គេហទំព័រ PhoneArena ទើបតែធ្វើការបង្ហោះនូវរូបភាពថ្មីបំផុតមួយសន្លឹក ស្តីពីការរចនាម៉ូតជាក់ស្តែង របស់ LG G3។ រូបភាពនេះ មិនមានខុសប្លែកច្រើនទេ បើប្រៀបជាមួយរូបភាពដែលធ្លាប់ចចាមអារាម កាលពីពេលមុននេះ ដែលថតនូវផ្នែកខាងក្រោយនៃស្មាតហ្វូននេះ ដូចគ្នាដែរ។
តាមប្រភពរបស់ PhoneArena បានកំណត់បញ្ជាក់ថា LG G3 នឹងបំពាក់នូវអេក្រង់មួយជាប្រភេទ QHD 5,5 inch (2.560 x 1.440 pixel), កំរិតដង់ស៊ីតេភិចហ្សែល 534 ppi។ ក្រៅពីនេះ G3 ក៏នឹងមានពីរម៉ូដែល ផ្សេងគ្នាផងដែរ ក្នុងនោះមួយមាន 2 GB RAM មេម៉ូរីក្នុងទំហំ 16 GB និងមួយទៀតមាន 3 GB RAM មេម៉ូរីក្នុងទំហំ 32 GB។ ទាំងពីរម៉ូដែលនេះ សុទ្ធតែអាចបន្ថែមនូវមេម៉ូរីក្រៅបានតាមរយះកាត microSD ។
រូបភាពផ្នែកខាងក្រោយនៃ LG G3 ដែលមើលឃើញច្បាស់ជាងមុន ក្នុងរូបភាពចចាមអារាមថ្មីបំផុត
(រូបភាព៖ GSMArena)
បរិមាណថ្មរបស់ G3 នៅតែរក្សាបរិមាណ 3.000 mAh ដូចម៉ូដែលមុន។ ស្មាតហ្វូននេះ ក៏មានបំពាក់នូវ Speaker ក្រៅដែលមានថាមពលឡើងដល់ 1 W។ កាមេរ៉ាក្រោយក៏ត្រូវបានបញ្ជាក់ឲ្យដឹងថា មានទំហំ 13 MP រួមជាមួយបច្ចេកវិទ្យា ទប់រំញ័រ (OIS) ថ្មីបំផុត ដែលទើបតែបង្ហាញណែនាំនៅលើ LG G Pro 2។
LG G3 គឺជាស្មាតហ្វូនដែលត្រូវបានគេរំពឹងរង់ចាំមួយផងដែរ នៅក្នុងរដូវវិស្សមកាលឆ្នាំនេះ។ បើតាម ការរំពឹងទុក LG នឹងបង្ហាញណែនាំជាផ្លូវការនូវស្មាតហ្វូន G3 នៅថ្ងៃទី ២៧ ខែឧសភា ខាងមុខនេះ៕
ប្រែសម្រួល៖ សិលា
ប្រភព៖ zing
