាំជាផ្លូវការនូវស្មាតហ្វូន Galaxy C5 សម្រាប់ទីផ្សារប្រទេស ចិន។ នេះគឺជាស្មាតហ្វូនស៊េរីមធ្យម ដែលមានតួធ្វើពីលោហធាតុ (មិនអាចដោះថ្មបាន) ហើយផ្ទៃខាង​ក្រោយរបស់ C5 គឺមានខ្សែអង់តែងកាន់ទទឹងតួលើក្រោម មានលំនាំដូចទៅនឹង HTC One A9។ រីឯផ្ទៃ​ខាងមុខរបស់វា នៅតែមានលំនាំដូចទៅនឹងបណ្តាស្មាតហ្វូន Samsung ស៊េរីថ្មីៗនេះដដែល ជាមួយនឹង ប៊ូតុង Home មានបំពាក់នូវ Sensor ស្គែនក្រយៅដៃផងដែរ។

ដោយវាត្រូវបានផលិតឡើង ផ្តោតជាប្រភេទស្មាតហ្វូនស៊េរីមធ្យម Galaxy C5 បំពាក់នូវលក្ខណៈសម្បត្តិ​មិនសូវខ្លាំងប៉ុន្មានទេ ពោលគឺវាមានអេក្រង់ទំហំ 5,2-inch Full HD ប្រើប្រាស់ឈីប Qualcomm Snapdragon 617, រ៉េម 4GB។ ក្រៅពីនេះ Galaxy C5 បំពាក់មកជាមួយនឹងកាមេរ៉ាក្រោយ 16MP និង​កាមេរ៉ាមុខទំហំ 8MP, អង្គផ្ទុកទិន្នន័យ 32GB, ថាមពលថ្ម 2600mAh។ Galaxy C5 នឹងមាន ៤ពណ៌​សម្រាប់ជ្រើសរើសគឺ ពណ៌ទឹកមាស ពណ៌មាសផ្កាឈូក ពណ៌ប្រផេះ និងពណ៌ទឹកប្រាក់។ សម្រាប់ ថ្ងៃដាក់លក់ជាផ្លូវការ នៅមិនទាន់បាន Samsung បង្ហើបឲ្យដឹងនៅឡើយទេ ប៉ុន្តែបើសិនជាអ្នកកំពុងតែ​នៅក្នុងប្រទេសចិន អ្នកអាចធ្វើការបញ្ជាទិញមុនបាន ប្រហែល ៣៣៥ដុល្លារ សម្រាប់ម៉ូដែលទំហំ 32GB និងតម្លៃ ប្រហែល ៣៧០ដុល្លារ សម្រាប់ម៉ូដែល 64GB។ យើងក៏មិនច្បាស់​ថា Samsung មានផែនការ នាំយក Galaxy C5 ដាក់លក់នៅលើបណ្តាទីផ្សារប្រទេសផ្សេងៗទៀត ក្រៅ​ពីប្រទេសចិននៅឡើយទេ។

(រូបភាព៖ GSMArena)

ខាងក្រោមនេះ គឺជាលក្ខណៈសម្បត្តិមូលដ្ឋានទូទៅរបស់ Samsung Galaxy C5:

• អេក្រង់ AMOLED 5,2-inch, Full HD (1920x1080)
• CPU Qualcomm Snapdragon 617
• 4GB RAM
• អង្គផ្ទុកទិន្នន័យទំហំ 32GB, អាចបន្ថែមមេម៉ូរីក្រៅតាមរយះកាត microSD បានដល់ទំហំ 128GB
• កាមេរ៉ាក្រោយ 16MP f/1.9, ថតវីដេអូ Full HD 30fps
• កាមេរ៉ាមុខ 8MP f/1.9
• តំណភ្ជាប់: Bluetooth 4.2, WiFi 802.11 a/b/g/n, 4G LTE
• ថាមពលថ្ម: 2600mAh
• Feature: Sensor ស្គែនក្រយៅដៃ, គាំទ្រ Samsung Pay
• ខ្នាតវិមាត្រ: 145.9 x 72 x 6.7mm
• ទម្ងន់ 143g
• ប្រព័ន្ធប្រតិបត្តិការ: Android

ប្រែសម្រួល៖ មង្គល
ប្រភព៖ Samsung, Tinhte