CamNews

នៅក្នុងយុទ្ធនាការផ្សព្វផ្សាយស្លាកយីហោរមួយនៅ Olympic 2016 ដែលជិតប្រារព្ធធ្វើឡើងនោះ Samsung នឹងធ្វើការផ្តល់ជូនដោយមិនគិតថ្លៃ (Free) នូវស្មាតហ្វូន Galaxy S7 Edge ម៉ូដែល Olympic មួយគ្រឿងសម្រាប់គ្រប់អត្តពលិក ដែលបានចូលរួមប្រកួតកីឡាអូឡាំពិក ដ៏ធំបំផុតលើ ពិភពលោកនេះ។ Samsung ក៏នឹងធ្វើការដាក់លក់ម៉ូដែលពិសេសរបស់ Galaxy S7 Edge នៅ​សហរដ្្ឋ​អាមេរិច កូរ៉េខាងត្បូង អាឡឺម៉ង់ និងប្រទេសចិន ប៉ុន្តែជាមួយនឹងបរិមាណមានកំណត់។ ឈ្មោះ​ហៅពេញរបស់ម៉ូដែលនេះគឺ Galaxy S7 Edge Olympic Games Edition។

ម៉ូដែល Galaxy S7 Edge ដែលរចនាផ្ទាល់សម្រាប់កីឡា Olympic 2016 ដែលនឹងប្រារព្ធធ្វើឡើងនៅ ប្រទេសប្រេស៊ីល មានភាពខុសប្លែកម៉ូដែលធម្មតា ដោយ Samsung ធ្វើការផ្លាស់ប្តូរចំនុចខ្លះនៅលើ តួស្មាតហ្វូន រួមមាន ឡូហ្គោកងប្រាំ នៅផ្នែកខាងក្រោយ ពណ៌ទាំងប្រាំរបស់កីឡា Olympic តាមបណ្តាផ្នែកតូចៗនៃស្មាតហ្វូន និង icon Olympic នៅក្នុង Software សំខាន់មួយចំនួន លើអេក្រង់​ដើម​ និងអេក្រង់ Lock (Lockscreen)។ យើងអាចនិយាយបានថា S7 Edge Olympic គឺជា S7 ដែល​ស្រាស់ស្អាតល្អឆើតជាងគេបំផុត ដែលក្រុមហ៊ុន Samsung ធ្លាប់បានបង្ហាញណែនាំ។

ក្រៅពីស្មាតហ្វូន S7 Edge Olympic បណ្តាអត្តពលិក ក៏ត្រូវបាន Samsung ផ្តល់ជូនមិនគិតថ្លៃនូវ កាស Gear IconX មានតម្លៃ ២០០ដុល្លារ មួយគ្រឿងទៀតផងដែរ។ Olympic 2016 នឹងមានអត្តពលិក ចូលរួមប្រកួតប្រមាណ ១២៥០០ នាក់។ Samsung ក៏នឹងធ្វើការអភិវឌ្ឍន៍ App Olympic ដល់បណ្តា​ឧបករណ៍ដែលប្រើ iOS, Android និង Windows ដែរ។

ស្មាតហ្វូន Galaxy S7 Edge ម៉ូដែល Olympic នឹងធ្វើការដាក់លក់ជាមួយនឹងបរិមាណមានកំណត់ នៅលើ Best Buy អាមេរិច ចាប់ពីថ្ងៃទី១៨ ខែកក្កដា ខាងមុខនេះ ដែលតម្លៃលក់ នៅមិនទាន់បង្ហើប​ឲ្យដឹងនៅឡើយទេ៕

- អានអត្ថបទ៖ Samsung អាចនឹងចំណេញដល់ ៧ពាន់លានដុល្លារ ក្នុងត្រីមាសទី២នេះ, ខ្ពស់បំផុត​បើគិតតាំងពីឆ្នាំ ២០១៤ មក

ប្រែសម្រួល៖ មង្គល