សណ្ឋានម្រាមដៃ ប្រាប់អំពីបុគ្គលិកលក្ខណៈ របស់មនុស្ស

យល់ដឹង

សណ្ឋានម្រាមដៃ ប្រាប់អំពីបុគ្គលិកលក្ខណៈ របស់មនុស្ស

12:31 PM 05.11.2013
Print Email

ម្រាមដៃណាមួយដែលមានសភាពកោង វៀច ផ្ដេកទៅខាងម្រាមដទៃ ឬកោងទៅរកម្រាមខាងមុខ គឺបង្ហាញថា ជាម្រាមខ្សោយ។ ចំណែកម្រាមដៃ ដែលមានសភាពស្រឡូន ត្រង់ វែង នោះគឺជាម្រាមខ្លាំង។ តើម្រាមទាំងនេះ ប្រាប់យើងអំពីប្រការអ្វីខ្លះ?

យោងតាមទំព័រ Realsimple ម្រាមដៃនិមួយៗរបស់អ្នក មានអត្ថន័យដោយឡែក ដោយវាបង្ហាញអំពីចរឹតលក្ខណៈ និងចំណូលចិត្តរបស់មនុស្ស។ មនុស្សរាល់គ្នា មានម្រាមដៃមួយ “ខ្លាំង” និងម្រាមមួយ “ខ្សោយ” ស្ដែងឡើងឱ្យដឹងថា អ្នកពូកែ និងខ្សោយខាងវិស័យអ្វី។ ម្រាមដៃខ្លាំងជាម្រាមពិសេសរបស់អ្នក ជួនកាល វាប្រាប់អំពីលក្ខណៈពិសេសរបស់អ្នកផងដែរ។

ខាងក្រោមនេះគឺជាលក្ខណៈពិសេស តំណាងដោយម្រាមដៃនិមួយៗរបស់អ្នក ៖

១/ មេដៃ ៖ នាំទៅរកជោគជ័យ។

២/ ម្រាមចង្អុល ៖ អំណាច កម្លាំង ចក្ខុវិស័យ និងឥទ្ធិពល។

៣/ ម្រាមកណ្ដាល ៖ ទំនួលខុសត្រូវ ប្រសិទ្ធិភាព សុវត្ថិភាព អភិវឌ្ឍន៍ និងភាពឆ្លាតវៃ។

៤/ ម្រាមដៃនាង ៖ ភាពច្នៃប្រឌិត ការបង្ហាញពីខ្លួនឯង ក្ដីសង្ឃឹមត្រូវបានចាប់អារម្មណ៍ និងបានលេចធ្លោ។

៥/ ម្រាមកូនដៃ ៖ ស្ទីល ពូកែទំនាក់ទំនង។

ធ្វើយ៉ាងណាដើម្បីដឹងថា ម្រាមដៃណាមួយរបស់អ្នក “ខ្លាំង” និងម្រាមណាមួយ “ខ្សោយ” ?

ចូរពិនិត្យមើល ៖ ម្រាមណាមួយដែលមានសភាពកោង វៀច ផ្ដេកទៅខាងម្រាមដទៃ ឬកោងទៅរកម្រាមខាងមុខ ឬមួយមានចំណុចត្រង់ណាខុសពីធម្មតា នោះបង្ហាញថា ជាម្រាមខ្សោយ។ ចំណែកម្រាមដៃ ដែលមានសភាពស្រឡូន ត្រង់ វែង នោះគឺជាម្រាមខ្លាំង។

រូបសណ្ឋាននៃចុងម្រាមដៃ ប្រាប់អំពីប្រការអ្វី ?

១/ ចុងម្រាមដៃមូល ៖ អ្នកតែងតែចង់បានភាពសុខដុម និងចៀសវាងការឈ្លោះប្រកែកគ្នា។

២/ ចុងម្រាមដៃជ្រុង ៖ អ្នកគឺជាមនុស្សចូលចិត្តឱ្យអ្វីទាំងអស់ មានភាពជាក់ច្បាស់ មិនស្រមើស្រមៃ។

៣/ ចុងម្រាមដៃធំជាងគល់ម្រាម ៖ អ្នកចូលចិត្តភាពចម្លែក ថ្មីៗ និងមិនចូលចិត្ត ឬមើលស្រាលទម្លាប់បុរាណ និងលក្ខណៈជាទម្រង់ដដែល។

៤/ ចុងម្រាមដៃ ស្រួច ៖ អ្នកគេចវេះពីភាពជាក់ស្ដែង និងចូលចិត្តអ្វីដែលខុសពីធម្មតា មានភាពអាថ៌កំបាំង។

គំលាតរវាងម្រាមដៃ បញ្ជាក់អំពីរឿងអ្វីខ្លះ?

ចូរដាក់ដៃរបស់អ្នក តាមធម្មតា ទៅលើផ្ទៃតុរៀបស្មើ ៖

- ប្រសិនគំលាតរវាងម្រាមដៃរបស់អ្នក ធំទូលាយ នោះមានន័យថា អ្នកជាមនុស្សឯករាជ បើកទូលាយដើម្បីទទួលបាននូវប្រការថ្មី។

- ប្រសិនម្រាមដៃនៅប្រកៀកគ្នា នោះអ្នកគឺជាមនុស្សមានការប្រុងប្រយ័ត្នខ្ពស់ និងអាថ៌កំបាំង។
- ប្រសិនម្រាមកណ្ដាល និងម្រាមនាង មានគំលាតឆ្ងាយពីគ្នា វាបង្ហាញថា អ្នកជាមនុស្សមិនងាយនឹងទទួលឥទ្ធិពលពីសាធារណៈមតិ។

- ប្រសិន ម្រាមកណ្ដាល និងម្រាមនាង នៅជិតគ្នា នោះអ្នកគឺជាមនុស្សរងផលប៉ះពាល់ពីសង្គម និងជាអ្នកមានគោលការណ៍ច្បាស់លាស់គួរសម។

- ចំពោះម្រាមកូន និងម្រាមនាង ប្រសិនគំលាតរវាងពួកគវាធំ នោះជាសញ្ញាប្រាប់ថា អ្នកចូលចិត្តគេចពីរឿងសំខាន់។ ប្រសិនគំលាតមធ្យម (ប្រៀបធៀបជាមួយញាតិមិត្ត) មានន័យថា ជាមនុស្សមានការគិតបែបឯករាជ។

អត្ថបទសំខាន់ៗគួរចាប់អារម្មណ៍ ៖

ទស្សន៍ទាយនិស្ស័យអ្នកតាមរយៈក្រុមឈាម

ហេតុអ្វី មនុស្សមានអបិយជំនឿ ?

លាងដៃនៅពេលខឹង នឹងជួយឱ្យមានអារម្មណ៍ ស្រស់ថ្លា ឡើងវិញ

ប្រែសម្រួលដោយ ៖ តារា
ប្រភព ៖ Realsimple/KH